Свет
Се појавија снимки на кои Трамп признава дека ги лажел луѓето за коронавирусот
Американскиот претседател Доналд Трамп отворено рекол дека сакал да ја минимизира заканата од Ковид-19, истовремено признавајќи дека коронавирусот е опасен, покажува новата книга на новинарот Боб Вудворд.
Осум недели пред претседателските избори објавувањето на делови од оваа книга, која ја уреди истакнатиот новинар кој ја обелодени аферата „Вотергејт“, предизвика остра реакција од страна на демократскиот кандидат за претседател Џо Бајден, кој предупреди дека станува збор за „предавство“ на американскиот народ.
Trump tells Woodward he played down the threat of the coronavirus.
“I wanted to always play it down. I still like playing it down because I don’t want to create a panic.”He also tells Woodward that “plenty of young people” are vulnerable — different from his public message pic.twitter.com/fJZUZtJTIv
— Manu Raju (@mkraju) September 9, 2020
Во аудиоснимка објавена од Си-ен-ен уште во март, Трамп признава дека е свесен дека не умираат само постарите луѓе од коронавирусот, туку дека умираат и млади луѓе и дека се појавија нови зачудувачки факти.
„Отсекогаш сакав да го минимизирам тоа“, рекол американскиот претседател во телефонски разговор со Боб Вудвард на 19 март, објавено во книгата „Лутина“. „И сега сакам да го минимизирам, бидејќи не сакам да паничам“, додава тој.
Неколку недели претходно, на 7 февруари, тој му рекол на истиот новинар дека Ковид-19 е „смртоносна работа“.
Поради неговото управување со пандемијата, во која досега починаа повеќе од 189.000 луѓе во САД, Доналд Трамп стана цел на остри критики од неговите противници, но и од научниците и некои републикански пратеници.
Тој е обвинет за испраќање контрадикторни и нејасни пораки, но и дека не покажува сочувство за последиците предизвикани од вирусот. Во серија анкети огромното мнозинство Американци остро ги осудија неговите постапки на тоа поле.
Книгата, која треба да биде објавена на 15 септември, се базира на 18 интервјуа со Боб Вудвард, помеѓу декември 2019 година и јули 2020 година, снимени со согласност на Доналд Трамп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Блиски исток: ОН ги отфрлија повиците на Израел за повлекување на мировниците од јужен Либан
Додека војната меѓу израелската армија и либанскиот Хезболах продолжува, Обединетите нации соопштија дека нивните мировни сили во јужен Либан ќе останат на своето место и покрај постојаните израелски барања тие да се повлечат.
Израелскиот премиер Бенјамин Нетанјаху во неколку наврати ги повика привремените сили на ОН во Либан (УНИФИЛ) да се повлечат од базите на југот на земјата, а на тоа претходеа неколку сериозни инциденти во кои беа ранети припадници на силите на ОН.
Нетанјаху рече дека мировните сили во јужен Либан служат како телохранител на Хезболах.
Шефот на мировните операции на ОН, Жан-Пјер Лакроа, за новинарите во Њујорк изјави дека УНИФИЛ останува на место да му помогне на цивилното население и да го исполни мандатот што им го дал Советот за безбедност на ОН, кој ја поддржува одлуката.
Повеќе од 20 луѓе беа убиени во израелски напад врз селото Аита во северен Либан во понеделникот, 14 октомври, објавија локалните власти.
Според извештаите, станбената зграда, за која локалните жители велат дека е дом на семејства кои неодамна се преселиле од јужен Либан, била целосно уништена.
Од израелската воена команда соопштија дека цел билo едно од упориштата на Хезболах.
„Ги истражуваме тврдењата дека во нападот биле убиени либански цивили“, се додава.
Додека израелските сили ја продолжуваат офанзивата на северните делови на Појасот Газа, особено околу Џабалија, хуманитарните организации укажуваат дека палестинските цивили се на работ на гладување.
„Ситуацијата е катастрофална. Немаме залихи, останува уште многу малку храна и немаме гаранции од Израел дека нешто ќе биде доставено до Џабалија, каде што се заробени повеќе од 100.000 луѓе“, вели Јоргос Петропулос, шеф на хуманитарната агенција на ОН (OCHA), во Газа.
Десетици илјади се раселени од своите домови во областа Џабалија, но има и многу кои не можат да заминат поради се пожестоките борби.
Според податоците на ОН, во северниот дел на Газа има околу 400.000 Палестинци.
Според Министерството за здравство во Газа, со кое раководи Хамас, во последните 24 часа на таа територија загинале 55 лица, а околу 330 се ранети.
Израел постојано ги повикува мировните сили да се повлечат од областа на јужен Либан, каде од 30 септември се водат интензивни борби меѓу израелската армија и Хезболах.
УНИФИЛ досега ги одбиваше овие барања.
Речиси 10.000 мировници на ОН од 50 земји се стационирани во Либан, заедно со околу 800 цивилен персонал.
Од 1978 година тие патролираат во областа помеѓу реката Литани и границата меѓу Либан и Израел, позната како „Сината линија“, пренесуваат агенциите.
Регион
Објавени резултатите од пописот во Црна Гора
Според резултатите од пописот одржан во декември минатата година, најмногу граѓани на Црна Гора се изјасниле како Црногорци – 41,12 отсто (256.436). По нив следат Србите со 32,93 отсто (205.370), додека 9,45 отсто од граѓаните (58.956) се изјасниле како Бошњаци.
4,97 отсто од граѓаните (30.978) се изјасниле како Албанци, 2,06 отсто (12.824) како Руси, а 1,63 отсто (10.162) како муслимани.
Пописниот процес беше спроведен од 3 до 28 декември минатата година, откако неговиот почеток беше неколкукратно пролонгиран поради барањата на опозицијата и советите на помалкубројните народи да исполнат одредени услови за негово спроведување.
Според прелиминарните резултати од пописот, во Црна Гора живеат 623.158 жители, што е за два отсто повеќе од 2011 година.
Според пописот од 2011 година, Црногорците биле, исто така најмногубројни. На тој попис 0,33 отсто од граѓаните се изјасниле како Срби-Црногорци (2.103), како Египќани исто така 0,33 отсто (2.054), а како Црногорци-Срби 0,29 отсто (1.833).
Кога ќе се споредат резултатите од пописот одржан минатата година и оној од 2011 година, може да се види дека има 22.429 помалку Црногорци и 27.260 повеќе Срби.
Споредбата покажува и дека бројот на Бошњаците се зголемил за 5.351, Албанците за 539, а Русите од 946 на дури 12.824.
Бројот на оние кои национално се декларирале како муслимани е преполовен, односно е помал за 10.375.
Свет
Силен земјотрес го погоди Мароко
Силен земјотрес со јачина од 4,5 степени според Рихтеровата скала го погоди Мароко, јавува ЕМСЦ.
Земјотресот е регистриран на 25 километри од градот Азру, на длабочина од 12 километри.
Засега нема информации за повредени или материјална штета.