Свет
САД воведоа санкции против Русија
Американскиот претседател Џо Бајден вечерва ѝ се обрати на јавноста и најави санкции што САД ќе ги воведат кон Русија како одговор на признавањето на двата проруски региона во источна Украина, но и најавата за испраќање руски војници во тие провинции.
По воведниот дел од говорот, Бајден тргна да ги објави санкциите што ќе ги воведе кон Русија. Тој рече дека „ќе работи со партнерите за да се осигури дека проектот за гасоводот ‘Северен тек 2’ ќе остане запрен“.
Бајден најави дека во првите пакет-санкции ќе блокира две големи руски финансиски институции – ВЕБ и Руската воена банка. Покрај тоа, тој најави дека делови од руската економија ќе бидат отсечени од меѓународните финансиски системи.
Американскиот претседател рече дека санкциите одат многу подалеку од оние што претходно беа воведени и дека ќе го прекинат пристапот на руската влада до западните финансии, кои ѝ се потребни за сервисирање на јавниот долг.
Бајден рече дека одобрил дополнително испраќање американски војници во сојузничките земји во Источна Европа. Тој нагласи дека војниците и опремата што веќе се наоѓаат во Европа ќе бидат испратени во балтичките земји – Естонија, Летонија и Литванија.
„Да бидам целосно јасен, ова се одбранбени маневри. Немаме намера да се бориме со Русите“, рече Бајден.
Испраќањето војници на Балтикот, како што додаде, треба да испрати порака до американските сојузници дека САД ќе ја бранат територијата на НАТО и ќе ги почитуваат обврските. Бајден не сакаше да одговара на прашањата на новинарите. Тој ќе го стори тоа на брифинг во Белата куќа, кој набргу ќе почне со неговата портпаролка Џен Псаки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас: Израел ги враќа преговорите на почеток со измени на предлогот за прекин на огнот
Палестинската милитантна група Хамас соопшти дека Израел практично го отфрлил предлогот за прекин на огнот во Појасот Газа, откако на посредниците во преговорите им доставил амандмани на предлогот, со што преговорите се вратиле на самиот почеток.
Хамас соопшти дека ќе одржи консултации со палестинските фракции за да ја разгледа преговарачката стратегија, објави Ројтерс.
Индиректните разговори меѓу Израел и Хамас за договор за прекин на огнот во Појасот Газа и ослободувањето на заложниците се чини дека се заглавени без очигледен напредок, бидејќи Хамас рече дека нема намера да се откаже од предлогот веќе отфрлен од Израел.
Свет
Најмалку 60 лица се повредени во судир на воз и локомотива во Буенос Аирес
Најмалку 60 лица се повредени кога патнички воз се судрил со локомотива и празен вагон во главниот град на Аргентина, Буенос Аирес, соопштија локалните власти.
Пожарникарите, полицијата и брзата помош се на терен и помагаат да се префрлат повредените патници во болниците, објави Ројтерс.
Во судирот првиот вагон од патничкиот воз излета од шините и беше оштетен.
Свет
Најмалку 50 луѓе загинаа во поплавите во Авганистан
Најмалку 50 лица загинаа во Авганистан во поплави по обилните дождови во северната провинција Баглан, изјави портпаролот на Министерството за внатрешни работи, Абдул Матен Кание.
Тој посочи дека бројот на жртви може да се зголеми, пренесе Ројтерс.
Кание рече дека има поплави во повеќе од пет области во Баглан по обилните дождови и на некои домаќинства им е потребна итна помош.
Тој додаде дека за вечерва се предвидуваат две силни невремиња.
„Министерството за внатрешни работи испрати екипи и хеликоптери во областа, но поради недостиг на светла за ноќно гледање во хеликоптерите, операцијата можеби нема да биде успешна“, рече тој.
Најмалку 33 лица загинаа, а 27 се повредени во силните поплави предизвикани од сезонските дождови во средината на април во Авганистан.
Поплави во април го погодија главниот град Кабул и неколку провинции низ земјата.