Најмалку осум лица загинаа, а неколку се повредени кога патнички возила со шиитски муслимани беа нападнати во северозападен Пакистан.

Нападот се случи во областа Курам во провинцијата Хајбер-Пахтунхва, каде во последните месеци се водат судири меѓу сунитското мнозинство и шиитското малцинство, при што во некои инциденти загинаа десетици луѓе, пренесе АП.

Претставник на локалната полиција Нусрат Хусаин рече дека возилата со патници патувале од Парачинар кон Пешавар кога отвориле оган.

Федералниот хидрометеоролошки институт (ФХМЗ) издаде портокалово предупредување за петок, 22 ноември, поради очекуваните обилни врнежи и силни ветрови кои ќе зафатат поголем дел од Босна и Херцеговина.

Според најавите, снегот што почна да паѓа вчера во попладневните часови во делови од земјата наскоро ќе ја зафати цела Босна и Херцеговина, што ќе донесе неповолни временски услови.

Пообилни врнежи се очекуваат во Херцеговина, западните, делумно централните и северните области на Босна. Снегот кој вчера предизвика колапс во сообраќајот, кршење гранки и паѓање дрвја, продолжи и во текот на ноќта. Овие временски проблеми предизвикаа метеж на патиштата, а возачите беа предупредени да бидат дополнително внимателни.

Од институтот напоменуваат дека, покрај снегот, ќе се засили и ветерот, што може да ги отежни условите на патиштата. Со оглед на прогнозираните врнежи, снегот ќе создаде слој мраз на возилата и патиштата, а можноста за паѓање на гранки и дрвја може да доведе до привремен застој во сообраќајот.

На граѓаните им се препорачува да ги следат најновите временски прогнози и да внимаваат при движење, а да ги осигураат возилата и имотот поради можни врнежи од снег и силен ветер.

Администрацијата на американскиот претседател во заминување Џо Бајден го извести Конгресот дека планира да го отпише долгот на Украина во вредност од 4,65 милијарди долари, објави денеска „Блумберг“.

„Откажувањето на долгот, кое и помага на Украина да победи во војната против Русија, е во национален интерес на САД и нивните партнери од ЕУ, Г7+ и НАТО“, се вели во писмото на Стејт департментот до Конгресот на 18 ноември.

Стејт департментот рече дека активностите на администрацијата се во согласност со овластувањата на Конгресот, но планот наиде на критики од републиканците. Сенаторот Ренд Пол од Кентаки рече дека ќе повика на гласање во Сенатот за да се спречи долгот на Украина да стане одговорност на американскиот народ.

Двата дома на Конгресот ќе треба да ја одобрат резолуцијата на Пол, што е малку веројатно со оглед на тоа што демократите моментално го контролираат Сенатот, пред републиканците да ја преземат власта во јануари, според „Блумберг“.

Бајден, исто така, може да стави вето на резолуцијата доколку таа помине, а американски официјален претставник во средата вечерта изјави дека претседателот во заминување има право да отпише 50 отсто од долгот. Овој заем е одделен од преостанатите речиси 9 милијарди долари помош за оружје што американската администрација вети дека ќе ги потроши за Украина до крајот на мандатот на Бајден, пренесува медиумот.

Околу 7 милијарди долари од овие пари мора да се потрошат првенствено за набавка на оружје од американски залихи, додека остатокот од средствата ќе бидат наменети за договори за одбранбено производство кои ќе ги испорачуваат залихите директно во Украина кога ќе бидат готови.

Администрацијата на новоизбраниот американски претседател Доналд Трамп, кој претходно ја изрази својата поддршка за мирот во Украина, би можела да откаже некои од овие договори, според написите.