Украинскиот претседател Володимир Зеленски утрово ја обвини Русија дека продолжува со нападите во текот на ноќта и покрај едностраното прогласување на прекин на огнот за велигденските празници.

„Генерално, на Велигденското утро можеме да кажеме дека руската војска се обидува да создаде општ впечаток за прекин на огнот, додека во некои области продолжува да се обидува да напредува на теренот и да нанесува загуби на Украина“, напиша Зеленски на X, цитирајќи информации од врховниот командант Олександр Сирски.

Зеленски наведува дека биле забележани 387 случаи на гранатирање и 19 напади на руските сили, а тие користеле беспилотни летала 290 пати.

„Нашите борци одговараат на непријателот на заслужен начин, врз основа на секоја борбена ситуација. Украина ќе продолжи да дејствува асиметрично“, додаде Зеленски во објавата на социјалната мрежа.

Рускиот претседател Владимир Путин им нареди на своите сили да ги прекинат нападите од 18 часот. Московско време во сабота до крајот на неделата. Католичките и православните верници годинава го слават Велигден на ист ден, што не е секогаш случај бидејќи Католичката црква го користи Грегоријанскиот, а Православната црква Јулијанскиот календар.

Зеленски и другите украински официјални лица беа скептични за краткорочниот прекин на огнот што Путин го објави во последен момент во саботата. Потоа на сите руски борци на украинските фронтови им го честита Велигден.

Во неделата Зеленски го повтори својот предлог за продолжување на прекинот на огнот за 30 дена за „да му се даде шанса на мирот“.

„Ќе дејствуваме во согласност со ситуацијата на теренот“, рече тој.

Руското Министерство за одбрана во саботата соопшти дека сите руски сили ќе го почитуваат прекинот на огнот под услов и украинската страна да го почитува.

Пет лица се удавија, а две се водат за исчезнати откако огромни бранови погодија делови од Австралија на почетокот на велигденскиот викенд, јави денеска Би-би-си.

Во водата кај Татра во јужниот дел на Нов Јужен Велс денеска е пронајдено машко тело, а вчера маж (58) и уште двајца мажи беа пронајдени мртви во одвоени инциденти во таа австралиска држава.

Спасувачите трагаат по маж кој беше однесен во морето во близина на Сиднеј.

Жена се удави вчера, а маж исчезна откако нивната група беше однесена во морето од огромен бран во Сан Ремо, Викторија.

„Една од жените успеала да се врати на брегот, но другата жена и мажот не успеале“, соопшти полицијата на Викторија.

Викторијанската премиерка Џасинта Алан рече дека тоа означува „ужасен почеток“ на велигденскиот викенд.

„Моите мисли се со семејството на некој кој го загуби животот во такви трагични околности, и потенцијално уште потешки вести доаѓаат“, рече таа.

Американскиот потпретседател Џеј Ди Венс во рамки на својата посета на Рим оствари кратка средба со папата Франциск во папската резиденција Каза Санта Марта, објавија американските медиуми.

Според извештаите, средбата се одржала во период на затегнати односи меѓу Ватикан и администрацијата на американскиот претседател Доналд Трамп, пред сè поради контроверзните антиимиграциски мерки и драстичното намалување на меѓународната помош.

Венс, кој патува со своето семејство, се сретнал и со државниот секретар на Ватикан, кардиналот Пјетро Паролин, како и со ватиканскиот министер за надворешни работи, надбискупот Пол Галагер.

Од Светата столица соопштија дека средбите се одвивале во „срдечна атмосфера“ и дека биле разменети мислења за низа глобални теми – од миграциските политики и статусот на затворениците, до тековните меѓународни конфликти.

Ватикан изразил задоволство од „посветеноста на американската администрација за заштита на слободата на вероисповед и совест“, и покрај тоа што Папата Франциск неодамна јавно ги осуди плановите на Трамп за масовни депортации, нарекувајќи ги „срамни“.