Свет
Пoевтино е пандемиите да се спречат отколку да се лекуваат, научниците велат да јадеме помалку месо
Превентивните мерки во борбата против пандемиите може да бидат 100 пати поевтини отколку справувањето со нивните смртоносни ефекти потоа.
На светот му треба нов пристап за спречување на идни пандемии кои можат да убијат милиони луѓе, се вели во извештајот на Меѓувладината платформа за научна политика за биодиверзитет и услуги на екосистемот (ИПБЕС), организација основана од Обединетите нации за заштита на природниот свет.
Во извештајот се наведува дека контактот меѓу луѓето, дивиот свет и домашниот добиток мора да се ограничи за да се намали ризикот од преминување на бактерии и вируси од животни на луѓе. Луѓето кои живеат близу до животни и во области со висок ризик мора да бидат обезбедени со редовна здравствена заштита. Тоа ќе помогне да се запре епидемијата на болести пред тие да добијат можност да се шират уште повеќе.
Потребни се заеднички пристапи, се вели во извештајот, за превенцијата од пандемија да стане вообичаена во целиот свет. Би било сто пати поевтино да се спречат епидемиите отколку да се трпат нивните мрачни последици, тврдат авторите.
Во извештајот се повикуваат луѓето да престанат со навлегувањето во диви територии и да јадат помалку месо, бидејќи месната индустрија поттикнува контакт меѓу луѓето и новите патогени.

Извештајот предупредува дека 70 проценти од новите болести како што се ебола и зика и речиси сите познати патогени со пандемски потенцијал, како што се грип, ХИВ и новиот коронавирус, потекнуваат од животни. Извештајот проценува дека цицачите и птиците носат повеќе од милион неоткриени вируси.
„Пандемиите стануваат сè почести. Без превентивни стратегии, тие ќе се појавуваат почесто, побрзо ќе се шират, ќе убиваат повеќе луѓе и ќе влијаат на глобалната економија со потешки последици“, се вели во извештајот.
Исто така во извештајот се критикуваат тековните стратегии кои се потпираат на реакцијата на болести со нови вакцини откако ќе се појават тие болести.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелскиот амбасадор во ОН до специјалната известувачка: „Вие сте вештерка, се обидувате да нѐ проколнете“
Седницата на Третиот комитет на Генералното собрание на Обединетите нации се вжешти откако израелскиот амбасадор во ОН, Дани Данон, остро ја нападна специјалната известувачка Франческа Албанезе поради нејзиниот извештај во кој Израел се обвинува за кршење на човековите права и за меѓународната поддршка што ја добива.
„Госпоѓо Албанезе, секојпат кога се обидувате да го проколнете Израел со лаги и клевети, вашите клетви не успеваат. Вие сте вештерка, а овој извештај е уште една страница во вашата книга на волшепства“, изјави Данон обраќајќи ѝ се преку видео-врска.
Албанезе не можеше лично да присуствува на седницата, бидејќи САД ѝ воведоа санкции и ѝ ја укинаа визата во јули, со образложение дека вршела „нелегитимен притисок врз Меѓународниот кривичен суд“ за постапки против американски и израелски функционери.
Во најновиот извештај, Албанезе остро го критикува Израел, но и обвинува повеќе држави — меѓу нив САД, Велика Британија, Германија и Унгарија — дека се соучесници поради дипломатска или воена поддршка на Израел.
Канада, Австралија и Нов Зеланд се обвинети дека ги „ослабуваат“ резолуциите на ОН што го критикуваат Израел, додека Франција, Италија, Хрватска и Грција се спомнати затоа што му дозволиле на премиерот Бенјамин Нетанјаху да користи нивен воздушен простор и покрај налогот за апсење од Меѓународниот кривичен суд.
Извештајот ги споменува и неколку арапски и муслимански земји, меѓу кои Египет, Јордан, Катар, Саудиска Арабија, Турција, Индонезија, Пакистан и ОАЕ, поради поддршка на мировниот план на Доналд Трамп, кој, според Албанезе, „олеснува нов облик на окупација“.
Свет
Кралот Чарлс му ги одзема титулите на принц Ендру и го сели од кралската резиденција
Британскиот крал Чарлс официјално покрена постапка за одземање на сите титули и почести на принцот Ендру, како и негово селење од резиденцијата „Ројал лоџ“, јави Си-Ен-Ен.
Одлуката уследи по нови реакции во јавноста поради поврзаноста на Ендру со осудениот сексуален преступник Џефри Епштајн и објавувањето на мемоарите на Џуфре, која го обвини принцот за сексуално злоставување додека била тинејџерка, обвинение што тој го негира.
Во соопштение на Бакингемската палата се наведува дека „Неговото Височество денес започна формална постапка за одземање на стилот, титулите и почестите на принц Ендру“ и дека тој отсега ќе биде познат како Ендру Маунтбатен Виндзор.
Палатата потврди дека Ендру ќе мора да се исели од резиденцијаа и да се пресели во приватен престој, додека неговите ќерки, принцезите Евгенија и Беатрис, ги задржуваат своите титули.
Во изјавата се нагласува дека „кралското семејство останува со мислите и најдлабокото сочувство со жртвите и преживеаните на сите облици на злоупотреба“.
Јавноста со остри реакции го коментира случајот, особено по откритијата дека Ендру за резиденцијата платил симболичен износ и плаќал минимална кирија, иако од 2019 година не е активен член на кралското семејство.
Свет
Саграда Фамилија официјално стана највисока црква во светот
Познатата барселонска базилика Саграда Фамилија од денес е и официјално највисоката црква во светот, откако беше поставен новиот дел од централната кула, пренесе „Гардијан“.
Делото на Антонио Гауди сега се издига на 162,91 метар, со што ја надмина катедралата во германскиот Улм, висока 161,53 метра. Во следните месеци се очекува кулата на Исус Христос да ја достигне својата крајна висина од 172 метра.
Темелите на базиликата се поставени во 1882 година, а Гауди починал пред да го види проектот завршен.
Последните децении работите се забрзани благодарение на милионите туристи што ја посетуваат црквата; минатата година ја разгледале 4,9 милиони луѓе, а приходите од билетите целосно се користат за финансирање на изградбата.
Комплетното завршување на Саграда Фамилија се очекува околу 2035 година, а 2026 ќе се одбележи 100-годишнината од смртта на Гауди со низа културни настани.

