Свет
Путин ѝ нуди на Белорусија заем од милијарда долари

Рускиот претседател, Владимир Путин, во понеделникот ѝ понуди на Белорусија заем од милијарда долари додека му беше домаќин на својот белоруски колега во резиденцијата во Сочи, Русија. Посетата го одбележа првото патување во странство на Александар Лукашенко по избувнувањето на протестите во неговата земја со барање да поднесе оставка, пренесува РТ.
„Русија ќе ѝ даде заем од 1,5 милијарда долари на Белорусија. Нашите министри за финансии работат на тоа. Исто така, ќе треба да ја продолжиме нашата соработка во воената област. Денес, почнуваме вежби што ги испланиравме минатата година и ќе траат неколку дена. И, повторно, за да се избегнат какви било шпекулации, ќе нагласам дека овие вежби беа планирани, па дури и објавени минатата година“, рече Путин.
Путин беше внимателен да не ги дефинира своите понуди за финансиска и воена помош за Белорусија како поддршка за одржување на моќта на Лукашенко, пред сè, поголемото спротивставување на неговото владеење. Наместо тоа, тој тврди дека Русија ја ветила помошта за исполнување на обврските што нацијата ги презела претходно кон Белорусија, што тој ја опиша како најблискиот сојузник на Русија.
Путин се осврна на блиските односи што ги одржуваат двете земји според условите на договорот за создавање на сојузот меѓу Русија и Белорусија од 1999 година, кој повикува на соработка во надворешната политика, одбраната и социјалната и економска политика меѓу двете држави за создавање унифициран парламент и единствена валута во иднина, според „Обзервер рисрч фаундејшн“.
Рускиот претседател во понеделникот конкретно го спомна договорот за сојузот на држави повикувајќи се на интеграцијата меѓу двете држави, што се бара со договорот. Според некои набљудувачи, Путин се залага за исполнување на обврските на пактот со надеж за повторно обединување на Белорусија со Русија за формирање наддржава.
Двајцата лидери претходно се сретнаа во Сочи на почетокот на февруари на слични разговори, во кои Путин го притискаше Лукашенко за понатамошна интеграција со Русија според условите на пактот. Сепак, повеќе од две децении од потпишувањето на договорот тој продолжува да постои во голема мера на хартија, делумно затоа што во минатото Лукашенко не сакаше да ја отстапи власта, тврди „Гардијан“.
Путин се осврна и на актуелните протести во Белорусија повикувајќи го Лукашенко, кој владее со земјата 26 години како претседател, да се повлече. Немирите почнаа по претседателските избори на 9 август, на кои Лукашенко беше избран за шести по ред мандат на функцијата.
Неистомислениците излегоа на улиците истиот ден обвинувајќи го државниот изборен комитет за фалсификување на гласањето иницирајќи протестно движење, кое оттогаш продолжува без прекин.
„Многу добро ја знаете нашата позиција. Ние се залагаме за тоа Белорусите сами, без никакво мешање и преку мирен дијалог, да најдат решение, да најдат заедничка основа за тоа како да градат или да работат во иднина. Знаеме за вашиот предлог да почнеме со работа на уставот, сметаме дека има смисла“, рече Путин осврнувајќи се на понудата на Лукашенко за реформа на уставот како одговор на антивладините протести.
Лукашенко е единствениот претседател во историјата на Белорусија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Мал авион се сруши на пат во Италија – загинаа две лица

Тешка авионска несреќа се случила вчера во италијанската покраина Бреша, кога ултра лесен авион се срушил во местото Ацано Мела, близу сообраќајниот јазол Корда Моле, кој ги поврзува автопатите А4 и А21. Двете лица кои биле во авионот починале на лице место, пренесе RaiNews.
Авионот полетал од Пјаченца, а по неколку часа властите ги идентификувале жртвите – се работи за 75-годишен маж од Милано и неговата 60-годишна партнерка.
✈️🔥 A plane crashed onto a busy highway in Italy — several cars passed through a wall of fire
According to Brescia Today, the cause of the crash remains unknown.
On board were a 75-year-old man and a 60-year-old woman. They both died. pic.twitter.com/65JdtqyS0D
— NEXTA (@nexta_tv) July 23, 2025
Во несреќата индиректно учествувале и двајца возачи на автомобили. При падот, авионот се запалил, а автомобилите во тој момент поминувале низ местото на несреќата и минале низ пламенот.
Снимка од падот на авионот се прошири на социјалните мрежи.
Еден од возачите, 56-годишен маж, бил пренесен во болницата Полиамбуланца во Бреша како мерка на претпазливост, иако немал видливи повреди. Другиот возач, стар 49 години, бил прегледан на лице место и не било потребно да биде хоспитализиран.
Јавното обвинителство во Бреша побарало помош од воздушната полиција од Милано за да се утврдат сите околности околу падот. Истрагата е во тек и има за цел да ги разјасни причините и динамиката на оваа трагична несреќа.
Свет
Русија и Украина почнаа мировни преговори во Истанбул – Кремљ: Ќе бидат тешки

Русија и Украина денеска ја почнаа третата рунда директни мировни преговори во Истанбул, јавува руската новинска агенција ТАСС.
Делегациите на двете земји веќе пристигнаа во главниот град на Турција, но и двете страни предупредуваат дека разговорите нема да бидат лесни.
Од Кремљ порачаа дека процесот ќе биде сложен, а украинскиот претседател Володимир Зеленски изјави дека неговите очекувања не се високи, бидејќи разговорите за прекин на огнот не се на дневен ред.
Според Зеленски, денешната средба треба да се фокусира на теми како враќањето на украинските воени заробеници и децата кои, како што тврди Киев, биле одведени од Русија. Покрај тоа, ќе се разговара и за можноста за организирање лидерска средба на претседателско ниво.
Претходните две рунди преговори, одржани во Истанбул на 16 мај и 2 јуни, не донесоа напредок во однос на прекин на огнот. Единствен резултат од тие средби беше договор за размена на заробеници и враќање на телата на загинатите војници.
Мировниот процес, според дипломатски извори, бил поттикнат и од американскиот претседател Доналд Трамп, кој неодамна јавно го критикуваше Кремљ за недоволен ангажман околу прекинување на војната, најавувајќи и нови санкции доколку нема резултати.
Украина бара итен и безусловен прекин на огнот како основа за натамошни разговори. Русија, пак, и натаму стои на своите барања – вклучувајќи целосно повлекување на украинските сили од источните територии што Москва ги анектираше.
Руската делегација повторно ја предводи претседателскиот советник и поранешен министер за култура, Владимир Медински. Од украинска страна, делегацијата ја води поранешниот министер за одбрана Рустем Умеров, кој сега е на чело на Советот за национална безбедност и одбрана.
Свет
Страшни сведоштва од болница во Сирија: „Пукаа во пациентите додека спиеја“

Силите на сириската влада се обвинети за масакр во болница во јужната провинција Суеида, за време на судирите што почнаа пред нешто повеќе од една недела. Новинар на „Би-би-си“ ја посети Националната болница во Суеида, каде што медицинскиот персонал тврди дека војници ладнокрвно убивале пациенти во болничките оддели.
„Тоа беше масакр“, изјави д-р Висам Масуд, неврохирург во болницата.
„Војниците дојдоа со тврдење дека носат мир, а убија десетици пациенти, од најмлади до најстари.“ Докторот споделил и снимка што наводно го прикажува моментот по нападот – на видеото се гледа жена која се движи низ болницата, додека на подот лежат тела на пациенти, завиткани во крвави чаршафи.
Сите – лекари, медицински сестри и волонтери – ја раскажуваат истата приказна. Тврдат дека минатата среда навечер, владините сили на Сирија насилно влегле во болницата, насочени кон верската заедница на Друзите, и таму извршиле масовни убиства.
„Кој е нивниот грев? Само тоа што се малцинство во демократска земја?“, прашува волонтерката Кинес Абу Мотаб.
„Тие се криминалци. Тие се чудовишта. Немаме ни трошка доверба во нив“, рече Осама Малак, наставник по англиски, пред влезот на болницата.
„Му пукаа во глава на осумгодишно дете со инвалидитет. Болниците според меѓународното право треба да бидат заштитени, но тие не поштедија никого – влегоа и почнаа да пукаат на сите. Пукаа во луѓе додека спиеја во креветите.“
Сите вклучени страни во овој конфликт се обвинети за злосторства – и бедуинските и друзиските борци, како и сиријската армија. Се зборува за убиства на цивили и егзекуции без судење. Сѐ уште нема независно потврдена слика за тоа што точно се случило во болницата. Неформални проценки велат дека бројот на загинати минатата среда надминува 300, но овие бројки засега не се официјално потврдени.
Сириското Министерство за одбрана објави дека е запознаено со извештаите за „шокантни прекршувања“ од страна на лица во воени униформи во Суеида. Министерот за управување со катастрофи, Раед Салех, изјави дека сите обвинувања за злосторства ќе бидат темелно истражени.
Пристапот до Суеида е строго ограничен, што го отежнува прибирањето директни докази. Градот е речиси под опсада, со тоа што владините сили го контролираат влезот и излезот. Новинарската екипа на „Би-би-си“ морала да помине бројни контролни пунктови. На влезот во градот, сведочеле за уништени продавници и згради, како и автомобили здробени од тенкови – доказ за жестоки борби меѓу друзиските и бедуинските борци.
Иако владините сили повторно презедоа контрола над неколку друзиски села, самиот град Суеида, со над 70.000 жители, и натаму останува под целосна контрола на Друзите.