Свет
Свадба во Иран – големо жариште на коронавирус
Свадбена прослава придонела за ново ширење на заразата со коронавирус во Иран, рекол претседателот Хасан Рохани, но нагласил дека земјата нема други можности освен да ја остави својата економија отворена наспроти предупредувањата за втор бран на епидемијата.
Иран, кој од средината на април постепено ги ублажува мерките на карантин, изминатите денови информира за нагло дневно зголемување на нови случаи. Вкупната бројка од 3.574 нови случаи во четвртокот била највисока од февруари, кога е објавена епидемијата.
„На едно место бевме сведоци за врвот на оваа епидемија, чиј извор бил венчавка, што им предизвикало проблеми на луѓето, здравствените работници и загуби за економијата и здравствениот систем на земјата“ рекол Рохани на состанокот на националниот одбор за борба против епидемајата во Техеран. Тој не кажал каде и кога се одвивала свадбата.
Вкупниот број на заболени од коронавирус во Иран е 169.425, а на починати 8.209. Здравствените власти велат дека 70 проценти од новите случаи во Техеран се меѓу оние кои изминатите денови патувале надвор од главниот град.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шолц: Мандатот на Трамп ќе претставува предизвик за Европа
Германскиот канцелар Олаф Шолц денеска изјави дека мандатот на американскиот претседател Доналд Трамп ќе претставува предизвик за Европа, наведувајќи дека таа мора да остане силна во светот на големи промени.
Шолц им рече на новинарите во Париз, каде што се сретна со францускиот претседател Емануел Макрон, дека Европа мора да биде силна и издржлива во светот на големи промени, објави Ројтерс.
„Претседателот Трамп, тоа е веќе јасно, ќе претставува предизвик“, рече Шолц.
Тој предупреди дека треба да останеме со „ладна глава“ во арената на социјалните мрежи кои ги прикажуваат работите како да сме „на работ на нервен слом“.
„Ниту една прес-конференција во Вашингтон или твит не треба да не турка во жестоки дебати за тоа каде сме и што ни се случува“, додаде германскиот канцелар.
„Ова е особено точно по неодамнешната промена на власта во Вашингтон. Да бидеме јасни: Америка е наш клучен сојузник, ќе направиме се што е во наша моќ да остане така, но тоа е во наш заеднички интерес и таа соработка останува клучна за глобалниот развој. Но, јасно е дека Трамп и неговата администрација ќе го држат светот во неизвесност во наредните години на полето на енергијата, одбраната, климатските промени, трговијата. Трамп сето тоа го најави и потврди и претходно. Но, ние сме во состојба да се справиме со тоа и ќе се справиме, оцени Шолц.
Регион
Вучиќ: Веднаш да му подигнеме споменик на Трамп ако ја сопре војната во Украина
Претседателот на Србија, Александар Вучиќ, од Светскиот економски форум во Давос го даде своето мислење за решавање на украинскиот конфликт што го најави новиот американски претседател Доналд Трамп.
„Чекаме да видиме што ќе направи Трамп, утре да зборуваме тука од Давос. Шолц и Макрон се состануваат денеска, ги подготвуваат своите одговори, има многу проблеми и многу непознати во равенката. Доколку Трамп постигне прекин на огнот во Украина, сите треба му подигнеме споменик, ќе ја спаси цела планета. Господ нека ни е на помош“, рече српскиот претседател од Давос.
Вучиќ во Давос изјави и дека Србија е на европскиот пат, но дека треба во голема мера да се сврти и кон Азија, бидејќи од таму најмногу ќе се инвестира во наредниот период.
„Ние сме на европскиот пат и важно е нашата земја да ги забрза реформите, владеењето на правото и други работи, но сите бараат излез од економската ситуација што е можно повеќе во Азија и Африка, особено во Азија, па и ние мора да се свртиме на таа страна“, нагласи Вучиќ.
Свет
Гутереш го повика Иран да се откаже од развојот на нуклеарно оружје
Иран мора да го направи првиот чекор кон подобрување на односите со земјите од регионот и со Соединетите Американски Држави, со тоа што јасно ќе стави до знаење дека нема цел да развие нуклеарно оружје, изјави денеска генералниот секретар на Обединетите нации, Антонио Гутереш.
Зборувајќи за ситуацијата на Блискиот Исток на Светскиот економски форум во Давос, тој рече дека се надева оти Иран ќе се ангажира конструктивно со другите земји во регионот.
Во врска со Појасот Газа, Гутереш рече дека се надева оти конфликтните страни ќе разберат дека ќе имаат корист од траен прекин на огнот, што може да го отвори патот за преговори за решение со две држави.
Гутереш ги повика израелските безбедносни сили да покажат максимална воздржаност на окупираниот Западен Брег, каде што почнаа голема воена операција во Џенин.