Свет
Путин итно сака да преговара со НАТО и САД за безбедноста на Русија

Рускиот претседател, Владимир Путин, повика веднаш да се почнат преговори со НАТО и Соединетите Американски Држави за гаранциите за руската безбедност поради тензиите за Украина.
„Владимир Путин ја истакна потребата веднаш да се почнат преговори со САД и НАТО за да се обезбедат правни гаранции за безбедноста на нашата земја и да се спречи идно ширење на сојузот на исток и распоредување оружени системи во Украина и соседни земји што би биле закана за Русија“, истакна Кремљ во соопштение објавено по телефонскиот разговор на рускиот претседател со финскиот колега, Саули Нинисто.
Рускиот претседател во разговор преку видеолинк на почетокот на декември побара од американскиот претседател Џо Бајден правни гаранции за да се исклучи секакво ново проширување на НАТО бидејќи Москва оценува дека Западот, отворајќи им ја вратата на воениот пакт на земјите од Источна Европа и поранешниот СССР, го прекрши усното ветување дадено по распадот на Советскиот Сојуз.
Во таа смисла Русија го смета евентуалното членство на Киев за преминување преку црвена линија.
Западот во моментот стравува дека Русија подготвува инвазија во Украина и трупа сили на заедничката граница.
Кремљ ги отфрла тие обвинувања и тврди дека НАТО ја загрозува Русија вооружувајќи го Киев и распоредувајќи сè повеќе воздухопловни и поморски сили во Црното Море.
Путин воедно повторно ги обвини украинските власти дека го кршат договорот од Минск, кој содржи насоки за воспоставување мир на истокот на Украина, во Донбас, каде што Киев веќе речиси осум години војува со проруските бунтовници за кои тврди дека добиваат наредби од Кремљ.
„Рускиот претседател истакна дека украинските власти, кршејќи го договорот од Минск, отворено се закануваат со сила користејќи во Донбас тешко оружје и напади со беспилотни летала“, истакна Кремљ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германската разузнавачка служба ја класифицира АфД како екстремистичка партија што ѝ се заканува на демократијата

Германската разузнавачка служба денес ја класифицираше партијата Алтернатива за Германија (АФД), која го освои второто место на последните парламентарни избори, како „докажано екстремно десничарско“ движење, што треба да ѝ овозможи да биде ставена под строг надзор.
Идеологијата на АФД, која „ги девалвира цели групи од населението во Германија и го поткопува нивното човечко достоинство, не е компатибилна со основниот демократски поредок“, се вели во соопштението на Канцеларијата за заштита на Уставот.
На парламентарните избори на 23 февруари, партијата постигна историски пробив и го дуплираше претходниот резултат со повеќе од 20 проценти од гласовите.
Оттогаш, оваа млада партија, основана во 2013 година, дури и ја престигна конзервативната партија Христијанско-демократска унија (ЦДУ) на Фридрих Мерц, кој треба да положи заклетва како нов канцелар во вторник, во некои анкети на јавното мислење.
Канцеларијата за заштита на Уставот сè уште не даде детали за конкретните последици од оваа класификација на АФД, која би можела да има големи последици врз политичкиот живот во Германија.
Оваа класификација им дава на властите значителни средства за следење и контрола на активностите, вклучително и приватните комуникации.
Дебатата за можната забрана на АФД, што некои политички лидери ја иницираа во последните месеци, би можела повторно да се разгори.
Германската разузнавачка служба веќе ја класифицираше младинската организација на АфД и неколку нејзини регионални ограноци во поранешните источногермански покраини како „екстремистички“.
Во соопштението, таа служба го споменува „општиот непријателски став на партијата кон мигрантите и муслиманите“ и „континуирани изјави“ за тоа што „поттикнуваат ширење и продлабочување на предрасудите, огорченоста и стравот“.
Свет
Тинејџер од Полска убил и запалил жена, па отишол на екскурзија во Грција

Во грчкиот град Катерини, малолетник од Полска е уапсен и обвинет за брутално убиство кое наводно го извршил во својата земја.
Станува збор за 17-годишен тинејџер, кој дошол на организирана екскурзија во Грција неколку дена по злосторството. Уапсеното лице е обвинето за убиство на жена на 23 април во град во североисточна Полска.
Според кривичната пријава, седумнаесетгодишникот наводно ја влечел жената до работилница, каде што ја удрил неколку пати со секира или чекан. Тој е обвинет и дека ја запалил така што истурил непозната хемиска супстанца врз нејзиното тело, а потоа го фрлил телото во пластична корпа за ѓубре, според медиумите во регионот.
Тинејџерот бил идентификуван од полските власти и по него била издадена потерница, која била извршена во Грција кога бил пронајден.
Се очекува обвинетиот да биде изведен пред Обвинителството на Апелациониот суд во Солун за да се започне постапката по барањето за екстрадиција од Полска, според написите.
Свет
Поставен најпознатиот оџак во светот: првиот знак дека сè е подготвено за историскиoт момент

Утрово, во Ватикан почна симболична и логистички значајна операција – пожарникарите почнаа да го инсталираат веројатно најпознатиот оџак во светот, оној на покривот на Сикстинската капела. Преку него, во наредните денови, ќе му се сигнализира на светот текот на конклавата – со црн чад ако папата не е избран или со бел чад кога ќе се избере 267. поглавар на Римокатоличката црква.
Се очекува првиот чад од оџакот да се појави в среда попладне откога кардиналите ќе почнат затворена изборна постапка, позната како конклава. Во овој изборен процес учествуваат 133 кардинали, а за еден од нив да биде избран за папа мора да добие двотретинско мнозинство гласови, пренесуваат светските медиуми.
На претходната конклава одржана во 2013 година, кога беше избран папата Франциско, на белиот чад му претходеа пет круга гласање, а изборот беше направен попладнето на вториот ден.
Ритуал и симболика во срцето на Ватикан
Едно гласање е закажано за првиот ден од конклавата, а четири ќе се одржат во следните денови – две наутро и две попладне. Доколку и по три дена не се избере ниеден кандидат, постапката привремено се прекинува, така што кардиналите ќе имаат ден за молитва, меѓусебни дискусии и духовна обнова. На тој ден духовната поука ја дава првиот кардинал од редот на ѓаконите.
Покрај традиционалниот сигнал преку чад, изборот на папата од понтификатот на Јован Павле II исто така се најавува со ѕвонењето на најголемото ѕвоно на базиликата „Свети Петар“.
Потоа кардиналот се појавува на балконот на базиликата со зборовите познати на целиот свет: „Ви најавувам голема радост! Имаме папа!“
Додека очите на светот се насочени кон Ватикан, минута по минута се следат сите детали што го најавуваат големиот настан. Поставувањето на оџакот на покривот на Сикстинската капела, извршено од пожарникари под будното око на црковните и техничките екипи, е првиот знак дека сè е подготвено за уште еден историски момент во животот на Римокатоличката црква, според написите.