Новогодишната програма на руската телевизија помина во духот на празнична еуфорија и патриотски жар поради настаните во Украина.

Домаќините и изведувачите наздравуваа за воена победа и го исмејуваа Западот за економските последици предизвикани од руските санкции, а телевизиските студија беа преполни со војници донесени од првите редови.

Комичарот Евгениј Петросјан ги поддржа руските вооружени сили уверувајќи ги дека зад нив стои целата земја. „Сакале ние или не, Русија се шири! Петросјан ги исмејуваше Украина и нејзините западни сојузници. И покрај празничната веселба, доброто расположение меѓу пропагандистите на Путин постепено избледе, пишува „Дејли бист“.

Украинците им го зададоа првиот значаен удар на Русите во новата година со напад на зграда во Макиивка, каде што беа стационирани руски војници. Рускиот водител Сергеј Мардан беше незадоволен од „смеата и веселбата на федералните канали“, која продолжи и кога Русите потврдија дека во нападот загинале неколку десетици руски војници.

„Тоа што се случи во Макиивка е трагедија! Вистинска трагедија! Не беше потребен телефонски повик од врвот за да сфатиме дека телевизиската програма треба да се смени во нешто посоодветно. Наместо вулгарни анегдоти, ставете некој стар советски филм“, збесна Мардан.

Мардан потоа се обиде да ги подготви Русите за брзиот пад на животниот стандард што се случи поради трошоците за воените операции и западните санкции. „Какви се нашите шанси? Дали ги имаме воопшто или не? Дали ќе треба да живееме како Јужна Кореја во 50-тите и 60-тите? Дали на крајот ќе треба да јадеме огнени мравки?“, го праша Мардан својот економски експерт Денис Ракса.

Ракса објасни дека секојдневниот живот на просечниот Русин ќе стане тежок ако Русија има намера да ја обнови својата економија за да биде самоодржлива.

„Во моментот индустријализацијата, слична на онаа од 19 век или 20-тите и 30-тите години практично е невозможна. Во тој случај би морале да живееме не како Јужнокорејци, туку како Севернокорејци“, рече Ракса.

За време на својата емисија, Мардан ги опиша предвидувањата за претстојниот недостиг на муниција како „апокалиптични списи“ и гласно се прашуваше дали руската индустрија ќе може да го реши овој проблем.

„Ги прочитав тие пишувања. Треба да се признае дека ги напиша еден од нашите најдобри воени професионалци… но неговите пресметки не ја вклучија брзината со која моментно се произведува муниција“, оптимист беше воениот аналитичар Владислав Шургин.

Шургин тврди дека наметнувањето строги норми за употреба на муниција на бојното поле е начин да се држи проблемот под контрола. Во меѓувреме, Русија наводно продолжува да се свртува кон другите сојузници за оружје и муниција за да ги надополни своите сè помали резерви.

За пропагандистите на Путин, напуштањето на Украина и откажувањето од воени операции не доаѓа предвид.

„Непријателот мора да биде уништен до срж! Мора да се истреби! Руската историја од последните 1.000 години покажува дека делото мора да се изврши до својот конечен заклучок. На сите што велат дека Русија треба да се крене од колена, вклучително и мене и моите пријатели, се плашам дека нашиот поранешен начин на живеење е минато… Тоа е практично неизбежно… можеби ќе ја паметиме минатата година како богата година. Од друга страна, пред нас е голема победа!“, заврши Мардан, пренесе „Индекс.хр“.