Свет
Путин заминал во бункер од каде ги носи клучните одлуки, го предупредил и семејството
Рускиот претседател Владимир Путин наводно подготвува клучни одлуки за можен нуклеарен напад во бункер далеку од Москва, јавуваат западните медиуми.
Според медиумите, Путин, кој в петок ќе го прослави својот 70. роденден, ги предупредил членовите на семејството, вклучително и неговата наводна партнерка Алина Кабаева (40) дека постои можност за брза евакуација.
„Дејли мејл“ пишува, повикувајќи се на изјавите на телеграмскиот канал „Генерал СВР“, дека Путин верува дека е безбеден во бункерот од можни напади на западните земји, а главните менаџери на неговиот кабинет и безбедносниот апарат ќе бидат префрлени на тајна локација.
Овој канал тврди дека кружат информации дека Путин има акутни здравствени проблеми, но и покрај овие наводи, нема потврда за тоа, за што своевремено зборуваше и шефот на ЦИА.
Се претпоставува дека Путин има неколку бункери во Сибир, вклучувајќи еден во Јамалија и друг во планините Алтај.
„ Семејствата и пријателите на шефот на државата ќе бидат префрлени порано во бункерот“, се наведува на телеграмскиот канал „Генерал СВР“.
„Дејли мејл“ понатаму наведува дека Путин наводно наредил евакуација на „неопходниот минимум“ на руското раководство во случај на нуклеарна закана.
„ Ова ги вклучува премиерот Михаил Мишустин, претседателот на парламентот Вјачеслав Володин, јавниот обвинител, членовите на Советот за безбедност, но не и поранешниот претседател на Русија, Дмитриј Медведев, како и клучните луѓе од неговата администрација и трите безбедносни и разузнавачки служби – ФСБ, ФСО и СВР со нивните семејства“, пишува овој портал.
Се претпоставува дека Министерството за одбрана има бункери на планините Урал. Има информации и дека ќе бидат евакуирани ќерките на Путин, Марија Воронцова (36) и Катерина Тихонова, заедно со нивните партнери и деца. Луиза Розова (19), за која се шпекулира дека е вонбрачна ќерка на Путин, наводно не била поканета во бункерот, а ниту неговиот син од претходната врска.
Розова е ќерка на мултимилионерката Светлана Кривоногих (47), која наводно поседува дел од Руска банка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Свет
Уапсен уште еден осомничен за терористичкиот напад во Москва
Уште едно лице е уапсено во врска со терористичкиот напад на градското собрание Крокус во Москва на 22 март, соопшти денеска за „ТАСС“ портпаролот на полицијата.
„Уапсен е уште еден потенцијален осомничен во случајот со терористичкиот напад на Крокус. Инспекторите ја испитуваат неговата улога во тој напад“, изјави претставник на полицијата.
Полицијата уапсила државјанин на Таџикистан. Досега во врска со случајот се уапсени 11 лица, меѓу кои и четворица извршители на нападот.
Според последните податоци, во терористичкиот напад во концертната сала „Крокус сити хол“ во Москва загинале 145 лица.
Свет
Почина бебето кое беше извадено од утробата на мртвата мајка во Газа
Почина бебето кое во неделата со царски рез во Газа беше спасено од утробата на мртвата мајка, пишува Би-Би-Си.
Бебето е родено по итен царски рез извршен врз трудница која била убиена во израелски напад врз градот Рафа во Газа.
Освен мајката на Сабрин Ал Сакани, меѓу загинатите се и таткото на новороденото девојче и нејзината тригодишна сестра Малак.
Бебето при раѓањето тежело 1,4 килограми, а се родило во триесеттата недела од бременоста на мајката. Веднаш по царскиот рез беше сместено во инкубатор во болницата во Рафа заедно со уште едно бебе.
Но, девојчето после неколку дена почнало да има сериозни здравствени проблеми. Лекарите го реанимирале, но сепак починало вчера.
16 деца биле убиени за време на два воздушни напади на Рафа минатиот викенд, при бомбардирање на комплекс од станбени згради.
Израелските одбранбени сили (ИДФ) соопштија дека цел биле борците и инфраструктурата на Хамас и воените комплекси.