Свет
Разузнавачките служби: Целите на Путин се променија

Нови разузнавачки информации споделени од американски и западни претставници сугерираат дека рускиот претседател Владимир Путин го префрлил својот непосреден фокус во војната против Украина на краткорочни цели. Ова е првенствено за да се консолидира контролата врз територијата што руските сили веќе ја зазедоа и да се зајакне руската економија, која се бори со сериозни тешкотии, изјавија за Си-ен-ен повеќе извори запознаени со содржината на разузнавачките извештаи.
Ова претставува пресврт од претходните процени на американските и на западните разузнавачки служби, кои сугерираа дека Путин верува оти ситуацијата на бојното поле е во негова корист, односно дека има и момент и човечка сила за долготрајна војна против ослабената Украина, со цел да ја освои целата земја.
Перцепцијата дека Путин можеби се предомислил се совпаѓа со верувањето на американскиот претседател Доналд Трамп и неговите преговарачи дека рускиот претседател сега можеби е поподготвен да разгледа мировен договор отколку порано, изјавија за Си-ен-ен два американски извора запознаени со разговорите.
Но, високи американски претставници остануваат скептични кон тврдењата на Путин за време на преговорите дека сака мировен договор, иако предлогот на САД е во голема мера во корист на Русија и вклучува признавање на поголемиот дел од територијата што ја зазеде.
Општо е прифатено дека дури и ако Москва се согласи со сегашната верзија на договорот, подоцна може да се обиде да ја обнови војната и да заземе повеќе украинска територија.
„Мислам дека сега размислува, не би рекол поскромно, но во однос на поразумни, поблиски цели“, рече еден висок западен разузнавачки службеник.
Притисокот од администрацијата на Трамп, која сè повеќе се заканува со дополнителни санкции, и руската економска криза би можеле да го доведат Путин во тешка позиција. Во исто време преговорите силно ја нагласуваат можноста за големи американско-руски инвестиции доколку војната заврши, што САД го опишуваат како историска можност.
„Сè зависи од тоа што САД ќе донесат на маса, така што не само што ќе ја прикажат победата дома, туку и навистина ќе почувствуваат дека постигнале нешто доволно големо за да оправдаат значајна пауза, а можеби и еден ден повторно да го почнат конфликтот“, рече истиот висок разузнавачки функционер, пренесува медиумотг.
Изворот истакна дека Путин често ги споменува регионите од кои потекнува рускиот народ.
Висок европски функционер се согласува дека Москва во моментот е подготвена да ја игра играта и привремено да ги ограничи своите цели со цел да ги подобри односите со Вашингтон, но предупреди: „Јасно е дека тие не се откажале од своите максималистички воени цели“.
„Кремљ се надева дека подобрите односи ќе го одвлечат вниманието од војната по тактичка пауза и дека потоа ќе може да ги постигне целите на Путин преку комбинација од воена сила, економски притисок, информативна пропаганда и политичко влијание – не само во Украина туку и пошироко“, рече истиот европски функционер.
Порано оваа година американските разузнавачки служби ги предупредија сегашните советници на Трамп дека контролата врз Украина останува главен приоритет на Путин, веднаш по опстанокот на неговиот сопствен режим. Тие исто така предупредија дека рускиот лидер ќе се обиде да го искористи секој знак дека новата администрација брза кон преговори, изјави извор запознаен со разговорите.
„Путин се предомисли бидејќи верува дека од другата страна е американски претседател кој не знае што прави и кој е фокусиран на брзи победи“, рече демократскиот конгресмен Џејсон Кроу, член на Комитетот за разузнавање на Претставничкиот дом.
„Путин верува дека може да се постигне договор, кој, едноставно, нема да се спроведе“, додаде Кроу.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Европската комисија и’ се закани на Унгарија со мерки ако донесе закон против невладините организации

Европската комисија се закани со мерки против Унгарија доколку владата на премиерот Виктор Орбан усвои контроверзен закон со кој се ограничува работата на невладините организации (НВО).
Воведувањето закон за „транспарентност во јавниот живот“ би наметнало строги регулативи за невладините организации финансирани од странство кои се сметаат за ризик за суверенитетот на Унгарија.
Нацрт-законот, поднесен до унгарскиот парламент од конзервативната националистичка партија Фидес на Орбан, според Комисијата е сериозно кршење на правата на ЕУ. Извршното тело на Европската унија повика на повлекување на нацртот од законодавниот процес.
Доколку законот биде усвоен според очекувањата, Комисијата на чело со претседателката на Европската комисија, Урсула фон дер Лајен, најави дека нема да се двоуми да ги преземе неопходните мерки.
Комисијата може да покрене посебни постапки за такви случаи на прекршување, што ќе резултира со високи казни за земјите-членки кои не се во согласност со правото на ЕУ.
Нацрт-законот дозволува невладините организации финансирани од странство кои можат да влијаат на јавното мислење да бидат ставени на црната листа. Тие организации потоа можат да добијат материјална поддршка од странство само со одобрение од даночната управа на земјата во која работат. Ако една невладина организација се финансира со други средства, мора да плати 25 пати поголема сума на државата како казна, во спротивно ќе биде распуштена и забранета.
Свет
Жената која избоде 18 лица во Хамбург ќе биде сместена во психијатриска установа

Судија нареди 39-годишната жена осомничена за напад со нож на главната железничка станица во Хамбург да биде предадена на психијатриска установа, соопшти полицијата во саботата. Во напад со нож во петокот беа повредени 18 лица во овој северен германски град.
Осомничената, која набрзо по инцидентот е приведена, доби кривична пријава за обид за убиство на 15 лица со тешки телесни повреди. Според претходните полициски извештаи, нападот не бил политички мотивиран.
„Напротив, постојат многу јасни индиции дека осомничената е ментално болна“, соопшти полицијата.
Осумнаесет повредени се на возраст од 19 до 85 години. Три жени на возраст од 24, 52 и 85 години, како и еден 24-годишен маж се пренесени во болница со повреди опасни по живот. Полицијата во саботата соопшти дека сите се стабилни. Седум други лица се тешко повредени, а седум се здобиле со полесни повреди.
Нападот бил прекинат благодарение на храбрата интервенција на двајца случајни минувачи.
Свет
Голем прекин на струјата во Кан во екот на филмскиот фестивал

Голем прекин на струја во јужниот француски град Кан го наруши последниот викенд на меѓународниот филмски фестивал. Околу 160.000 домови во крајбрежното одморалиште и соседните општини беа погодени од прекин на електричната енергија од околу 10 часот во саботата по ноќниот пожар во електраната, објави операторот на електроенергетската мрежа РТЕ на „Икс“.
Се претпоставува дека пожарот во општина Танерон бил намерно предизвикан, изјави портпаролката на полицијата. Сепак, таа не можеше да каже дали има поврзаност меѓу инцидентот и филмскиот фестивал.
Фестивалската палата има свое независно напојување со електрична енергија, па фестивалската програма генерално продолжи нормално. Сепак, проекциите на филмови во Синеум, мултиплекс кино лоцирано надвор од центарот на градот, беа прекинати.
Доделувањето на наградите на филмскиот фестивал ќе се одржи според планираното во сабота навечер, соопштија организаторите. Тимови од РТЕ и добавувачот Енедис работат на обновување на мрежата. Француските медиуми, повикувајќи се на РТЕ, наведуваат дека се уште не се знае кога ќе завршат работите.
Филмскиот фестивал во Кан се смета за најважниот филмски фестивал во светот, заедно со филмскиот фестивал во Венеција. Оваа година за главната награда „Златна палма“ се натпреваруваат 22 филма.