Генералниот секретар на Обединетите нации, Антонио Гутереш денеска изјави дека е длабоко загрижен поради сериозното намалување на американската странска помош, што според него ќе биде „особено катастрофално“ за ранливите луѓе ширум светот.

„Спроведувањето на овие намалувања ќе го направи светот помалку здрав, помалку безбеден и помалку просперитетен“, им рече тој на новинарите, пренесе Ројтерс.

Како што истакна, намалувањето на хуманитарната улога и влијание на Америка би било спротивно на американските интереси на глобално ниво.

Генералниот секретар на ОН претходно на форум на Советот за човекови права на ОН во Женева изјави дека човековите права се задушуваат.

„Човековите права се кислородот на човештвото. Но ги задушуваат“, рече Гутереш, наведувајќи ги „автократите и патријархатот“, како и „воените хушкачи и климатската криза“.

Во истиот говор тој изрази сериозна загриженост за порастот на насилството на Западниот Брег и повиците на анексија.

Назначен е нов руски амбасадор во САД, соопшти денеска руското Министерство за надворешни работи, еден ден по билатералните разговори во Истанбул и во услови на растечко зближување меѓу Москва и Вашингтон.

Во соопштението се вели дека амбасадорот Александар Дарчиев (64), кој во 2021 година беше директор на Одделот за Северна Америка на руското МНР, наскоро ќе пристигне во Вашингтон, а на почетокот на годината беше назначен на функцијата за целата северноатлантска зона (Велика Британија, Ирска, Канада и САД).

Од 2014 до 2021 година беше амбасадор во Канада.

Дарчиев ќе го замени Анатолиј Антонов, дипломат-ветеран кој ја напушти функцијата амбасадор во САД во октомври 2024 година, во време на зголемени тензии меѓу двете сили поради руската војна во Украина.

Новиот амбасадор, кој течно зборува англиски и француски јазик, работеше како советник во Руската амбасада во Вашингтон од 2005 до 2010 година.

Неговото назначување доаѓа еден ден по руско-американските разговори во Истанбул, чија цел е враќање на нормалното функционирање на амбасадите и конзулатите.

Од телефонскиот разговор меѓу рускиот и американскиот претседател Владимир Путин и Доналд Трамп на 12 февруари, двете страни рекоа дека сакаат целосен ремонт на билатералните односи, ненадеен пресврт по години на многу високи тензии.

Либанските власти на аеродромот во Бејрут заплениле 2,5 милиони долари во готовина наменета за милитантната група Хезболах, која маж кој пристигнал од Турција се обидел да ги скрие, изјавија три извори за Ројтерс во понеделникот.

Еден од изворите рече дека ова е прв пат да се изврши ваква заплена.

Хезболах сè уште не ги коментира овие наводи.