Италијанскиот проевропски претседател, Серџо Матарела, се сретна утрово со привремениот премиер што лично го назначи за разговори во врска со кризата во време кога земјата е решена да оти на предвремени избори кои би значеле проблеми за еврото, пренесува британски „Дејли експрес“. Италија, третата најголема економија во еврозоната, е во политичка криза откако двете популистички партии Пет ѕвезди и Лега беа спречени да формираат влада.

Кризата го предизвика најголемиот пад на еврото на најниско ниво во последните 10 месеци во однос на доларот. Хаосот почна во понеделникот кога Матарела ја спречи популистичката коалиција да формира нејасен, антиевропски сојуз, ставајќи вето на назначувањето на професорот Паоло Савона, познат противник на еврото, како министерство за економија. Наместо тоа, Матарела му даде мандат на поранешниот претставник на ММФ и еврофил Карло Котарели да формира привремена влада од технократи.

Но, Матарела може да реши да не назначи технократска влада, што би значело дека Италија вторпат ќе излезе на избори на кои најверојатно ќе се зголеми популарноста на популистичките партии Пет ѕвезди и Лега. Котарели досега не успеа да добие поддршка од ниедна голема партија. Извори блиски до дел од главните партии во Италија велат дека сега има шанса Матералела да го распушти парламентот и да ги врати Италијанците на избори најдоцна до 29 јули – помалку од четири месеци по неодлучните избори на 4 март.

Новите избори најверојатно ќе се претворат во гласање довербата на еврозоната во Италија, а некои играчи на пазарот се плашат дека изборите ќе станат де факто референдум за единствената валута и за улогата на Италија во ЕУ. Сепак, некои италијански весници пишуваат дека е можен договор во последен момент за да се избегнат повторни избори и да се воспостави владејачка коалиција на двете антиестаблшментски партии.

Од друга страна, анкетите покажуваат дека предвремените избори веројатно ќе обезбедат уште поголем број гласови за антиестаблишментските партии. Последната анкета на ИПСОС само ги поттикна предвидувањата дека интервенцијата на Матарела ќе им донесе повеќе гласови на популистите фрлајќи сенка врз иднината на Италија во еврозоната.

Анкетата објавена утринава покажа дека поддршката за десничарската партија Лега се зголемила за осум отсто на 25,4 % во споредба со нејзиниот резултат за време на изборите на 4 март. Истражувањето на ИПСОС за „Кориере дела сера” покажа дека поддршката за Движењето пет ѕвезди е стабилна на околу 32,6 отсто.