Свет
Регион во Италија привремено го запре имунизирањето со вакцината на „Астра зенека“

Италијанскиот регион на северот на државата Пиемонт денес објави дека привремено ја прекинува вакцинацијата со вакцината на „Астра зенека“ откога учител од провинцијата Биела починал по примањето на вакцината во саботата, пренесува „Ројтерс“.
„Одлуката е донесена како мерка на претпазливост, а регионот ги чека резултатите од проверките за да се утврди која група на вакцини е употребена и дали смртта е поврзана со вакцинацијата“, соопшти регионалната влада.
Шефот на регионалната здравствена служба, Луѓи Икарди, рече дека тоа е сторено од претпазливост сè додека не се провери дали постои поврзаност и дека досега немало никакви проблеми со примената на вакцината на „Астра зенека“.
Италијанската агенција за лекови (АИФА) забрани употреба на една серија вакцини на „Астра зенека“ во четвртокот, потсетува британската агенција, повикувајќи се на тврдења на свои извори дека одлуката следувала по смртта на двајца мажи на Сицилија.
Агенцијата ја објасни одлуката како мерка на претпазливост наведувајќи дека врската помеѓу вакцината и несаканите ефекти не е потврдена.
Неколку европски земји, вклучувајќи ги Данска, Норвешка, Исланд и Ирска, престанаа да вакцинираат со вакцината на „Астра зенека“ поради проблеми со коагулацијата на крвта, а Австрија минатата недела престана да користи одредена серија вакцини од истиот производител додека истражуваше смрт предизвикана од згрутчување на крвта.
Европската агенција за лекови тврди дека нема индикации за поврзаност на смртните случаи со вакцината, а Светската здравствена организација го повтори ова во петокот.
Во меѓувреме, „Астра зенека“ соопшти дека нивната вакцина не предизвикува згрутчување на крвта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нова средба меѓу Русија и Америка

Руска делегација пристигна во Истанбул на преговори со американски претставници. Ова е втора средба во живо меѓу американски и руски претставници откога рускиот претседател Владимир Путин нареди целосна инвазија на Украина пред три години. Првата се одржа неодамна во Ријад, без учество на претставници на Украина и ЕУ, што предизвика гласни критики од двете страни.
Како што јави Би-би-си, целта на средбата во Истанбул е да се решат несогласувањата во врска со работата на нивните амбасади во Вашингтон и Москва. Оваа средба доаѓа откога турскиот министер за надворешни работи, Хакан Фидан, изјави дека Турција ќе одигра важна улога во завршувањето на војната во Украина.
Од почетокот на руската целосна инвазија на Украина во 2022 година Турција се обидува да ја преземе улогата на посредник одржувајќи блиски врски со двете страни – Украина и Русија.
Свет
Трите најголеми австриски центристички партии се договорија за владејачка коалиција

Трите најголеми австриски центристички партии во парламентот постигнаа договор за формирање коалициска влада без крајнодесничарската Партија на слободата (ФПО) и планираат да го претстават подоцна денеска, пет месеци откако ФПО победи на последните парламентарни избори.
Конзервативната Народна партија (ОВП), Социјалдемократите (СПО) и либералниот Неос соопштија дека нивната заедничка владина програма ќе ја објават на прес-конференција.
Лидерите на трите партии веќе изразија уверување во саботата за постигнување договор за формирање коалициска влада без десничарските популисти. Со овој договор Австрија би добила влада по најдолгиот период на чекање од Втората светска војна.
Партијата на слободата (ФПО) победи на парламентарните избори во септември со околу 29 отсто од гласовите, но во јануари доби мандат од претседателот да формира коалициска влада, откако првиот обид на ОВП, СЈО и Неос не успеа.
Обидите за формирање на оваа трипартиска коалиција беа обновени откако и обидот на ФПО пропадна.
Европа
Шест деца уапсени откога беше застрелан 11-годишник во Ротердам: неговата состојба сè уште е сериозна

Полицијата во холандскиот град Ротердам оваа недела уапси шест малолетници откога 11-годишно момче беше пронајдено застрелано и во критична состојба во стан. Малолетниците се осомничени за обид за убиство, соопшти вчера холандската полиција, а пренесува „Телеграф“.
Според холандските медиуми, апсењата се извршени во последните три дена, а осомничени се момчиња на возраст од 12, 13 и 15 години од Ротердам, 14-годишно девојче од Ротердам, 14-годишно момче од Марсберген и 16-годишно момче од Еншеде.
По истрагата, малолетниците станале осомничени, а некои од нив ѝ се предале на полицијата, пишува „Телеграф“. Како што се дознава, полицијата не ја исклучува можноста за дополнителни апсења. Освен тоа, тие се осомничени и за поседување огнено оружје и муниција. „Секој осомничен е испрашуван поединечно за неговата улога во овој инцидент“, соопшти полицијата.
Сите малолетници што беа уапсени се во притвор и денеска и утре ќе бидат изведени пред истражен судија во Ротердам, кој ќе одлучи дали ќе им го продолжи притворот. Веднаш по инцидентот, полицијата пронашла огнено оружје на тревната површина во близина на станбената зграда, пренесува „Телеграф“.
Момчето морало да биде реанимирано и однесено во болница во критична состојба. Што точно се случило на местото на злосторството сè уште е нејасно, но полицијата утврдила дека 11-годишното момче било застрелано. Неговата состојба сè уште е сериозна.