Свет
САД воведоа нови санкции за Куба, забранија деловни активности со компанија што се занимава со парични дознаки

САД ги заострија санкциите кон Куба додавајќи на списокот компанија што ги обработува странските дознаки за Кубанците, објави американскиот државен секретар, Мајк Помпео.
Кубанската компанија Американски меѓународни услуги (АИС) обработува парични дознаки од странство, а од денес на компаниите и физичките лица под јурисдикција на САД им е забрането да работат со таа компанија. АИС е контролирана од кубанската армија, потсетува ДПА.
Во 2017 година Стејт департментот на САД објави ограничен список од 180 компании и други институции, кои, според САД, им служат на кубанската војска, на разузнавачките служби и на безбедносните сили.
„Луѓето треба да може да добиваат пари од своите семејства во странство и да бидат поштедени од обврската да ги полнат џебовите на нивните угнетувачи“, рече американскиот државен секретар коментирајќи го вклучувањето на АИС на списокот на санкционирани компании.
„Кубанскиот народ заслужува да живее во слобода и достоинство, тој заслужува право (слободно) да го избере своето раководство и да се грижи за своите семејства“, продолжи Помпео.
Американскиот претседател, Доналд Трамп, се обидува да ја обнови политиката кон комунистичка Куба што ја водеше Вашингтон пред периодот на омекнување на односите во времето на Барак Обама. Кабинетот на Трамп воведе низа санкции за да го зголеми притисокот врз малиот островски сосед и да го принуди да му ја одземе поддршката на претседателот на Венецуела, Николас Мадуро, кого Вашингтон сака да го смени.
САД исто така го ограничи патувањето на Куба и постави тримесечен лимит од 1.000 американски долари за американските граѓани, кои финансиски ги помагаат членовите на нивните семејства во Куба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски: Русија изврши 46 воздушни удари и 900 гранатирања за еден ден

Претседателот на Украина, Володимир Зеленски, соопшти дека Русија извршила сериозни напади врз украинска територија, прекршувајќи го велигденскиот прекин на огнот. Според податоците на врховниот командант на украинската армија, Олександр Сирски, руските сили до 16 часот по локално време извршиле 46 воздушни напади и 900 артилериски гранатирања.
„Денеска руските сили употребија 400 дронови за напади врз различни делови од Украина“, објави Зеленски на социјалните мрежи.
Според него, дел од нападите биле насочени и кон регионот Доњецк, токму за време на прекинот на огнот по повод православниот Велигден. Напади биле регистрирани и во областа Курск во Русија.
Украинскиот претседател остро ја осуди агресијата, оценувајќи дека Москва повторно демонстрира целосно непочитување кон верските празници и обидите за деескалација на конфликтот.
Регион
Додик: Британски специјалци се дојдени во Република Српска да ме убијат

Милорад Додик, претседателот на Република Српска и осуден бегалец кој е наведен како бегалец во Федерацијата на Босна и Херцеговина, во интервју за Новости упати сериозни обвинувања.
Тој тврди дека „тројца претседатели на европски земји и еден премиер“ му кажале дека во Босна и Херцеговина е префрлена британска воена единица со многу специфична задача – негова ликвидација.
„Тоа не е класична единица. Станува збор за четириесет војници кои пристигнаа со јасна наредба – не да ме уапсат, туку да ме убијат. И тоа под изговор дека давам отпор. Мафијашки принцип – ако отстраните човек, го отстранивте проблемот. Лидерите од Европа ми го потврдија тоа. Тие не се откажаа, но засега молчат“, вели Додик.
Тој во интервјуто нагласува дека не живее во страв и дека слободно се движи, отфрлајќи ги тврдењата дека е изолиран.
„Никогаш нема да бидам скршен од политичките процеси. Нема да се откажам од борбата за Република Српска“, вели тој.
Додик открива и дека официјални лица од Брисел наводно го советувале да се засолни.
Регион
Сестри си размениле пцости, па тупаници за имотот на нивниот татко

Две сестри се степале за имотот на нивниот покоен татко! Сè експлодирало во двор во Цазин (БиХ) кога жените, откако си размениле остри зборови, почнале да си разменуваат удари. Соседите зачудено гледале како драматичниот конфликт ги вознемирува локалните жители, принудувајќи ја полицијата да интервенира.
„Прво дошло до жестока расправија во дворот од куќата на нивниот покоен татко, а потоа сето тоа прераснало во физичка пресметка“, вели еден од соседите, кој сакал да остане анонимен.
Според него, спорот настанал околу поделбата на имотот на нивниот татко – земјиште и стара рурална станбена зграда.
„Беше страшно да се гледаат две сестри како се тепаат пред луѓе кои со години ги познаваат како мирни и резервирани луѓе“, додава сосед.