Британскиот премиер Кеир Стармер синоќа беше домаќин на германскиот канцелар Олаф Шолц за да разговараат за трговијата меѓу Обединетото Кралство и Европската унија и трансатлантските односи по најавата на САД дека ќе воведат високи царини за увоз на странска стока.

Стармер ја отфрли можноста повторно да се приклучи на европскиот блок, но рече дека сака да воспостави поблиски, подобри односи со ЕУ во областа на одбраната, енергијата и трговијата.

Коментирајќи ја одлуката на САД за воведување царини, германскиот канцелар Шолц рече дека светот не треба да се дели со нови трговски бариери бидејќи сите имаат корист од глобализацијата. Американскиот претседател Доналд Трамп минатата недела најави воведување царина од 25 отсто за стоки од Мексико и Канада и 10 отсто за увоз од Кина.

„Глобализацијата, светската размена на стоки, се покажа како одлична, успешна приказна која донесе просперитет за сите нас – Обединетото Кралство и Германија, САД, но и на многу други делови од светот, затоа е важно сега да не го делиме светот со разни царински бариери”, туку да ја овозможиме оваа размена на стоки и услуги во иднина”, рече Шолц.

Поранешен хирург обвинет за злоупотреба на стотици млади пациенти, често додека тие биле под анестезија, ќе оди на суд овој месец во најголемото судење за злоупотреба на деца во историјата на Франција, јавува Би-би-си.

Ле Скуарнек (73) е обвинет за напад или силување на 299 деца, повеќето негови поранешни пациенти, меѓу 1989 и 2014 година, главно во Бретања. Тој ги призна дел од обвиненијата, но не сите.

На судењето во Ван, северозападна Франција му претходеше полициска истрага која траеше неколку години.

Џоел Ле Скуарнек, некогаш угледен хирург од еден мал град, е во затвор од 2017 година кога беше уапсен под сомнение дека ги силувал своите внуки, кои сега имаат триесет години, како и шестгодишно девојче и млад пациент. Тој беше осуден на 15 години затвор во 2020 година.

Судењето, кое започнува на 24 февруари и ќе трае до јуни, ќе се одржи во Ван, каде што се обезбедени специјални простории за стотици жртви и нивните адвокати. Дали судењето ќе биде отворено за јавноста зависи од тоа дали сите жртви ќе се согласат да се откажат од своето право на затворено судење.

Многумина веруваат дека отвореното судење би било клучно за разоткривање на судските и институционалните неуспеси што ја овозможија долгорочната криминална кампања на Ле Скуарнек.

Полицијата го претресла неговиот дом по неговото апсење и пронашла сексуални кукли со големина на дете, повеќе од 300.000 слики од злоупотреба на деца и илјадници страници детални дневници во кои Ле Скуарнек наводно ги запишал нападите што ги извршил врз своите млади пациенти во период од 25 години.

Тој негираше дека напаѓал или силувал деца, тврдејќи дека неговите дневници само ги опишале неговите фантазии. Сепак, тој во неколку наврати напишал дека е педофил. Ле Скуарнек се соочува со повеќе од 100 обвиненија за силување и повеќе од 150 обвиненија за сексуален напад.

Пред судот ќе се постави прашањето дали Ле Скуарнек бил заштитен од колегите и раководството на болниците кои го вработиле, и покрај тоа што ФБИ ги предупреди француските власти дека посетувал веб-страници со материјали за злоупотреба на деца. По опомената доби само условна казна. Наводно, членовите на неговото семејство знаеле за неговата педофилија, но не го спречиле.

„Молкот на семејството овозможи неговата злоупотреба да продолжи со децении“, изјави еден од адвокатите вклучени во случајот.

Некои од неговите поранешни пациенти, сите сега возрасни, изјавија дека се сеќаваат како хирургот ги допирал под изговор на лекарски прегледи, понекогаш дури и додека нивните родители или други лекари биле во собата.

Меѓутоа, бидејќи многу од неговите наводни жртви биле под дејство на анестетици во времето кога се случиле нападите, тие не се сеќавале на настаните и биле шокирани кога полицијата ги контактирала и ги информирала дека нивните имиња, заедно со описите на злоупотребата, наводно се забележани во дневниците на Ле Скуарнек.

Ле Скуарнек се чувствувал семоќен и уживал во чувството да флертува со опасноста преку пресметани престапи, се наведува во судскиот налог против поранешниот хирург, пишува францускиот дневен весник Le Monde. Некои од жртвите рекоа дека вознемирувачките откритија им помогнале да ги разберат необјаснетите симптоми на траума што ги мачеле цел живот.

Лидерите на земјите-членки на ЕУ денеска се собираат во Брисел за неформално да разговараат за европската одбрана во контекст на растечките геополитички тензии, особено за војната во Украина. Неформалните собири на шефовите на држави или влади на ЕУ се наменети за размена на мислења за конкретни теми со цел да се подготви теренот за подоцнежни одлуки и законодавни иницијативи.

Новиот претседател на Европскиот совет, Антонио Коста, пред преземањето на функцијата најави дека сака периодично да организира неформални состаноци на лидерите на ЕУ за да можат на мир да разговараат за актуелните теми, без обврска да носат какви било одлуки или заклучоци. Лидерите ќе се сретнат во палатата Егмонт во Брисел.

На самиот почеток на средбата ќе учествува претседателката на Европскиот парламент Роберта Мецола, а веднаш потоа лидерите на 27-те земји ќе започнат дискусија за актуелната геополитичка ситуација. За време на ручекот ќе им се придружи генералниот секретар на НАТО Руте, со кого ќе разговараат за соработката ЕУ-НАТО. Лидерите попладне ќе разговараат за зајакнување на европската одбрана, а вечерта ќе им се придружи и британскиот премиер Кир Стармер на работна вечера.