Марва, ученичка која го посетува училиштето за возрасни во Шведска, каде се случи нападот, ги опиша првите моменти по пукањето.

„Младиот човек до мене беше застрелан во рамото. Обилно крвареше. Кога погледнав зад мене, видов тројца луѓе на подот како крварат. Сите беа во шок, велеа ‘Бегај надвор’. Јас и мојот пријател се обидовме да спасиме живот на една личност. Луѓето беа многу вознемирени. Полицијата не беше на местото на настанот, ниту пак брзата помош, па моравме да помогнеме“, објасни таа.

„Го земав шалот на мојот пријател и цврсто го врзав околу рамото на ранетиот млад човек за да не крвари толку многу“, нагласи таа.

Полицијата преетходно потврди дека смртно настрадале околу 10 лица, а убиен е и напаѓачот. Засега нема информации за мотивите за нападот.

Рускиот претседател Владимир Путин одлучи да организира алтернатива на музичкиот натпревар за Евровизија во Русија, кој ќе се вика Интервизија.

Оваа одлука е донесена откако Русија доби забрана за учество на Евровизија од 2022 година поради нападот на Украина, пишува британски Гардијан.

Путин потпиша декрет за започнување на натпреварот Интервизија, кој ќе се одржи во Москва оваа есен, со цел да се развие меѓународната културна и хуманитарна соработка.

Претставникот на рускиот претседател Михаил Швидкој рече дека речиси 20 земји го потврдиле своето учество, вклучувајќи ги Бразил, Куба, Индија, Кина и други пријателски земји.

Оригиналниот натпревар Интервизија беше лансиран за време на поранешниот советски лидер Леонид Брежњев и се одржуваше спорадично од 1960 до 1980 година како одговор на Источниот блок на Евровизија.

Русија првпат се натпреваруваше на Евровизија во 1994 година, само неколку години по распадот на Советскиот Сојуз.

Руската сенаторка Лилија Гумерова изјави за локалните медиуми дека Интервизијата ќе биде шанса да се промовира вистинска музика, а не лажни вредности кои немаат врска со нормални луѓе, осудувајќи ја Евровизија за изведувачи како Кончита Вурст.

Според руските документи за принципите на натпреварот, кои Ројтерс ги видел, изведувачите се повикани да ги почитуваат традиционалните, универзални духовни и семејни вредности.

Во интервју во ноември минатата година, Путин рече дека лично разговарал за идејата за организирање алтернатива на Евровизија со кинескиот претседател Си Џинпинг, додавајќи дека Кина ја поддржува иницијативата.

Како што пренесува „Гардијан“, прославениот руски режисер Никита Михалков, исто така, ја повикал Москва да ги организира Евроазиските филмски награди како еквивалент на Оскарите.

Британско-американскиот автор Нил Гејман и неговата сопруга се тужени од жена од Нов Зеланд која бара милиони долари за наводна сексуална злоупотреба и трговија со луѓе додека работела кај нив како дадилка, се вели во три тужби поднесени вчера.

Скарлет Павлович рече дека Гејман повеќепати ја силувал додека работела за него и Аманда Палмер во 2022 година, предизвикувајќи физичка, ментална и емоционална штета.

Според судските документи, Палмер е обвинета дека знаела дека Павлович е ранлива и дека не ја предупредила за предаторското однесување на Гејман.

Гејман негираше по медиумските извештаи за наводите.

„Никогаш не сум се впуштил во неконсензуална сексуална активност со никого. Никогаш“, напиша тој.

Во тужбите се бара неодредена отштета, за која силно се верува дека надминува 1 милион долари.

По бездомништвото во новозеландскиот град Окленд, Павлович се согласила да биде дадилка на детето на еден пар во потрага по пари и сместување.

Наскоро, Гејман почнал сексуално да ја злоставува, што вклучувало силување, давење и напад во присуство на дете, според судските документи.

Злоставувањето наводно продолжило неколку недели, додека Гејман и неговото дете не заминале во Европа.

Павлович тврди дека Палмер и кажала дека повеќе од десетина жени, вклучително и неколку поранешни вработени, и се пожалиле за насилни сексуални односи со Гејман.

Обвинувањата за недолично однесување против Гејман почнаа да се појавуваат минатата година, а Dark Horse Comics минатиот месец објави дека повеќе нема да ги објавува неговите дела.

Стриповите и романите на Гејман ги вклучуваат Coraline, The Graveyard Book, Good Omens и How to Talk to Girls at Partys.