Американскиот републикански сенатор Ренд Пол го предал писмото од претседателот Доналд Трамп адресирано до неговиот руски колега Владимир Путин во Кремљ за време на неговата посета на Москва.

Во писмото се рагледува можноста за нова средба и разговори на највисоко ниво меѓу двете земји, но се нагласува и важноста од понатамошен ангажман во разни области вклучувајќи ја и борбата против тероризмот, зајакнување на парламентарната соработка и продолжување на културната размена.

Портпаролот на Путин, Димитри Песков, за руските новински агенции потврдил дека писмото било примено преку дипломатски канали и оти се очекува претседателската администрација набргу да го добие.

Посетата на Ренд Пол на Москва доаѓа во чувствително време во американско-руските односи. И Трамп и Путин си упатија покани еден на друг за средба во нивните главни градови. По средбата во Хелсинки, не е закажана нова средба, а од Белата куќа соопштија дека ќе ја одложат посетата на Путин во Вашингтон до 2019 година до кога се очекува да биде завршена истрагата на специјалниот советник Роберт Мулер за руското мешање на претседателските избори во 2016.