Мал авион утрово по полетувањето од Загреб удрил во колиба лоцирана во областа Велика Планина во Словенија.

Авионот Mooney Ovation M20R изгубил контакт со контролата на летот околу 9:30 часот, по што почнал да се спушта во спирала од височина од 2.500 метри.

Околу 12:30 часот спасувачите пронашле делови од леталото кое удрило во кабина сопственост на Машинскиот факултет во Љубљана. Доцна попладнето пожарникарите соопштија дека целото летало се наоѓало во кабината, што полицијата се уште не го потврдува. Потрагата се уште трае, а пилотот се уште не е пронајден.

Пожарникарите од Противпожарната служба Камнишка Бистрица на Фејсбук објавија дека леталото ја „преполовило кабината“, а еден од нивните тимови ги пронашол крилото и тркалото на авионот во кабината. Откако ја прегледале околината, не нашле остатоци, па потрагата повторно ја насочиле кон кабината.

„Откривме и топол предмет со термална камера за кој претпоставувавме дека е моторот на авионот. Откако полицијата ја презеде координацијата на настанот, бидејќи нашата помош повеќе не беше потребна, пожарникарите на Противпожарната единица Камнишка Бистрица се вратија во седиштето, а потоа по договор со раководителот на интервенција го напуштивме местото за интервенција“, напишаа на Фејсбук.

Речиси илјада луѓе се евакуирани денеска во Гватемала откако вулканот Фуего повторно еруптираше, соопштија органите за цивилна заштита.

Лоциран на околу 35 километри југозападно од главниот град на Гватемала, вулкан се активираше, исфрлајќи лава, пепел и карпеста маса.

„Како мерка на претпазливост, започна евакуацијата на околу 125 семејства или околу 900 лица“, соопшти националната служба за управување со катастрофи.

Општинската зграда во градот Алотенанго ќе служи како привремено засолниште за евакуираните.

Властите прогласија состојба на готовност за да одржуваат „постојан контакт со градоначалниците и гувернерите“ на областите во близина на вулканот и „координираат превентивни акции“ во случај на ерупција, соопшти службата.

Владата, исто така, ја прекина наставата во училиштата во областа околу вулканот и го затвори патот што го поврзува југот на земјата со поранешната колонијална престолнина Антигва – главната туристичка дестинација на Гватемала и дел од светското наследство на УНЕСКО од 1979 година.

Русија верува дека обновувањето на односите со САД е долгорочна и тешка задача, но верува дека постои политичка волја за напредок од двете страни, соопшти Кремљ. Напорите на американскиот претседател Доналд Трамп да се зближи со рускиот претседател Владимир Путин ги вознемири Украина и европските сојузници.

„Ние сме на почетокот на патот кон обновувањето на нашите билатерални односи. Патот пред нас е прилично долг и тежок, но барем двајцата претседатели изразија политичка волја во таа насока“, истакна гласноговорникот на Кремљ, Димитриј Песков.

Песков рече дека е важно да се утврди дали Украина навистина сака мир или не. Украина утре во Саудиска Арабија треба да одржи дипломатски разговори со САД за завршување на војната со Русија.

Тоа ќе биде прва средба меѓу украински и американски претставници по катастрофалната посета на украинскиот претседател Володимир Зеленски на Белата куќа на крајот на февруари кога се судри со Доналд Трамп, анализираат медиумите.

Зеленски во понеделникот рече дека е подготвен да седне на преговарачка маса што е можно побргу и бара гаранции од САД и Европа за безбедноста на неговата земја.

Украина сака мир и Русија е „единствената причина зошто војната продолжува“, објави тој на „Телеграм“. „Украина сака мир од првата секунда од војната и секогаш сме велеле дека единствената причина поради која војната продолжува е Русија“.