Техеран е подготвен да се одбрани од какво било мешање и закани, а целиот воен потенцијал е подготвен да ја одбрани земјата, изјави синоќа иранскиот министер за надворешни работи, Абас Аракчи.

„Целиот наш воен потенцијал е подготвен да ја брани земјата, немаме намера да станеме закана за регионот околу нас, но решително ќе се браниме од секоја закана и секое посегнување“, рече Аракчи на прием во иранската амбасада во Москва по повод Денот на иранската армија, пренесе РИА Новости.

Иранскиот министер ја даде оваа изјава во екот на подготовките за втората рунда индиректни преговори меѓу Иран и Соединетите Американски Држави за иранската нуклеарна програма, како и изјавата на американскиот претседател Доналд Трамп дека доколку нема договор, Иран треба да очекува „невидено бомбардирање“.

Аракчи вчера пристигна во посета на Москва, а претходно се сретна со рускиот претседател Владимир Путин, на кого му пренесе порака од врховниот лидер на Иран, ајатолахот Али Хамнеи.

Според Аракџи, со рускиот лидер биле разгледани индиректните преговори меѓу Иран и САД, како и голем број други прашања. Шефот на иранското Министерство за надворешни работи денес ќе разговара со рускиот министер за надворешни работи, Сергеј Лавров.

Индиректни разговори меѓу претставникот на американскиот претседател за Блискиот Исток, Стив Виткоф, и иранскиот министер за надворешни работи, Абас Аракчи, се одржаа на 12 април во главниот град на Оман, Мускат.

Според специјалниот пратеник на американскиот лидер, разговорите биле позитивни и конструктивни. Аракчи, исто така, ја опиша атмосферата на овие разговори како конструктивна и мирна, а по разговорите објави дека втората рунда преговори меѓу Иран и САД ќе се одржи во сабота, на 19 април.

Соединетите Американски Држави им презентираа на Украина, Русија и Европа „рамка за траен и одржлив мир“, изјави портпаролката на американскиот Стејт департмент, Теми Брус.

Истиот ден, потпретседателката на украинската влада и министерка за економија, Јулија Свириденко, извести дека САД и Украина потпишале меморандум во врска со договорот за минерали, кој сè уште треба да се финализира. Претставници на Белата куќа претходно нагласија дека договорот е клучен за напредок во мировните преговори.

„Американскиот претседател Доналд Трамп и Соединетите Американски Држави сакаат да ја завршат оваа војна и сега поставија рамка за траен и одржлив мир за сите страни“, рече Брус. Според неа, предлогот им бил презентиран на украинските и европските претставници во Париз, додека американскиот државен секретар Марко Рубио го пренел истиот на Русија во телефонски разговор.

„Рубио разговараше со рускиот министер за надворешни работи Сергеј Лавров. Државниот секретар му ја пренесе истата порака на својот руски колега што американската делегација им ја пренесе на украинските претставници и на нашите европски сојузници во Париз“, рече Брус. Таа додаде дека американскиот предлог бил позитивно примен во Париз.

„Охрабрувачките реакции на предлогот на САД во Париз покажуваат дека мирот е можен, ако сите страни се навистина посветени на постигнување договор“, рече Брус.

Досега, САД одржаа одделни разговори со Украина и Русија во Саудиска Арабија со цел постигнување примирје. Украинскиот претседател Володимир Зеленски на 6 април изјави дека Русија го отфрла безусловното примирје бидејќи сака да продолжи со ракетните напади од Црното Море. Москва досега покажа мала подготвеност за сериозни мировни преговори. Руските власти поставуваат максималистички барања во мировните преговори со Украина и САД.

Украина веќе го прифати предлогот на САД за целосно 30-дневно примирје, објавувајќи на 11 март дека е подготвена за договор доколку Русија се согласи. Сепак, Москва засега одбива.

Американскиот претседател Доналд Трамп изјави дека Украина и САД ќе потпишат договор за минерали следниот четврток, на 24 април.

„Украина и САД ќе потпишат договор за минерали следниот четврток“, рече Трамп.

Администрацијата на Доналд Трамп со месеци преговара со Украина за широк договор кој вклучува експлоатација на ретки минерали, а САД бараат значителни права на пристап и контрола врз украинските природни ресурси.

Украинската страна посочува дека е постигнат „значителен напредок“ во преговорите, но дека се уште траат разговорите за деталите и безбедносните гаранции.

Трамп го гледа овој договор како начин за враќање на дел од средствата инвестирани во воена помош за Украина, додека украинскиот претседател Зеленски бара јасни безбедносни гаранции во замена за отстапки за ресурсите. Некои од украинските власти изразуваат загриженост за американскиот притисок и можните максималистички барања од Вашингтон.

Договорот предизвика дискусии во Украина и меѓународните медиуми за економската и политичката независност на земјата и можните последици за украинската енергетска и рударска индустрија.