Свет
Русија подготвена за обновување на соработката со САД во борбата против тероризмот и сајбер безбедноста

Русија е подготвена да ја обнови соработката со САД во безбедносните прашања, како што се борбата против тероризмот и кибернетичкиот криминал, изјави во понеделникот Николај Патрушев, близок соработник на рускиот претседател Владимир Путин и одговори на американските обвинувања за наводни руски хакерски напади дека Вашингтон го игнорира фактот дека главните интернет сервиси се на негова територија и оти можат нелегално да собираат информации.
Избраниот американски претседател републиканецот Доналд Трамп, кој неодамна за рускиот челник Владимир Путин изјави дека е „многу паметен“, нагласи дека сака да ги поправи односите со Русија, и покрај тоа што американските разузнавачки агенции водени од челници именувани од администрацијата на демократот Барак Обама, тврдат дека лично Путин ги наредил наводните хакерски напади за да ја дескредитира демократската претседателска кандидатка Хилари Клинтон. Тие тврдат дека целта на тоа било да им се помогне на Трамп и други републиканци, но Москва одлучно ги отфрла овие обвинувања.
Во интервјуто објавено во понеделникот, Николај Патрушев, секретар на рускиот национален Совет за безбедност, со кој претседава Путин, изнесе претпазливо внимателно мислење за шансите за соработка со Вашингтон по студениот однос во текот на администрацијата на претседателот на заминување Барак Обама, забележува Reuters.
„Доколку администрацијата на Доналд Трамп биде заинтересирана, ќе бидеме подготвени да ги продолжиме консултациите со нашите американски партнери во полн формат преку Советот за безбедност на Руската Федерација“, вели Патрушев во интервјуто за весникот Росискаја газета.
Меѓутоа, додава дека не очекува брзо подобрување на односите, ниту укинување на американските санкции против Русија, бидејќи односите во моментов се многу лоши.
Трамп во интервјуто за The Sunday Times објавено викендов рече дека ќе предложи укинување на санкциите против Русија наметнати поради присоединувањето на црноморскиот полуостров Крим, што Западот го смета за нелегална руска анексија на украинска територија, доколку се согласи на договор за намалување на нуклеарното оружје.
Од Москва во понеделникот одговорија дека ќе почекаат Трамп формално да ја преземе должноста во петок, пред да дадат какви и да се коментари.
Патрушев, во истото интервју, се осврнува и на обвинувањата од САД за наводното руско мешање во американската изборна кампања и напади врз политички институции, потсетувајќи дека главните интернет сервери се наоѓаат на нивна територија што им овозможува неовластено собирање информации.
„Во последниот период регистрираме значително зголемување на обидите да се нанесат штети на руските информатички системи од страна на надворешни сили. Тоа е, исто така, случај на хакирање и неовластено собирање на лични податоци“, вели рускиот функционер.
„Широко се користат светските оператори и провајдери, а методите коишто се применуваат постојано се развиваат“, истакнува Патрушев.
„Администрацијата на Барак Обама неосновано ја обвинува Русија за хакерски напади, намерно игнорирајќи го фактот дека главните интернет сервери се лоциран на територијата на САД и се користат од Вашингтон во разузнавачки и други цели, со цел да ја зачуваат својата доминација во светот“, истакнува Патрушев./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Медведев: Чекор по чекор, Австрија ја напушта неутралноста и станува транзитна база на НАТО

Заменик-претседателот на Советот за безбедност на Русија, Дмитриј Медведев, изјави дека прикрадната „НАТО-изација“ и милитаризација на Република Австрија се одвиваат во сенка на зајакнувањето на одбранбената компонента на Европската Унија.
„Виена активно учествуваше во иницијативата на НАТО „Партнерство за мир“, во суштина веќе интегрирајќи се во логиката на блокот. Австрија доби статус на клучна транзитна земја за НАТО. Само во 2024 година, повеќе од 3.000 воени транспортни авиони поминаа низ нејзината територија, а авионите на алијансата извршија над 5.000 летови во нејзиниот воздушен простор“, нагласи Медведев.
Тој потсети дека локалните ревизионисти со децении работат на поткопување на уставно загарантираната неутралност на Австрија. „Од 1990-тите, тие почнаа да воспоставуваат воени врски под маската на учество во заедничката безбедносна и одбранбена политика на ЕУ. До 2009 година, кога стапи во сила Лисабонскиот договор, сè се сведуваше на општи зборови за координација на воениот развој на земјите од ЕУ, но без конкретни обврски“, рече заменик-претседателот на Советот за безбедност на Русија.
Медведвед додаде дека австрискиот естаблишмент сè повеќе охрабрува јавна дебата за напуштање на неутралниот статус и приклучување кон НАТО, што според него претставува директен напад врз долгогодишниот принцип на државна неутралност, кој беше основа на политичкиот идентитет на современа Австрија.
Фото: принтскрин
Свет
Пензиските системи во неколку европски земји се на работ на колапс, велат експерти

Сиромаштијата во староста ќе стане правило за голем дел од населението на Европа, освен ако не се реформираат сегашните политики за пензионирање. „Еден од пет Европејци веќе е изложен на ризик од живеење во сиромаштија во старост“, рече Петра Хиелкем, раководител на Европскиот орган за осигурување и професионални пензии (EIOPA) со седиште во Франкфурт.
„А потоа, ако ги погледнете само жените, нивниот ризик е за 30 проценти поголем“, изјави Хиелкем за „Политико“. И станува уште полошо: населението на Европа брзо старее, а за четириесет години ќе има само 1,5 работници на секој пензионер. Тоа е половина од сегашниот сооднос.
Еден одговор е да се создадат комплементарни приватни или професионални пензиски системи, така што луѓето ќе имаат личен фонд на пензиски заштеди на кои ќе можат да се потпрат во пензија. Скандинавските земји се најдобро подготвени за претстојната криза.
Тие имаат различни извори за пензионерите: системи „плаќај по употреба“, професионални пензиски фондови, што значи дека штедите за пензија додека работите, и дополнителни инвестиции во пензиски производи.
Но, многу земји, особено во источна и јужна Европа, главно се потпираат на државни пензии и имаат ниски пензии во однос на платите. Во многу случаи, граѓаните не се навистина свесни за својата ситуација бидејќи јавните власти и работодавците не им даваат целосен преглед на нивните пензиски права, според медиумот.
Брисел може да направи малку повеќе од тоа да дава препораки бидејќи надлежноста е на национално ниво. Сепак, Хиелкем, Холанѓанка која го води органот за професионални пензии од 2021 година, е убедена дека постои „моментум“ за голема промена што би ѝ дала на EIOPA поголема улога.
„Прво, гледаме дека проблемот станува сè поголем, а истото го гледаат и некои влади. И второ, да бидеме искрени, зошто пензиите се на дневен ред? Затоа што ни требаат повеќе инвестиции, а еден начин да ги зголемиме е да ги префрлиме заштедите од банкарски сметки во инвестициски производи“, рече Хиелкем.
До крајот на годината, Европската комисија ќе предложи владите да постават дигитални штедни и инвестициски сметки достапни за секој граѓанин, системи за следење на пензиите, контролни табли за комуникација на пензиските права и даночни олеснувања за да го направат штедењето за пензионирање попривлечно. Исто така, ќе ги разгледа правилата на ЕУ за пензиските фондови и пензиските инвестициски производи.
Клучна мерка во пакетот е систем за автоматско запишување на луѓе во професионални пензиски фондови, сличен на оној што веќе постои во Велика Британија, Полска и Италија. „Автоматски, ќе бидете вклучени во пензиските фондови ако работите. Ако не сакате, мора сами да се откажете.“
Во моментов, рече Хиелкем, луѓето можат да изберат да се одлучат за професионална пензија, но поради инерција, малкумина го прават тоа. „Претпоставката е дека инерцијата ќе работи и во спротивна насока“, рече шефот на EIOPA, што значи дека малку луѓе би се откажале. Таму каде што постои, механизмот функционира и води кон тоа повеќе луѓе да штедат за своето пензионирање преку работа.
Фото: принтскрин
Свет
Руте: Шокирани сме, нападот докажува дека не смееме да бидеме наивни во врска со Русија

Генералниот секретар на НАТО, Марк Руте, денес изјави дека руските напади врз Киев синоќа, кои ги погодија цивилните области и дипломатската мисија на ЕУ во Киев и убија најмалку 18 лица, покажуваат дека рускиот претседател Владимир Путин е подготвен да ја продолжи војната.
„Сите сме шокирани од она што се случи, пред сè затоа што станува збор за напади кои не се врз воени цели, ова се цивилни цели. Додека се обидуваме да направиме сè за да го поддржиме американскиот претседател Доналд Трамп да ја заврши оваа војна, во меѓувреме, рускиот претседател Путин е подготвен да продолжи со неа, да продолжи да напаѓа невини цивили во Украина“, рече тој на прес-конференција во германскиот град Вирцбург.
Тој истакна дека денес се консултирал со претседателката на Европската комисија, Урсула фон дер Лајен, и високата претставничка за надворешни работи, Каја Калас, по рускиот напад врз претставништвото на ЕУ во Киев, објави германската Н-ТВ.
„Нападот уште еднаш докажува дека не смееме да бидеме наивни во врска со Русија“, предупреди Руте.
Сепак, тој рече дека Русија е способна за хибридна војна.
„Доколку сметаат дека е потребно, можат дури и да извршат атентат“, нагласи Руте.
Според него, Русија се обидува да го наруши и цивилниот воздушен сообраќај, на пример во Германија и балтичките држави.
Фото: принтскрин