Британскиот здравствен систем се соочува со сериозни проблеми и често не успева адекватно да одговори на потребите на граѓаните, а еден од најпотресните примери доаѓа од Лестершир.

Во сведоштво за „Метро“, синот на починатата жена отворено го сподели болното искуство, кое укажува на преоптовареноста на службите за итна медицинска помош.

„Додека мајка ми лежеше на подот, во болки и лишена од достоинство, ме праша: ‘Кога ќе дојде помошта?’ Тие зборови засекогаш ќе ме прогонуваат, бидејќи не знаев што да ѝ одговорам, ниту можев да ѝ понудам утеха каква што заслужуваше,“ раскажува синот, чие мајка Џеки (78) починала од сепса.

Сè се случило на 10 јули 2022 година, кога Џеки паднала во својот дом и го активирала алармот за итни случаи. Синот веднаш дошол и ја затекнал како лежи неподвижна на подот од спалната соба. Пријателот кој бил со него се јавил на итната помош — во 5 часот наутро.

„Нè предупредија дека чекањето може да трае и до 10 часа, но нè уверија дека тоа сигурно нема да се случи. Мајка ми се жалеше на болка во ребрата, па по нивна препорака, ја оставивме да лежи без да ја поместуваме,“ објаснува тој.

Но, помошта не пристигнала. Во текот на следните 11 часа, синот повеќепати се јавувал на бројот 999, барајќи да се ажурира итноста на случајот.

„Им велев дека мајка ми е стара, повредена, во болки и плаче. Секојпат го добивав истиот одговор – некој ќе дојде што е можно побрзо,“ раскажува тој.

Чувството на немоќ било поразително.

„Се двоумевме дали сами да ја однесеме во болница, но ни рекоа да не ја мрднуваме поради ризик од внатрешни повреди. Времето минуваше, а надежта слабееше.“

Кога конечно пристигнал првиот медицински техничар, веднаш повикал амбулантна екипа. Итната помош стигнала по половина час. Персоналот бил човечен и професионален — но немоќен.

Џеки била пренесена во болница. На почеток изгледало дека ќе закрепне, но следното утро синот добил повик да дојде веднаш.

Инфекцијата, која на почеток не се поврзувала со падот, брзо преминала во сепса. Неговата сестра итно допатувала од Дубаи и стигнала точно на време да се прости. Џеки починала истата вечер — само 48 часа по падот.

„Сè се случи многу брзо, а сепак имав чувство дека времето застана. Кога таа ноќ излегов од болница, бев скршен. Не можев да сфатам како од обичен разговор стигнавме до загуба — за само два дена,“ вели тој.

Во неделите по нејзината смрт, болката се претворила во гнев.

„Почнав да истражувам колку чекаат луѓето на итна помош и бев шокиран — нашата приказна не е единствена. Илјадници луѓе во Британија го доживуваат истото, а некои, за жал, и сличен крај.“

Според The Health Foundation, бројот на пациенти кои чекале над 12 часа на прием достигнал рекордни нивоа. Доцнењата при предавањето пациенти меѓу амбулантите и болниците биле полоши отколку во која било претходна зима.

„Зад секоја бројка се крие човек, семејство, болка — како нашата,“ вели тој. Тоа сознание го поттикнало да се активира.

Оттогаш, станал еден од најгласните активисти за реформа на здравствениот систем. Се залага за повеќе финансирање, пократко чекање на итната помош и целосна реформа на социјалната грижа.

Тој денес јавно зборува за семејната трагедија, се приклучил на групи како Just Treatment, и постојано апелира до надлежните: „Ниту едно семејство не смее да минува низ ова. Системот мора да се промени – и тоа веднаш.“

Катарскиот премиер Мохамед бин Абдулрахман Ал-Тани вчера изјави дека неговиот израелски колега Бенјамин Нетанјаху мора да биде изведен пред лицето на правдата откако израелскиот напад врз лидерите на Хамас во Доха во вторникот „ја убило секоја надеж“ за ослободување на заложниците во Газа.

Ал-Тани додаде дека Катар преиспитува сè во врска со својата улога како посредник во досега неуспешните разговори насочени кон прекин на огнот во конфликтот предизвикан од нападот на Хамас на 7 октомври 2023 година. Израелските воздухопловни сили во вторникот ги погодија лидерите на Хамас кои се состанаа во комплекс во Доха, главниот град на сојузник на САД кој редовно е домаќин на разговорите.

„Мислам дека она што го направи Нетанјаху беше да ја убие секоја надеж за заложниците“, рече Ал-Тани во изјава за „Си-ен-ен“, додавајќи дека Нетанјаху „мора да биде изведен пред лицето на правдата“. Нападот, исто така, предизвика ретки критики од американскиот претседател Доналд Трамп, близок сојузник на Израел, кој рече дека е многу незадоволен поради тоа и дека потегот е неразумен.

Нетанјаху ги предупреди катарските власти: „Им велам на Катар и на сите нации што засолнуваат терористи: мора или да ги протерате или да ги изведете пред лицето на правдата. Бидејќи ако не го сторите тоа, ние ќе го сториме тоа“. Хамас, кој е во војна со Израел во Појасот Газа, тврди дека неговите насочени високи функционери преживеале, но дека шест лица биле убиени во израелските напади.

Чaрли Кирк (31), влијателен десничарски активист, близок до американскиот претседател Доналд Трамп и извршен директор на организацијата Turning Point USA (TPUSA), е мртов. Тој беше застрелан во вратот околу 12:25 часот по локално време за време на настан на Универзитетот во Јута Вали.

Видеата што кружат на социјалните мрежи го покажуваат моментот кога беше застрелан додека зборуваше под шатор во дворот на универзитетот, пред собрана публика од 3.000 луѓе и обезбедување од 6 полицајци. Кирк таму настапи како дел од турнејата American Comeback, организирана од локалниот огранок на TPUSA. Тој беше префрлен во болница во критична состојба, каде што почина.

Осомничениот за убиството на Кирк е уапсен, потврди ФБИ неколку часа по атентатот. Првично беше уапсено погрешно лице, кое набрзо беше ослободено.

Смртта на Чарли Кирк ја потврди американскиот претседател Доналд Трамп.

„Големиот, па дури и легендарниот Чарли Кирк е мртов. Никој не го разбираше или не го имаше срцето на младите на Соединетите Американски Држави подобро од Чарли. Сите го сакаа и се восхитуваа, особено јас, а сега го нема. Меланија и јас им упатуваме сочувство на неговата прекрасна сопруга Ерика и семејството. Чарли, те сакаме!“, напиша тој на „Тру соушал“.

Трамп потоа изрази длабока тага и гнев поради убиството на конзервативниот активист, нарекувајќи го атентатот „темен момент за Америка“. Трамп го опиша Кирк како „патриот кој го посвети својот живот на борба за отворена дебата и за земјата што толку многу ја сакаше, Соединетите Американски Држави“.

„Чарли инспирираше милиони, а вечерва сите што го познаваа и го сакаа се обединети во шок и ужас“, рече Трамп. „Тој е пример за вистината и слободата, и никогаш немало некој толку почитуван меѓу младите“.

Трамп, исто така, ја истакна „длабоката вера“ на Кирк, велејќи: „Чарли беше и човек со длабока, длабока вера. Се утешуваме знаејќи дека тој сега е во мир со Бога на небото“. Додаде дека го замолил Бога да ги чува сопругата и децата на Кирк „во ова ужасно време на болка и страдање“.

Во продолжение на изјавата, Трамп вети дека неговата администрација ќе преземе решителни чекори против политичкото насилство.

„Ќе го најдеме секој што придонел за ова злосторство и друго политичко насилство“, изјави тој. Трамп конкретно ја обвини „радикалната левица“ за насилството од кое „страдале премногу невини луѓе“, споменувајќи го обидот за атентат врз него и убиството на извршниот директор на „ЈунајтедХелткер“, Брајан Томпсон, минатата година.

Американскиот конгресмен Џејсон Чафец, кој беше на настанот со својата ќерка, за Fox News изјави дека насилството било „шокантно“.

„Сите се фрлија на подот и избегаа“, рече Чафец. „Куршумот падна право во него“. Тој откри дека разговарал со Кирк непосредно пред почетокот на натаснот.

По пукањето, луѓето почнаа да бегаат во паника и следеше хаос.