Свет
САД сè помалку веруваат во успехот на украинската контраофанзива

Американските власти се подготвуваат за сè поверојатната можност руско-украинската војна да се претвори во долготраен конфликт со низок интензитет што ќе трае многу години – можеби и децении – слично на серијата конфронтации на Корејскиот Полуостров, Јужна Азија и пошироко.
Опциите за кои се дискутираше во администрацијата на Бајден за долгорочно „замрзнување“ вклучуваат прашања за тоа каде да се постават потенцијалните линии за кои Украина и Русија би се договориле, но кои не треба да бидат официјални граници. Во различни американски агенции во Белата куќа се одржаа дискусии.
Тоа е сценариото кое може да се покаже како најреален долгорочен исход, со оглед на тоа што ниту Киев ниту Москва делуваат наклонето да го признаат поразот. Сценариото станува сè поверојатно и поради растечкото размислување во администрацијата на Бајден дека претстојната украинска контраофанзива нема да ѝ нанесе краен удар на Русија, пишува Политико.
Замрзнат конфликт – во кој борбите престануваат, но ниту една страна не е прогласена за победничка, ниту војната е официјално завршена – исто така може да биде политички прифатлив долгорочен исход за Соединетите Држави и другите земји кои ја поддржуваат Украина. Ова би значело дека воената пресметка се намалува, трошоците за поддршка на Киев, исто така, веројатно ќе се намалат, а вниманието на јавноста кон војната ќе опадне.
„Планираме долгорочно, без оглед на сценариото“, рече американски функционер запознаен со разговорите за Украина на администрацијата на Бајден. Функционерот додаде дека ваквото планирање е се поголем фокус на администрацијата, додека во изминатите месеци „сè се случувало итно и на краток рок“.
Двајца други американски функционери и поранешен службеник на администрацијата на Бајден потврдија дека продолженото замрзнување на борбите е една од можностите за кои САД се подготвуваат. Американските власти, исто така, ги разгледуваат долгорочните безбедносни врски што Вашингтон ќе ги има со Киев, како и односот на Украина со НАТО.
„Постои размислување дека Украинците треба да го заземат Мариупол и да добијат пристап до Азовското Море. Има други кои се помалку загрижени за цртање линии, се додека Украина е безбедна во иднина“, рече поранешниот американски функционер, опишувајќи ги внатрешните дискусии.
Ваквите дискусии се сè уште во рана фаза, а американските официјални лица нагласуваат дека војната ќе биде активна уште некое време и дека администрацијата на Бајден има намера да ѝ обезбеди на Украина оружје и поддршка што ѝ е потребна за да ги истисне Русите од толкава територија колку што е тоа можно.
Петтиот човек со кој разговараше Политико, висок функционер на администрацијата на Бајден кој зборуваше во име на Белата куќа, рече дека се разгледуваат голем број планови за вонредни ситуации, но ситуацијата е флуидна и единствено е сигурно дека Русија нема да ја освои Украина. Како и другите интервјуирани, и овој службеник сакаше да остане анонимен.
Додека многу американски функционери избегнуваат јавно да зборуваат за тоа како ќе се развива руско-украинскиот конфликт, началникот на Здружениот генералштаб на САД, генерал Марк Мили, постојано предвидуваше дека тој ќе заврши со преговори, а не со воена победа за која било страна. И составот на неодамнешните пакети за воена помош за Украина ја одразува промената на администрацијата на Бајден кон подолгорочна стратегија, рече претставник на Министерството за одбрана.
Украина во моментов подготвува контраофанзива, иако времето останува нејасно. Во последниве денови, украинскиот претседател Володимир Зеленски сугерираше дека контраофанзивата ќе биде одложена бидејќи на Украина и треба повеќе оружје од нејзините западни партнери, а исто така рече дека „првите важни чекори ќе бидат преземени наскоро“. Американските власти очекуваат борбите да продолжат по контраофанзивата.
На среден рок, многумина очекуваат ќор-сокак, за време на кој борбите продолжуваат, но ниту една од страните не добива голема територија, или војна на трошење, во која двете страни се обидуваат да нанесат огромни загуби во работна сила и опрема на другата страна, со надеж дека другата страна ќе пропадне.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Синот на Нетанјаху го навреди катарскиот емир и неговата мајка: Модерен Хитлер и Гебелс

Јаир Нетанјаху, синот на израелскиот премиер Бенјамин Нетанјаху, го нарече емирот на Катар, Тамим бин Хамад Ал Тани, и неговата мајка Моза бинт Насер – „модерен Хитлер и Гебелс“.
Според објавата на платформата Икс (поранешен Твитер), тој напиша:
„Катар е главната сила зад брановите на антисемитизам каков што не сме виделе од 1930-тите и 1940-тите. Катар е модерна нацистичка Германија. Секој Евреин во светот е во сериозна опасност поради децении катарско оцрнување на Евреите и еврејската држава, поддржано со милијарди долари што тие ги вложуваат.“
Оваа изјава доаѓа во момент кога повторно има застој во преговорите за заложниците, каде посредува Катар.
Американскиот сенатор Марко Рубио неодамна ги отфрли критиките кон Катар, нагласувајќи дека Доха одиграла корисна улога во тие преговори.
Критичарите укажуваат на блиските врски на Катар со Хамас и неговото финансирање на појасот Газа, што, според нив, индиректно ѝ овозможило на организацијата да го зајакне својот арсенал за напади врз Израел.
Катар возвраќа дека и Израел и САД лобирале кај нив да исплаќаат средства за да се избегне хуманитарна криза во Газа.
Во меѓувреме, неколку помошници на израелскиот премиер се под истрага за наводни активности поврзани со заливската држава.
Свет
Зеленски ги посети војниците на бојното поле: „Тие се борат против платеници од Азија и Африка“

Претседателот на Украина, Володимир Зеленски изјави дека руските сили што се борат во близина на градот Вовчанск во Харковската област вклучуваат странски платеници од Кина, Таџикистан, Узбекистан, Пакистан и неколку африкански земји.
За време на посетата на 57. Одделна моторизирана пешадиска бригада, која го брани секторот Вовчанск, Зеленски се сретна со командантите за да разговара за ситуацијата на бојното поле, борбените операции и потребата од пешадија.
Во Вовчанск, кој е на само пет километри од руската граница, се водат интензивни борби откако Русија почна нова копнена офанзива во регионот Харков во мај 2024 година.
„Војниците на овој фронт го забележуваат учеството на платеници од Кина, Таџикистан, Узбекистан, Пакистан и африканските земји во војната. Ние ќе одговориме“, рече Зеленски.
Тој додаде дека разговарал за регрутирање и зголемување на пристапот до технологијата на беспилотни летала, клучен фактор во тековните напори на Украина за одбрана и извидување.
Во април, Зеленски рече дека „неколку стотици“ кинески граѓани учествуваат во војната на страната на Русија. Кина негираше вмешаност, велејќи дека ги повикува своите граѓани да избегнуваат вооружен конфликт. Москва, исто така, употреби околу 12.000 севернокорејски војници распоредени од Пјонгјанг за да се спротивстави на украинската инвазија на регионот Курск.
Регион
(Видео) Невреме во Црна Гора: Сè беше забелено

Невремето што денес ја погоди околината на Колашин во Црна Гора донесе неочекувани сцени за првиот дел од август, сè е покриено како со бела покривка, пишуваат медиумите во регионот.
Сепак, според написите, не станува збор за снег, туку за град што падна низ целата област.
Според проценките, на некои места слојот на град достигнува и до 15 сантиметри.
Овој августовски пејзаж е вистинска реткост во овој дел и не се памети во поновата историја, пренесуваат медиумите.
Дел од скијачките патеки исто така беше покриен со град, а невремето предизвика значителни штети на планинските патишта, што претставува дополнителен предизвик за локалните жители и туристите.
Фото: принтскрин