Свет
Руската војска им дава хуманитарна помош на бегалците од сириски Идлиб
Центрите за привремено сместување во сириската провинција Латакија примија бегалци од зоната за деескалација на Идлиб, каде што се во тек воени активности, изјави портпаролот на рускиот Центар за помирување на спротивставените страни во Сирија, Сергеј Смолински, додавајќи дека руската војска обезбеди хуманитарна помош за бегалците, пренесува ТАСС.
„Тие имаат потреба од помош бидејќи не се соочуваат само со хуманитарни, туку и со психолошки проблеми“, рече тој.
Офицерите од рускиот центар продолжуваат да дистрибуираат пакети храна и постелнина меѓу бегалците додека воените лекари им даваат медицинска помош.
Според гувернерот на Идлиб, Фади Садун, властите се решени да направат сè што е можно за да ги охрабрат луѓето да се вратат во своите домови.
„Многу семејства го напуштиле Идлиб. Според нашите податоци, околу 7.500 бегалци престојуваат во Латакија, 11.000 се засолниле во Хама, а другите се преселиле во Хомс, Дамаск, и во други градови. Наша цел е да ги вратиме и да ги вложиме сите напори за таа цел. Процесот ќе почне веднаш штом ситуацијата во Идлиб ќе се подобри“, рече тој.
Во согласност со одлуката на Русија, Иран и Турција – гарантите на сирискиот прекин на огнот – во мај 2017 година се формираа зони за деескалација во Сирија. Тие ги вклучуваат Идлиб, некои делови од соседните области во Латакија, Хама и провинциите Алепо, источна Гута, како и некои области во провинциите Дара и Ал Кунеитра во јужна Сирија.
Дамаск ја презеде контролата врз три од четирите зони во 2014 година, но зоната што ја покрива провинцијата Идлиб и одредени делови од провинциите Латакија, Хама и Алепо сè уште се контролирани од терористите од Џабат ал-Нусра.
Шефот на рускиот Центар за помирување, генерал-мајор Виктор Купчишин, претходно изјави дека граничниот премин Суран бил воспоставен за да се обезбеди излез на цивилите од зоната за деескалација во Идлиб.
Според последните податоци, од 40.000 до 80.000 луѓе се подготвени да ја напуштат областа. Привремено сместување е обезбедено за нив во провинциите Хама, Хомс и Деир ез-Зор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.