Свет
Путин патува во Монголија: државата е обврзана да го приведе секое лице на нејзина територија, кое е предмет на налог за апсење на Меѓународниот кривичен суд

Во вторник, 3 септември, рускиот претседател Владимир Путин оди во Монголија, земја членка на Меѓународниот кривичен суд (МКС) и која поради тоа е обврзана да го уапси на нејзина територија врз основа на налог за апсење издаден во март 2023 година за илегална депортација на украински деца.
„Путин ќе допатува во официјална посета на Монголија на 3 септември“, се вели во соопштението на Кремљ во четвртокот, пренесува „Антена обсерватор“.
Ова ќе биде прво патување на рускиот претседател во држава потписник на Римскиот статут откако МКС издаде налог за негово апсење во март 2023 година. Монголија го потпиша Римскиот статут во 2000 година и го ратификува во 2002 година. Така, секоја земја членка е должна да го приведе секое лице на своја територија, кое е предмет на налог за апсење на МКС, како што е случајот со Владимир Путин.
Кремљ секогаш одлучно ги отфрлаше обвинувањата на МКС против рускиот претседател. Сепак, Путин внимателно избегнуваше патувања во странство речиси една и пол година прескокнувајќи го, на пример, самитот на БРИКС во Јужна Африка во август 2023 година, а потоа и самитот на Г20 во Индија во септември истата година.
Од друга страна, тој ја посети Кина во мај, Северна Кореја во јуни и Азербејџан во средината на август, но ниту една од овие земји не е членка на МКС. Рускиот претседател оди во Монголија „на покана на монголскиот претседател Укна Курелсук“, според Кремљ, „да учествува на прославата на 85-годишнината од заедничката победа на советските и монголските вооружени сили над јапонските милитаристи“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германија ќе го преполови бројот на работни визи за Западен Балкан, меѓу кои и Македонија

Германија ќе го преполови бројот на имигранти од Западен Балкан, според коалицискиот договор на новата демохристијанско-социјалдемократска влада.
„Редовната миграција во Германија во рамки на таканареченото Правило за Западен Балкан ќе биде ограничена на 25.000 луѓе годишно“, се вели во коалицискиот договор што Унијата ЦДУ/ЦСУ и Социјалдемократската партија на Германија (СПД) го претставија денеска во Берлин.
Правилото со кое им се дозволува на работниците од Западен Балкан да имигрираат за работни цели беше воведено на почетокот на 2016 година, откако земјите од регионот беа прогласени за безбедни земји, со што практично беше исклучено стекнувањето на правата на азил во Германија за граѓаните на тие земји.
Ова правило имаше за цел да им овозможи на оние лица кои ќе најдат работа во Германија да имигрираат во Германија на редовна основа. За разлика од другите правила за трудови имигранти кои не доаѓаат од некоја од земјите на Европската унија, имиграцијата според Правилото за Западен Балкан не бара квалификации, туку само договор за вработување со работодавач во Германија.
Последната социјалдемократско-зелено-либерална влада ја удвои квотата според ова правило на 50.000 работни дозволи годишно пред помалку од една година. На крајот на минатата година, во Германија се регистрирани 79.500 лица врз основа на имиграција според правилата за Западен Балкан. Најголем број се од Косово, а потоа следат граѓаните на Босна и Херцеговина.
Граѓаните на шест земји од Западен Балкан (Албанија, Босна и Херцеговина, Црна Гора, Косово, Северна Македонија и Србија) исто така можат легално да имигрираат во Германија преку други програми за имиграција на квалификувана работна сила. Најголем проблем при издавањето на работните визи беше ограничениот капацитет на германските конзуларни претставништва, каде во почетната фаза се чекаше за термин повеќе од една година.
Свет
Американски режисер мора да плати 1,7 милијарди долари – 40 жени го обвинија за злоставување

Судот во Њујорк му наложи на американскиот режисер Џејмс Тобек, номиниран за Оскар, да плати отштета од 1,68 милијарди долари на 40 жени кои го обвинија за сексуален напад и други злосторства во последните четири децении.
Поротата во Њујорк одлучи дека Тобек ја злоупотребил својата позиција во филмската индустрија сексуално напаѓајќи жени во периодот од 1979 до 2014 година.
Тобек беше меѓу првите холивудски моќници кои беа обвинети за сексуално недолично однесување на почетокот на кампањата „MeToo“, а ова е најголемата сума пари што државата Њујорк нареди да им се исплати на жртвите кои ја покренаа иницијативата.
Тобек, кој се застапуваше себеси, ги негираше наводите, наведувајќи дека „секоја сексуална средба или контакт помеѓу тужителот и обвинетиот била консензуална“.
Покрај режисерското деби во „Fingers“ (1978), Тобек ги режираше „The Pick-up Artist“ (1987), „Two Girls and a Guy“ (1997), „Black and White“ (1999), „Tyson“ (2008), а исто така е познат и по неговото сценарио за „Bugsy“, кој не го режирал, но беше номиниран за Оскар за оригинално сценарио.
Свет
И Европската Унија ги стави на пауза царините за САД

Европската Унија одлучи да ги паузира своите контрамерки на американските царини на 90 дена за да отвори простор за преговори.
Вчера, само неколку часа пред американскиот претседател Доналд Трамп да објави дека ќе го одложи воведувањето на тарифите, 26 од 27 земји членки на ЕУ, сите, освен Унгарија, гласаа за воведување контрамерки.
Претходно денеска, претседателката на Европската комисија, Урсула фон дер Лајен, ја поздрави најавата на Трамп за пауза во примената на реципрочните царини.
„Јасните и предвидливи услови се клучни за функционирањето на трговијата и синџирите на снабдување“, напиша Фон дер Лејен на социјалната мрежа „Икс“.
Таа додаде дека царините се даноци што само им штетат на фирмите и на потрошувачите. „Затоа постојано се залагав за договор за царини нула за нула меѓу Европската Унија и Соединетите Американски Држави“, посочи таа.
Вчера, Трамп најави целосен прекин на царините, со исклучок на Кина, чии царини ќе бидат зголемени од 104 на 125 отсто.