Свет
Путин до Западот: Бидејќи вие ја вооружувате Украина, можеме и ние да ги вооружиме вашите непријатели

Рускиот претседател Владимир Путин ги критикува западните земји за снабдување со оружје со долг дострел на Украина предупредувајќи дека Москва би можела да испорача слично оружје и на други земји за напад на западни цели.
„Ако некој мисли дека е можно да се достави такво оружје во воена зона за да ја нападне нашата територија и да ни создаде проблеми, зошто немаме право да ги снабдуваме другите со нашето оружје“, рече Путин на прес-конференција во Санкт Петербург.
Неговите коментари следуваа откога американски сенатор и западен функционер потврдија дека Украина неодамна користела американско оружје за да нападне внатре во Русија.
Оружјето беше користено според неодамна одобрените упатства од Џозеф Бајден.
Републиканскиот сенатор Мајк Раундс од Јужна Дакота, член на Комитетот за вооружени служби на Сенатот, ги потврди нападите со американско оружје.
Берлин исто така неодамна ѝ дозволи на Украина да погоди некои цели на руска територија со оружје со долг дострел доставено од Германија, што, според Путин, е опасен чекор што може да ги уништи односите меѓу Берлин и Москва.
Путин исто така рече дека американската администрација презема енергични чекори во обид да обезбеди ослободување на уапсениот новинар на „Волстрит џурнал“, Еван Гершковиќ, но рече дека таквите прашања може да се решат само врз основа на реципроцитет.
Путин додаде дека разговорите со американските разузнавачки агенции на оваа тема се во тек, но дека тие мора да се водат тивко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Напад во кривичниот суд во Њујорк, има повредени

Тројца судски службеници денес биле нападнати со нож и повредени во зградата на Кривичниот суд на Менхетен, потврдија два извори од њујоршката полиција кои се запознаени со нападот.
„Осомничениот напаѓач е приведен по нападот врз службениците во зградата на судот на Централната улица во Њујорк. Нападот се случил близу фоајето“, изјавил неименуван полициски извор за NBC.
Еден судски службеник се здобил со посекотини на лицето, друг на вратот, а третиот бил повреден кога осомничениот го фрлил на подот обидувајќи се да побегне, се наведува во извештајот на американската телевизиска мрежа.
Сите тројца повредени се медицински згрижени и се чувствуваат добро, а истрагата е во тек, иако засега не е јасно што бил мотивот за нападот.
Свет
„Ерусалим пост“: Трамп ќе му даде на Иран последна шанса

Американскиот претседател, Доналд Трамп, планира да му упати на Иран последна шанса за договор, објави „Ерусалим пост“, повикувајќи се на американски и европски претставници.
Според неофицијални информации, новата понуда би можела да биде уште поповолна од онаа од пред недела и половина, но сепак би се базирала на американското барање за нулта толеранција за збогатување ураниум.
Според истиот извор, Иран се обидел да посредува со американската администрација преку Оман и Катар со цел да ги запре израелските напади и да ги обнови преговорите за нуклеарната програма. Саудиска Арабија наводно дејствува преку посебен канал со иста цел – постигнување прекин на огнот.
Свет
Претседателот на Иран: Не сакаме ширење на војната

Иранскиот претседател Масуд Пезешкијан изјави дека Иран не сака да ја прошири војната со Израел, но ќе одговори пропорционално на секој напад, пренесува државната иранска новинска агенција.
Пезешкијан ова го рекол за време на телефонскиот разговор со турскиот претседател Реџеп Таип Ердоган.
„Иранските научни, воени и цивилни објекти беа под израелска агресија, при што беа убиени цивили, научници и воени водачи“, рече Пезешкијан.
„Иран не ја започна оваа војна, но ќе одговори според нивото на напад“, изјави.
Тој додаде дека учеството на Иран во нуклеарните преговори со САД зависи исклучиво од прекинот на нападите на ционистичкиот режим врз земјите во регионот.
Турскиот претседател Ердоган, според турската државна агенција, му рекол на Пезешкијан дека Турција е подготвена да игра улога на посредник за да помогне во деескалацијата на конфликтот и да го поддржи враќањето на преговорите за нуклеарната програма.