Свет
САД наскоро ќе ѝ постават рокови на Северна Кореја
По историскиот самит на Доналд Трамп и Ким Џонг-ун, САД до Северна Кореја наскоро ќе достават временска рамка која ќе содржи специфични барања.
Неименуван американски официјален претставник, кој контактирал со мала група новинари непосредно пред заминувањето на американскиот секретар за одбрана, Џим Матис на азиска турнеја, рекол дека временската рамка ќе биде доволно мала за да го демонстрира нивото на ангажман кое Пјонгјанг има намера да го покаже, но не навлегувал во повеќе детали.
„Наскоро ќе знаеме дали тие ќе дејствуваат со добра волја или не“, изјавил официјалниот претставник, кој побарал да остане анонимен, објави „Ројтерс“.
Ќе има специфични барања и конкретни временски ограничувања кога Севернокорејците ќе ги запознаеме со нашиот концепт за спроведување на договорот од самитот, рекол претставникот.
Матис за време на еднонеделната азиска турнеја ќе ги посети Кина, Јужна Кореја и Јапонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
На Гутереш му е забрането да стапне во Израел: шефот на дипломатијата го прогласи за „персона нон грата“
Израелскиот министер за надворешни работи, Израел Кац, денеска изјави дека му забранува влез во земјата на генералниот секретар на ОН, Антонио Гутереш, бидејќи не го осудил недвосмислено иранскиот ракетен напад врз Израел.
„Секој кој не може недвосмислено да го осуди грозоморниот напад на Иран врз Израел, како што тоа го направи речиси секоја земја во светот, не заслужува да стапне на израелска почва“, рече Кац, пренесе Ројтерс. Кац додаде дека Израел ќе продолжи да ги брани своите граѓани и да го штити своето национално достоинство, „со или без Антонио Гутереш“.
Бидејќи не зборуваше против Иран, Гутереш е „непожелна личност“ во Израел, заклучи израелскиот министер. Иран вчера истрела повеќе од 180 балистички проектили врз Израел додека ескалираа судирите меѓу Израел и либанската група Хезболах, поддржана од Иран.
По нападот, Гутереш даде куса изјава во која зборува само за „најновите напади на Блискиот Исток“ и го осуди конфликтот што „ескалира“.
Свет
Израел му забрани на шефот на ОН да влезе во земјата: Не заслужува да стапне на наша почва
Министерот за надворешни работи на Израел рече дека на шефот на Обединетите нации, Антонио Гутереш, му е забранет пристапот во земјата поради, како што верува, антиизраелската пристрасност на шефот на ОН.
Израел Кац рече дека го прогласил Гутереш за персона нон грата.
„Секој што не може недвосмислено да го осуди грозоморниот напад на Иран врз Израел, како што тоа го направи речиси секоја земја во светот, не заслужува да стапне на израелска почва“, порача тој на социјалната мрежа „Икс“.
Гутереш вчера го осуди проширувањето на конфликтот на Блискиот Исток и повика на прекин на огнот во изјавата во која конкретно не се споменува Иран.
Регион
Пумпата за базен го повлекла момчето на дното: детали за трагедијата на Златибор
Момче (6) од Белград вчера се удавило во базен на познат хотел на Златибор, а според неофицијални информации, смртта ја предизвикала пумпата од базенот. Кога момчето нурнало, наводно пумпата го повлекла на дното.
Очевидците на оваа трагедија со сите сили се обиделе да го извлечат детето, но не успеале поради вакуумот, а момчето починало.
По наредба на Основното јавно обвинителство во Ужице, на телото на момчето е наредена обдукција.
Полицијата го уапсила сопственикот на фирмата за одржување на базените. На осомничениот му е одреден притвор до 48 часа. Тој беше обвинет за тешко дело против општата безбедност.
Повреденото момче било придружувано од жена за која постои сомневање дека е баба му, пишува „Блиц.рс“.
Екипата на „Блиц“ стапила во контакт со хотелот во кој се случила трагедијата, но од вработените велат дека не сакаат да даваат изјави за медиумите.