Свет
САД: Ќе продолжиме да притискаме за прекин на огнот и ослободување на заложниците

Администрацијата на американскиот претседател Џо Бајден ќе вложи максимални напори за да обезбеди ослободување на заложниците што ги држеше Хамас во Газа, вклучително и американски државјани кои се водат за исчезнати, изјави висок претставник на администрацијата по прекинот на разговорите во Катар.
Белата куќа објави дека една Американка и седум мажи се исчезнати по нападот на Хамас врз Израел на 7 октомври.
Досега, четворица Американци се ослободени од почетокот на војната: 4-годишната Абигејл Едан на 26 ноември; Лиат Беинин 29 ноември; и Џудит Таи Раанан и нејзината 17-годишна ќерка Натали Раанан, на 20 октомври.
„Одговорност на Хамас е да ги исполни условите од договорот и да ги ослободи овие млади жени без одлагање“, рече претставникот. Одбивањето не само што ги прекршува условите од договорот првично постигнат од Израел и Хамас, туку е „целосно неприфатливо“ со оглед на „веродостојните наводи за сексуално насилство поврзани со Хамас и злосторствата од 7 октомври“, додаде тој.
Си-Ен-Ен објави дека израелската полиција користи форензички докази, видео снимки и изјави на сведоци и сослушува осомничени за да ги документира случаите на силување во време на нападот на Хамас врз Израел на 7 октомври. Жените и девојчињата фатени во дивеењето биле сексуално малтретирани, но и физички измачувани и убиени, велат очевидци на настанот.
Полицискиот надзорник Дуди Кац рече дека полицајците собрале повеќе од 1.000 изјави и повеќе од 60.000 видео клипови поврзани со нападите, кои вклучуваат изјави од луѓе кои пријавиле дека виделе жени како ги силуваат. Тој додаде дека истражителите немаат сведоштва од прва рака и не е јасно дали некоја жртва на силување преживеала.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кремљ: Путин му се јави на Нетанјаху, разговараа за Сирија и Иран

Претседателот на Русија, Владимир Путин разговараше по телефон со израелскиот премиер Бенјамин Нетанјаху, објави прес-службата на Кремљ. Според руските власти, лидерите на двете земји разговарале за напнатата ситуација на Блискиот Исток.
„Руската страна ја потврди својата цврста позиција во корист на исклучиво мирно решавање на проблемите и конфликтите што постојат во регионот“, вели Кремљ. Путин ја нагласи важноста од поддршка на единството, суверенитетот и територијалниот интегритет на Сирија.
Рускиот претседател, исто така, ја изрази подготвеноста на Русија да помогне во наоѓањето преговарачки решенија поврзани со нуклеарната програма на Иран.
Свет
Напад со нож во Лондон. Двајца мажи убиени, осомничениот во сериозна состојба

Двајца мажи починаа, а двајца други се хоспитализирани по насилниот инцидент во центарот на Лондон вчера. Еден од хоспитализираните мажи е приведен под сомнение дека е поврзан со нападот.
Метрополитенската полиција извести дека добила повик за напад во Саутерк околу 13 часот во понеделник. На местото на настанот, пронашле четири лица со убодни рани. 58-годишен маж починал на лице место, додека преостанатите три лица биле итно префрлени во болница. 27-годишен маж подоцна им подлегнал на повредите.
Третиот повреден маж, на возраст од триесет години, сè уште е на болничко лекување, а неговите повреди не се опасни по живот. Четвртиот маж, исто така во триесеттите години, беше приведен како осомничен, но и тој е во болница во животозагрозувачка состојба.
„Нашата истрага е во рана фаза и работиме напорно за да ги расветлиме сите околности околу овој шокантен инцидент“, рече детективката началничка на полицијата Ема Бонд. „Во овој момент, не веруваме дека инцидентот е поврзан со тероризам и дека нема понатамошна опасност за јавноста“.
Советничката од Саутерк, Наташа Енин, изрази сочувство до семејствата на жртвите. „Ужасната сум и длабоко тажна од смртта на двајцата мажи. Моето искрено сочувство до нивните семејства и пријатели“, рече таа.
Свет
Кина нуди 500 евра годишно за секое дете во период од три години за да го поттикне наталитетот

Поради заканувачката демографска криза, Кина почна да им нуди финансиска помош на родителите за да ги поттикне раѓањата. Новата мерка предвидува родителите да добиваат околу 3600 јуани (околу 465-500 евра) годишно за секое дете помладо од три години.
Тоа значи дека за цел период од три години, по едно дете родителите може да добијат вкупно околу 10.800 јуани, односно приближно 1500 евра. Субвенцијата ќе се плаќа и ретроактивно, па семејствата со деца родени од 2022 година наваму може да аплицираат за помош.
Оваа мерка е дел од пошироките напори на кинеската влада да го зголеми паднатиот наталитет, и покрај укинувањето на политиката на едно дете пред речиси една деценија. Во моментов, трошоците за одгледување деца во Кина се меѓу највисоките во светот, па државата се обидува да им помогне на семејствата да ги покријат овие трошоци.
Локалните власти веќе имаат слични иницијативи, како во градовите Хоххот и Шењанг каде се нудат дополнителни финансиски стимули за семејства со повеќе деца.
Сепак, официјалните податоци покажуваат дека популацијата на Кина опаѓа по трет пат по ред, а населението старее, што дополнително ја зголемува загриженоста за иднината на земјата.