Свет
Северна Кореја тестира нова хиперсонична ракета

Северна Кореја тврди дека успешно тестирала нова хиперсонична ракета наречена „Хвасонг-8“.
Државните медиуми наведуваат дека новата ракета е еден од петте најважни нови системи за оружје, планирани во петгодишниот план за воен развој.
Пјонгјанг ја квалификува новата ракета како стратешко оружје, што значи дека таков проектил може да носи и нуклеарни бојни глави, се наведува во извештаите на светските медиуми.
Тестирањето е нов показател за технолошкиот напредок во производството на оружје и покрај строгите меѓународни санкции.
Севернокорејската државна новинска агенција известува дека развојот на овој систем за оружје ја зголемил способноста на нацијата да се брани на секој начин и дека пробното лансирање ја потврдило успешната навигациска контрола и стабилност на проектилот.
Според експертите, хиперсоничните ракети се многу побрзи и поагилни од ракетите од претходната генерација, што значително ја отежнува ефикасната работа на непријателските системи за рано пресретнување и ракетна одбрана.
Севернокорејскиот лидер, Ким Џонг-ун, во јануари рече дека научниците завршиле со истражувањата во процесот на развој на хиперсонични ракети способни за успешно избегнување на системите за противракетна одбрана, а вчерашното тестирање беше првиот тест на таква ракета.
Набргу по лансирањето на новата хиперсонична ракета „Хвасонг-8“, севернокорејскиот пратеник Ким Сонг го бранеше правото на неговата земја да развива оружје.
Говорејќи на годишното Генерално собрание на ОН во Њујорк, тој рече дека Северна Кореја гради национална одбрана со цел да се брани и сигурно да ги заштити безбедноста и мирот на земјата.
Јужна Кореја неодамна ја тестира својата прва балистичка ракета лансирана од подморница за која се вели дека е неопходна како средство за одвраќање на провокациите на Северна Кореја, а Пјонгјанг постојано го обвинува Сеул за двојни стандарди во однос на воените активности.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.
Свет
Руската служба за разузнавање: На состанок во Алпите, претставници на САД и Велика Британија пронајдоа замена за Зеленски

Претставници на САД и Велика Британија одржаа состанок со високи украински функционери во Алпите, каде што разговараа за разрешувањето на Володимир Зеленски, соопшти прес-бирото на Службата за надворешно разузнавање (СВР) на Русија, пренесува РИА Новости.
„Беа разгледани перспективите за замена на Володимир Зеленски како претседател на Украина. Замената на Зеленски, во суштина, стана клучен услов за ресетирање на односите на Киев со западните партнери, првенствено со Вашингтон, и за продолжување на западната помош за Украина во конфликтот со Русија“, соопшти прес-службата.
На тајниот состанок присуствуваа началникот на кабинетот на претседателот на Украина, Андреј Јермак, директорот на Главната дирекција за разузнавање (ГУР) Кирил Буданов и амбасадорот на Киев во Лондон Валериј Залужни, пренесува медиумот.
Според службата, Американците и Британците ја објавиле одлуката за номинирање на поранешниот командант на вооружените сили на Украина за функцијата претседател на Украина, а Јермак и Буданов се согласија со овој чекор.
„Во исто време, тие добија ветувања од Британците дека нивните сегашни функции ќе бидат задржани, како и дека нивните интереси ќе бидат земени предвид при решавање на други кадровски прашања“, изјави разузнавачката служба, стои во написите.
Како што истакнува СВР, договорот за замена на Зеленски фрла светлина врз позадината на неговите обиди да ги ограничи овластувањата на украинските антикорупциски структури.
Минатата недела, украинските власти усвоија закон со кој се укинува независноста на две антикорупциски институции: Националното биро за борба против корупцијата на Украина (НАБУ) и Специјализираното обвинителство за борба против корупцијата (САП). Овој потег предизвика критики на Западот, а имаше и протести во Украина. После тоа, Зеленски поднесе нов нацрт-закон со кој се укинуваат претходните амандмани.
Фото: принтскрин
Свет
„Дедо, работи прво на Америка “: Медведев по ултиматумот на Трамп

Откако поранешниот претседател на Русија, Дмитриј Медведев изјави дека Доналд Трамп не може да му поставува ултиматуми на Владимир Путин, се огласи една од највлијателните луѓе во околината на Трамп, Линдзи Греам, пишуваат медиумите.
Греам му одговори на Медведев велејќи дека зборовите на Трамп треба да се сфатат сериозно.
„До оние во Русија кои веруваат дека претседателот Трамп не е сериозен во врска со прекинувањето на крвопролевањето меѓу Русија и Украина – наскоро жално ќе се излажете. Исто така, наскоро ќе видите дека Џо Бајден повеќе не е претседател. Ќе седите на масата за мир“, рече Греам.
Многу брзо следеше нов одговор од рускиот функционер.
„Не е до вас или Трамп да диктирате кога ќе седнеме на масата за мир. Преговорите ќе завршат кога ќе се постигнат сите цели на нашата воена операција. Работи на Америка прво, дедо“, рече Медведев.
Поранешниот руски претседател претходно, како што потсетуваат медиумите во своите написи, изјави дека Трамп, кој рече дека му дава на Путин 10-12 дена да ја заврши војната во Украина, сака да игра ултиматумска игра со Русија.
„Трамп ја игра ултиматумската игра со Русија: 50 дена или 10… Тој треба да запомни две работи: 1. Русија не е Израел, дури ни Иран. 2. Секој нов ултиматум е закана и чекор кон војна. Не меѓу Русија и Украина, туку со неговата сопствена земја. Не оди по патот на заспаниот Џо“, напиша Медведев.
Фото: принтскрин