Свет
Путин првпат во Северна Кореја по 24 години: „Ќе ви помогнеме против Америка“

Рускиот претседател Владимир Путин, кој денеска е во посета на Северна Кореја првпат по 24 години, вети дека ќе ги продлабочи трговските и безбедносните врски со Пјонгјанг и ќе ја поддржи Северна Кореја против Соединетите Американски Држави.
САД и нивните азиски сојузници се обидуваат да откријат до кој степен Русија ќе го поддржи севернокорејскиот лидер Ким Џонг-ун, чија земја е единствената што тестира нуклеарно оружје во 21 век.
Путин го пофали Пјонгјанг за отпорот на, како што го нарече, економскиот притисок, уцените и заканите на САД сугерирајќи дека Русија, постојана членка на Советот за безбедност на Обединетите нации со право на вето, го менува својот пристап кон Северна Кореја.
Во написот објавен од севернокорејските државни медиуми, Путин го пофали „другарот“ Ким и вети дека „заеднички ќе се спротивстави на нелегитимните еднострани ограничувања“ и ќе ја развие трговијата и ќе ја зајакне безбедноста во Евроазија.
„Вашингтон, кој одбива да ги спроведе претходно постигнатите договори, постојано поставува нови, сè построги и очигледно неприфатливи барања“, рече Путин во написот објавен на насловната страница на севернокорејскиот весник „Родонг Синмун“, официјалниот весник на владејачката партија.
„Русија секогаш ги поддржувала и ќе продолжи да ги поддржува Демократската Народна Република Кореја и херојскиот корејски народ во нивното противење на подмолен, опасен и агресивен непријател“.
Путин истакна дека Советскиот Сојуз е првата земја што ја признала Северна Кореја, која ја основал дедото на Ким, Ким Ил Сунг, помалку од две години пред Корејската војна во 1950 година.
Севернокорејските државни медиуми објавија и написи во кои ја фалат Русија и ги поддржуваат нејзините воени операции во Украина нарекувајќи ги „света војна на сите руски граѓани“.
Државната посета на Путин доаѓа во време на обвинувањата на САД дека Северна Кореја ѝ доставила на Русија „десетици балистички ракети и над 11.000 парчиња муниција“ за употреба во Украина. Јужна Кореја, цврст сојузник на САД, исто така изрази слична загриженост.
Белата куќа вчера соопшти дека е вознемирена од зајакнувањето на врските меѓу Русија и Северна Кореја. Американскиот Стејт департмент соопшти дека е „апсолутно сигурно“ оти Путин ќе бара оружје за неговата војна во Украина.
Москва и Пјонгјанг негираа дека имало какви било трансфери на оружје, но ветија дека ќе ги зајакнат воените врски, вклучително и потенцијално одржување заеднички воени вежби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Фото+Видео) Папата погребан со едноставна церемонија во „Санта Марија Маџоре“

Поворката со ковчегот на папата Франциск пристигна во базиликата „Санта Марија Маџоре“ во Рим, каде што поглаварот на Католичката црква ќе биде погребан. Погребната поворка, која го носеше ковчегот на Франциск во пренаменет папамобил, тргна од базиликата „Свети Петар“ кон неговата последна дестинација, додека илјадници верници, собрани на улиците на Рим, му оддаваа почит.
На рутата долга околу 5,5 километри од плоштадот „Свети Петар“, поворката помина покрај бројни познати римски споменици, вклучувајќи го и Колосеумот, а насобраните граѓани аплаудираа додека ковчегот минуваше.
Пред базиликата „Санта Марија Маџоре“, папата Франциск беше пречекан од четириесет претставници на маргинализирани групи – мигранти, бездомници, затвореници и трансродови лица – кои му оддадоа последна почит.
Погребот на папата ќе биде приватен, според неговите сопствени желби. Франциск ќе биде погребан во базиликата од петтиот век, лоцирана во центарот на Рим, во мала ниша на подот. Надгробната плоча, изработена од лигурски мермер, ќе го носи само неговото име на латински јазик – Franciscus.
Во истата базилика е погребан и прочуениот архитект и скулптор Џан Лоренцо Бернини, авторот на колонадите на плоштадот „Свети Петар“, каде што се одржа и погребната миса за папата Франциск.
Целиот церемонијал се одржа по едноставна постапка, како што тој лично посакувал.
Последниот папа што бил погребан надвор од ватиканските ѕидини бил Лав XIII, кој починал во 1903 година и бил погребан во базиликата „Свети Јован Латерански“. Последен пат, папа бил погребан во базиликата „Санта Марија Маџоре“ во 1669 година, кога таму бил положен Климент IX.
Кардинал Батиста Ре: Папата Франциск беше близок до народот и посакуваше Црква за сите
Италијанскиот кардинал Џовани Батиста Ре, на церемонијата на збогување на плоштадот „Свети Петар“, изјави дека папата Франциск бил „папа близок до народот“, кој посакувал Црква отворена за сите. Како што истакна кардиналот, водечката нишка на 12-годишниот понтификат на Франциск била идејата за „Црквата како дом за сите“.
Батиста Ре, 91-годишниот декан на Колеџот на кардинали кој ја предводеше погребната миса за покојниот поглавар на Римокатоличката црква, нагласи дека Франциск сакал да биде меѓу народот, со „отворено срце за сите“. Тој додаде дека папата бил особено чувствителен на она што се случувало во општеството, но и на инспирацијата која, како што рече, Светиот Дух ја внесувал во животот на Црквата.
Во своето обраќање пред насобраните верници и светски лидери, Батиста Ре го опиша Франциск како „многу спонтан човек“, со „неформален начин на комуникација со сите“, вклучително и со оние кои биле далеку од верата. „Полн со човечка топлина и длабоко чувствителен на раните од денешницата, папата Франциск навистина ги сподели грижите, страдањата и надежите на нашето време“, рече кардиналот.
Франциск, според него, се залагал за Црква што се грижи за проблемите што го разоруваат современиот свет, Црква што ќе се наведне над секој човек, без разлика на неговата вера или животни околности.
Кардиналот потсети дека папата бил најмногу загрижен за маргинализираните – сиромашните, мигрантите и бегалците. Прво патување како папа Франциск го направил токму на Лампедуза, остров кој стана симбол на трагедијата на миграцијата.
Батиста Ре ги спомена и дел од 47-те апостолски патувања на Франциск, вклучително и посетата на грчкиот остров Лезбос заедно со претставници на други цркви, мисата на границата меѓу Мексико и САД, како и ризичното патување во Ирак во 2021 година.
Следејќи ја визијата на Франциск, кој постојано повикуваше на „градење мостови, а не ѕидови“, италијанскиот кардинал испрати силна порака за важноста на мирот.
„Војната секогаш го остава светот полош отколку што беше порано. Војната е секогаш болен и трагичен пораз за сите“, рече Батиста Ре, обраќајќи се пред околу педесет светски лидери кои пристигнаа во Ватикан за да му оддадат последна почит на папата Франциск.
Свет
Трамп и Зеленски разговараа 15 минути пред погребот, нова средба подоцна

Портпаролот на украинскиот претседател, Сергеј Никифоров, изјави дека Володимир Зеленски и американскиот претседател Доналд Трамп денеска ќе одржат уште една средба.
Двајцата лидери веќе имаа краток, 15-минутен разговор во базиликата Свети Петар, непосредно пред почетокот на погребот на папата Франциск.
„Лидерите се согласија да ги продолжат разговорите денеска. Тимовите работат на организирање на продолжението на состанокот,“ изјави Никифоров.
Свет
(ФОТО) Погледнете го новиот севернокорејски воен брод од 5.000 тони

Севернокорејскиот лидер Ким Џонг Ун присуствуваше на церемонијата на лансирање на „нов повеќенаменски разорувач“, објави државната агенција КЦНА во саботата.
„Воениот брод од 5.000 тони е опремен со најмоќно оружје и е изграден за околу 400 дена… со наши сопствени сили и технологија“, беше цитиран Џо Чун Рјонг, секретар на владејачката Работничка партија.
Ким, во говорот на лансирањето, објавен од KЦНА, рече дека воениот брод ќе биде предаден на морнарицата и ќе влезе во служба на почетокот на следната година.
Лансирањето се одржа во петокот во военото бродоградилиште Намфо и означи нова ера на „голема изградба на флота во стилот на Ким Џонг Ун“, објави КЦНА, цитирајќи го вицеадмиралот Пак Кванг Соп. Бродот е оценет како „класа Чое Хјон“ именуван по антијапонскиот револуционерен борец Чое Хјон, се додава во извештајот.
Порано овој месец, Ројтерс објави дека новата класа воени бродови на Северна Кореја е способна да смести десетици вертикални лансирни ќелии за носење ракети што нејзината војска веќе ги развила, повикувајќи се на анализа на сателитски снимки.
Ким, исто така, рече дека силните превентивни можности за удар се најубедливото „воено одвраќање“ и дека нема ограничување на обемот на ваквите напади.
„Безбедносната средина во нашата земја во моментов е многу сериозна“, беше цитиран лидерот.
Тој им се заблагодари на работниците и техничарите за изградбата на новиот разурнувач, кој беше „верен на линијата на партијата за зајакнување на поморските сили“, пренесе КЦНА.
Ким, исто така, рече дека САД редовно распоредуваат стратешки средства на Корејскиот Полуостров.
Бомбардерите Б-1Б беа користени во заедничка воена вежба на Јужна Кореја и САД претходно овој месец, заедно со борбени авиони, според Министерството за одбрана на Сеул, објави Ројтерс. Бомбардерите Б-1Б редовно учествуваа во заеднички воени вежби во последниве години, што Северна Кореја долго време го осудува како проба за војна, додека Сеул инсистира дека тие се чисто дефанзивни.
DPRK just launched its first of new air defense frigates (labeled multi-purpose destroyer) for the Korean People’s Navy in Nampo. https://t.co/BS1aWvyIXn pic.twitter.com/7QqBN2pIgB
— Collin Koh 🇸🇬🇺🇦 (@CollinSLKoh) April 26, 2025