Европа
Републикански сенатор: Зеленски не е диктатор, Путин е вистинскиот диктатор

Истакнатиот републикански сенатор и долгогодишен сојузник на Трамп, Линдзи Греам, рече дека се согласува со американскиот претседател дека Украина треба да одржи избори, но инсистира дека тие не треба да се одржат пред да се договори прекин на огнот со Русија.
Во изминатите 24 часа, Трамп го нарече својот украински колега Володимир Зеленски диктатор и „ужасен лидер“, сугерирајќи дека Украина треба да одржи избори за време на војната.
Зборувајќи со американскиот новинар Џејмс Метју, Линдзи Греам рече дека разговарал со Зеленски и не се согласува со критиките на Трамп кон украинскиот лидер.
„Не го сметам Зеленски за диктатор, но ни требаат избори“, рече тој. „Но, тоа мора да биде по прекинот на огнот. Јас сум практичен човек“.
„Знаете, Путин е вистински диктатор. Она што треба да направите е да најдете заклучок за војната што нема да доведе до трета инвазија“.
„Нема да има договор без консултација со Украина, бидејќи тоа нема да функционира“, додаде тој.
„Разговарав со Зеленски денеска. Никој нема да направи нешто во што вие не сте вклучени“, рече Греам, мислејќи на Украинците.
„Но, да разговарате одделно со Русите, немам проблем со тоа. Потоа вратете се во Украина, видете што мислат и продолжете да работите“.
„Мислам дека има една личност од која Путин навистина се плаши, а тоа е Трамп. И ако некогаш постигнете добар договор за Украина, тоа ќе биде затоа што Трамп создаде чувство на страв во Русија“.
Зеленски му се заблагодари на Греам за Икс по нивниот разговор, велејќи дека ја цени „двопартиската поддршка на американскиот Конгрес за украинскиот народ во нивната борба против руската агресија“.
I spoke with U.S. Senator @LindseyGrahamSC . We greatly appreciate the bicameral and bipartisan support of the US Congress to the Ukrainian people in our fight against the Russian aggression.
As always, Senator Graham is constructive and doing a lot to help bring peace closer.…
— Volodymyr Zelenskyy / Володимир Зеленський (@ZelenskyyUa) February 19, 2025
„Како и секогаш, сенаторот Греам е конструктивен и прави многу за да помогне да се доближи мирот“, рече тој.
„Многу е важно безбедносните гаранции да останат на маса – и тие да работат за Украина, за вистински и траен мир“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.