Германскиот парламент денеска и покрај силното противење на канцеларот Олаф Шолц, го усвои предлогот на опозициските демохристијани за миграција и азил.

Предлогот беше усвоен со помош на гласовите на десничарската Алтернатива за Германија, при што 348 пратеници гласаа за, 345 против и 10 воздржани.

Овој предлог не е правно обврзувачки за владата, но ќе го зголеми притисокот да се преземе акција за миграцијата, пишува лондонски Гардијан, наведувајќи дека ова гласање ќе му покаже на опозицискиот лидер на ЦДУ/ЦСУ, Фридрих Мерц, дека постои парламентарно мнозинство кое би можело да ја принуди Владата да прифати соодветни решенија во оваа област.

Предлогот содржи пет точки и ја повикува владата повторно да воведе постојани гранични контроли, да ги блокира „сите обиди за илегален влез во земјата со де факто забрана“ за сите оние кои се обидуваат да влезат во Германија без валидни документи, дури и ако бараат заштита или азил.

Оваа одлука дава приоритет на апсења и депортации на луѓе кои законски се обврзани да ја напуштат земјата, доделува повеќе ресурси за спроведување на регулативите за миграција на државно ниво и ги заострува ограничувањата за престојот на оние кои чекаат да ја напуштат Германија.

Предвремените парламентарни избори во Германија се одржуваат на 23 февруари, откако во декември канцеларот Шолц загуби доверба.

НАСА потврди дека ќе соработува со компанијата „SpaceX“ во сопственост на американскиот милијардер Илон Маск за враќањето на двајцата нејзини астронаути од Меѓународната вселенска станица (ISS) на земјата, нагласувајќи дека тоа ќе се направи што е можно поскоро.

Претходно, американскиот претседател Доналд Трамп објави дека побарал од Маск и неговата компанија да помогнат во враќањето на двајца астронаути од ISS, пренесува Ројтерс.

„Ги замолив Илон Маск и SpaceX да ги донесат двајцата храбри астронаути кои беа практично напуштени во вселената од администрацијата на поранешниот американски претседател Џозеф Бајден. Илон ќе замине наскоро. Се надевам дека сè ќе биде безбедно. Со среќа“, напиша Трамп социјалната мрежа Truth Social, додека Маск потврди дека добил такво барање од Трамп.

Астронаутите на НАСА, Буч Вилмор и Сани Вилијамс, требаше да се вратат во капсулата SpaceX во август.

Тие двајца минатото лето со вселенското летало Боинг Старлајнер летаа до ISS, но наместо планираните осум дена, нивната мисија беше продолжена на речиси една година поради проблеми со системот на леталото, така што двајцата вршат научно истражување.

НАСА соопшти дека тие се во добра здравствена состојба.

Засега не се познати сите детали за тоа кога точно ќе се вратат астронаутите, пренесува Танјуг.

Претседателот на Србија, Александар Вучиќ донесе одлука за помилување на 13 лица, меѓу кои и деканката на Филозофскиот факултет во Ниш, Наталија Јовановиќ. Таа наведува дека против неа нема кривична постапка, вели дека не знае за што е помилувана и дека претседателот со неговиот гест се обидува да добие наклоност, пишуваат српските медиуми.

Вучиќ пред неколку дена најави дека ќе донесе одлука за помилување на лицата кои беа уапсени или приведени за време на студентските протести, што подразбира изземање од кривично гонење. Одлуките за помилување беа донесени денеска, а покрај шестмина ученици, еден доцент, четворица директори на училишта и еден помошен работник во училиштето, помилувана е и деканката на Филозофскиот факултет Наталија Јовановиќ.

Јовановиќ не знае за кое дело е изземена од гонење.

„Измислува процес, нема обвинение, нема судење, не сум кривично гонета – ме помилува. Стигнавме до крајот. Се плаши за себе и мисли дека со помилување може да стекне некаква услуга. Никој што го прекршува законот не може да ја добие мојата наклонетост. Неговиот гест веројатно се должи на тоа што сум во јавноста, за да ми фрли некаква дамка“, изјавила Јовановиќ, пренесува „Јужни вести“.

Неколку месеци претходно, Обвинителството за организиран криминал покрена истрага против Наталија Јовановиќ со проширување на истрагата за случајот на поранешниот државен секретар во Министерството за образование, Небојша Ранѓеловиќ Нечер. Јовановиќ смета дека помилувањето се однесува на тој случај, но нагласува дека таа е само осомничена.

„Претпоставувам дека помилувањето се однесува на тоа затоа што во мојот живот бев во суд само за оставинското рочиште и за рочиштето на 29 ноември поради продолжување на тоа обвинение. Против мене не беше покренато обвинение, бев осомничена, не кривично гонета, за што сега ме помилува“, вели Наталија Јовановиќ.

Според тамошните медиуми, решенијата за помилување се доставени до Министерството за правда за да се спроведат понатамошни постапки.