Осомничена руска шпионка повеќе од 10 години работела во Амбасада на САД во Москва, објави „Гардијан“.

Русинката, во рамки на ангажманот од американската Влада, со години работела во тајните служби на САД, а е осомничена дека важни податоци потоа ѝ пренесувала на Руската разузнавачка служба (ФСБ). Ова било утврдено по рутинската проверка на безбедноста спроведена од Стејт департментот во 2016 година, изјавил за медиумите висок службеник на американската администрација.

Откриено е дека жената имала редовни тајни состаноци со претставници на ФСБ.

Suspected Russian spy was working in US embassy in Moscow more than a decade. Hired by US Secret Service, she had access to agency’s intranet/email systems which included confidential material such as schedule of president and vice-presidenthttps://t.co/79kWIqziCF

— Kim Zetter (@KimZetter) August 2, 2018

„На состаноците им давала многу повеќе информации отколку што е дозволено“, соопштил официјалниот американски претставник.

Регионалната канцеларија за безбедност ја предупредила амбасадата за осомничената шпионка во јануари минатата година, а таа добила отказ минатото лето.

Русинката имала пристап до онлајн системите на американската тајна служба, но не и пристап до строго доверливи информации, поради што не претставува закана за националната безбедност на САД, рекол американскиот претставник.

Лице добро запознаено со случајот, за Си-ен-ен изјавило дека Русинката била вработена во Стејт департментот, но вршела активности и за тајните служби.

Од Стејт департментот одбиле да го коментираат случајот. Американската тајна служба во четвртокот соопшти дека Русинката во ниту еден момент од нејзиното дејствување не можела да дојде до доверливи информации поврзани со националната безбедност.

„Во принцип, ние сме свесни дека странските разузнавачки служби се обидуваат да ги искористат вработените од Владата на САД. Оттаму, агенцијата врши ригорозни проверки на сите наши вработени надвор од државата“, изјавиле од Стејт департментот, од каде додале дека доколку се утврди оти вработените ги прекршуваат прописите за безбедност, се преземаат соодветни мерки.