Европа
Русите на смрт ги осудија двајцата британски доброволци заробени во Мариупол

Судот во самопрогласената Народна Република Донецк осуди на смрт двајца британски и еден марокански доброволец заробени од руските сили во Мариупол, објавија руски провладини медиуми.
Судот на територијата под контрола на руските сили во источна Украина ги осуди Ејден Ајслин и Шон Пинер по судење кое траеше само неколку дена.
Набљудувачи велат дека станува збор за монтиран процес кој се обидел да го имитира судењето за воени злосторства на руските војници во Киев.
Ајслин (28) и Пинер (48) се осудени на смрт заедно со Мароканецот Сааудин Брахим, поради кривично дело тероризам.
И двајцата Британци рекоа дека служеле во единица на украинските маринци, што ги прави активни членови на војската и дека треба да бидат заштитени со Женевската конвенција како воени заробеници. Меѓутоа, руските медиуми ги опишаа како платеници и како такви беа судени пред судот на проруските сепаратисти.
Руската новинска агенција РИА Новости вчера објави видео на кое се гледа како Британците потврдно одговараат на прашањето дали се изјаснуваат за виновни за тероризам, извршување на злосторства во рамки на криминална организација односно насилно преземање на власта.
Се верува дека Русија го користи ова судење за да изврши притисок врз Британија и да изнуди размена на руски затвореници осудени за убиства и воени злосторства за време на руската инвазија на Украина. Во Русија, инаку, има мораториум на извршување на смртната казна, но не и на териториите што Русија ги зазеде во источна Украина.
Во соопштение за медиумите издадено претходно оваа недела, семејството на Ајслин порача дека тој служел во украинските маринци речиси четири години и дека без оглед на пропагандата од Кремљ, тој не е платеник, ниту пак шпион.
Британскиот пратеник Роберт Џенрик за Би-би-си изјави дека судењето на Ајслин и другите е неверојатно кршење на меѓународното право и мора да се осуди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.