За нешто повеќе од два месеци, 30 српски државјани починаа во Грција, а срцевите проблеми се најчеста причина. Српски Телеграф истражувал кој е изложен на ризик и на кои симптоми треба да се внимава. Д-р Бисерка Обрадовиќ за Телеграф објасни која е можната причина за оваа загрижувачка бројка, како и зошто постарите лица и децата треба да бидат особено внимателни за време на одморите.

Според д-р Обрадовиќ, срцевите и мозочните удари најчесто се случуваат за време на летните одмори, претежно кај постарата популација, која, како што продолжува да вели, оди на море неподготвена, ненавикната на физичка активност, во овој случај пливање.

„Се случува луѓето во подоцнежните години, сакајќи да пливаат и да поминуваат време во вода што е можно повеќе, да го прават тоа неподготвени и да се впуштат во ненадејна физичка активност која, како што покажуваат овие статистики, може да биде фатална и смртоносна за нив“, објаснува докторката.

Имено, Генералниот конзулат на Србија во Солун издал вкупно 23 потврди за пренос на смртни останки на српски граѓани од 1 јуни 2025 година. Во повеќето случаи, причина за смртта била миокардна исхемија, пишуваат српските медиуми. Исто така, се додава дека од јуни, Амбасадата на Србија во Атина издала седум потврди за пренос, од кои две се смртни случаи со давење во морето.

Ненадејното влегување во вода може да биде ризично за секого, односно ги погодува сите без оглед на возраста.

„Нашето тело се загрева за време на престојот на плажа. Ние, така загреани, влегуваме во вода што е 10 степени поладна од температурата на нашето тело. Се случува тогаш нашето тело, сакајќи да ја одржи својата температура, одеднаш да ги стесни крвните садови, а тоа потоа доведува до прекин на работата на срцевиот мускул или мозокот“, објаснува д-р Обрадовиќ за самиот процес што води до фатални последици, па дури и смрт.

Исто така е опасно, вели докторот, ако претерано се сончаме, што може да доведе до хеморагија или крварење или истекување на крв од крвните садови.

Д-р Бисерка Обрадовиќ нагласи дека никогаш не треба да се влегува во вода со полн стомак и дека најризичната група се постарите лица и децата, кои се изложени на поголем ризик од смрт од другите ако не ги почитуваат сите потребни правила и не го слушаат своето тело.

„По јадење, не треба да влегуваме во вода најмалку 40 минути, но исто така е важно да се каже дека не треба да се пие ладен пијалок веднаш по јадењето, што може да доведе до побавно варење и, следствено, до надуеност, па затоа пливањето не доаѓа предвид“, рече докторот, додавајќи дека кардиоваскуларните пациенти исто така треба да бидат внимателни, како и сите оние кои веќе имаат одредена болест, која може особено да се активира со изложување на сонце и ненадејна физичка активност и да доведе до уште полоша здравствена состојба.

Докторот објасни и кога е најдобро време за одење на плажа, а кога во текот на денот апсолутно не треба да бидеме на сонце или во вода.

„Најидеално време за одење на плажа е пред 10 часот наутро, а по 16 часот, додека апсолутно не треба да бидеме на сонце и на плажа помеѓу 11 и 15 часот. Во тој период, дури ни чадор за сонце не помага и најдобро е да се повлечеме во нашите соби“, советува д-р Бисерка.

Докторот наведува дека мора да носиме очила, шапка и постојано да ја мокриме главата, но таа исто така истакнува дека нашата кожа памти сè, па прекумерното сончање може да ни го земе данокот дури и по 10 години, кога можат да се појават тумори на кожата.

фото: принтскрин

Дваесет и осумгодишен маж вчера избега од Општата болница во Костур во Грција, каде што беше задржан под полициска придружба по операцијата. Во тек е општа потрага по него, па властите апелираат до јавноста да отори четири очи.

Според извештаите на грчките медиуми, затвореникот, државјанин на Албанија, ја искористил небрежноста на двајца полицајци кои го чувале. Наводно, тој успеал да избега кога му дозволиле да излезе надвор на цигара.

Мажот неодамна беше уапсен за кршење на законот за странци, поседување дрога и непослушност, додека против него се водеа неколку многу сериозни судски постапки – 12 години затвор и парична казна од 50.000 евра за кршење на законот за дрога, а за негово апсење има и налог од Апелациониот суд во Солун.

Полицијата интензивно го бара на северот од земјата, со континуирани проверки на раскрсниците, патиштата и возилата што се движат кон Лерин, Кожани и границата со Албанија. Во исто време, се истражуваат околностите под кои затвореникот успеал да избега, додека случајот покрена прашања за начинот на кој бил приведен.

Треба да се напомене дека бегалецот неодамна бил повреден во обид да избега преку нерегулиран граничен премин кон Албанија со помош на 29-годишен сонародник, при што ја скршил ногата и бил префрлен во болница во Костур на операција, од каде подоцна успеал да избега.

Српскиот претседател Александар Вучиќ, во понеделник вечерта, во продолжението на антивладините протести што се одржуваат во цела Србија, изјави дека државата „ќе ги прогонува демонстрантите многу повеќе, побргу и посилно и ќе воспостави ред“, а западните медиуми остро пишуваа за политиката на Вучиќ.

Во текот на вечерта Вучиќ ги посети просториите на владејачката Српска напредна партија (СНС) во белградската општина Палилула, каде што беа скршени прозорци за време на протестите во понеделникот, и рече дека ова е „показател за тоа со какви насилници и силеџии“ се справува државата. Тој додаде дека демонстрантите „немаат што да им понудат на луѓето, освен насилство, бандитство и уништување“.

Антивладини протести се одржаа во цела Србија во понеделникот вечерта, а светските медиуми оценија дека Вучиќ усвоил стратегија на страв со тоа што ги извел хулиганите и приватното обезбедување на улиците спротивставувајќи им се на демонстрантите.

„Ле Монд“: Ситуацијата потсетува на Киев 2013 – 2014 година
Францускиот весник „Ле Монд“ ја споредува ситуацијата во Србија со настаните во Киев 2013 – 2014 година кога хулигани и полицајци во цивил беа искористени за предизвикување насилство.

Според весникот, од вторникот минатата недела во неколку градови избувнаа судири меѓу поддржувачите на владата и демонстрантите.

Маскирани напаѓачи ги демолираа канцелариите на Српската напредна партија во неколку градови, видеа од насилни апсења се објавени на социјалните мрежи, а властите ја обвинуваат опозицијата дека се обидува да ја уништи Србија и да предизвика граѓанска војна, го цитираат францускиот весник, белградските медиуми.

„Ле Монд“ нè потсетува дека протестите во Србија траат веќе девет месеци откога 16 лица загинаа при уривање настрешник на железничката станица во Нови Сад во ноември минатата година, што јавноста го протолкува како последица на широкораспространета корупција.

Протестите беа упорно предводени од студентско движење, кое сега бара Вучиќ да распише предвремени избори ставајќи го во ситуација во која мора да се соочи со пад на поддршката, дури и кај до неодамна лојалниот избирачки корпус.

Весникот исто така наведува дека Вучиќ ги обвинува странските служби за обид за обоена револуција и се потпира на пасивноста на европските престолнини.

„Фајненшл тајмс“: Балансирањето на Вучиќ на домашната и на глобалната сцена
Британскиот „Фајненшл тајмс“ (ФТ) пишува дека по децении на власт, ветераните на авторитарните режими неизбежно се соочуваат со прашањето дали да ја зголемат репресијата, да го зајакнат својот круг на капиталистички пријатели и да ги истиснат остатоците од независните медиуми или да се поклонат пред повиците на опозицијата за реформи и дека Александар Вучиќ сега се соочува со токму овој избор, пишува ФТ.

„Автократите секогаш се одлучуваат за првиот пристап и стануваат потврдокорни. Сега Вучиќ се соочува и со антивладини протести на улиците на главниот град. Осум години како претседател на Србија, а пред тоа како премиер, владееше со интервенционистичка рака, но водеше повеќе управувана демократија отколку целосна автократија“, пишува британскиот весник истакнувајќи дека Вучиќ слично лукаво балансирал на глобалната сцена.

Според „Фајненшл тајмс“, пренесува белградската агенција „Фонет“, претседателот на Србија има срдечни односи со Москва, но не е толку пријателски расположен кон неа, што би ги „разбеснило“ Европската Унија и САД, покрај продажбата на оружје на Украина, а му се додворуваше на Пекинг за милијарди долари кинески инвестиции во индустријата и инфраструктурата.

Весникот исто така укажува на кокетирањето на Вучиќ со лидерите на евроблокот, Урсула фон дер Лајен или францускиот претседател Емануел Макрон, не само поради најавата за можноста европските рударски компании да ги експлоатираат наоѓалиштата на литиум во Србија.

Според „Фајненшл тајмс“, Вучиќ изградил добри односи и со блиски соработници на Доналд Трамп за време на првиот мандат на американскиот претседател.

Си-ен-ен: Протестите го оспоруваат сè поавтократското владеење на Вучиќ
„Фрустрацијата поради неговото неодговорно и нетранспарентно владеење се претвори во протести, предизвикани од уривањето на настрешникот на железничката станица во Нови Сад минатиот ноември, при што загинаа 16 лица. Станицата ја реновираа кинески компании како дел од иницијативата „Појас и пат“, а противниците на Вучиќ за уривањето ги обвинуваат државната корупција, лошото управување и слабиот надзор, кои ги сметаат за обележја на неговиот режим“, пишува ФТ.

Американската мрежа Си-ен-ен се осврнува на едно од низата јавни обраќања на Вучиќ во неделата кога тој најави строги мерки против антивладините демонстранти по деновите улични немири во Србија, кои го доведоа во прашање неговото сè поавтократско владеење.

Во едно од неговите чести телевизиски обраќања до јавноста Вучиќ ги обвини демонстрантите за чист тероризам и ги повтори своите тврдења дека повеќемесечните постојани протести против неговата влада биле оркестрирани од Западот и имале цел уништување на Србија, објавува Си-ен-ен.

Протестите во Србија продолжуваат од утро до мрак, а студентите – по неколкуте масовни собири во целата земја, кои заедно со другите во Белград на 15 март собраа стотици илјади луѓе – навестија реприза оваа есен, најверојатно, во септември.

фото: принтскрин