Трагично заврши потрагата по 24-годишниот хрватски фудбалер Јаков Јелкиќ, кој исчезна рано наутро во саботата во Аликанте на источниот брег на Шпанија. Шпанската полиција го пронашла неговото тело на пристаништето Аликанте, со што се остварени најлошите стравови на семејството и пријателите.

По неколкудневна неизвесност, властите го открија телото на Јелкиќ во водата, а нуркачите од Цивилната гарда го извлекоа на брегот. Официјално е потврдено дека телото е пронајдено на крајот на едно од пристаништата. Во присуство на истражители процесот на извлекување на телото беше завршен вчера нешто пред 18.30 часот по локално време.

Иако резултатите од обдукцијата сѐ уште се чекаат, според полициски извори, прелиминарната истрага сугерира дека смртта е последица на несреќен случај и дека нема вмешаност на трето лице.

Исчезнувањето на Јаков Јелкиќ во саботата било пријавено во шпанската полиција откога му се изгубила секаква трага во ноќниот клуб „Упикум“ кај плоштадот Габриел Миро во Аликанте. Јелкиќ, кој имаше двојно швајцарско и хрватско државјанство, пристигна во градот еден ден порано со соиграчите од швајцарски фудбалски клуб од пониска лига.

Според неговите пријатели, по едно вечерно излегување, тој се вратил во клубот барајќи ја јакната што ја оставил таму, но никој од нив повеќе не го видел потоа. Следното утро, кога забележале дека не се вратил во хотелот, пријателите ја известиле полицијата, која почнала интензивна потрага.

Во рамките на истрагата прегледани се снимките од безбедносните камери од локации во надлежност на Градот, комплексот „Панорамис“ и Капетанијата на пристаништата. На снимката се гледа дека Јелкиќ се движи сам кон областа Дистрито Дигитал, дел од зоната на пристаништето во Аликанте. Набргу потоа му се изгубил сигналот од мобилниот телефон во оваа област, околу три часот наутро, пишува „Дијарио Аликанте“.

Кога истражителите ги утврдија последните познати движења на исчезнатиот млад човек, потрагата беше интензивирана, вклучително и снимки од воздушни дронови и пребарување на тимови со нуркачи. Клучен момент во истрагата се случил кога истражител од полициската управа во Аликанте забележал тело во водата, на речиси два метра под површината, на крајот на пристаништето, јавуваат шпанските медиуми.

Телото е идентификувано како Јаков Јелкиќ, а по наредба на дежурниот суд во Аликанте, била спроведена официјална постапка на извлекување.

Телото е пренесено во Институтот за судска медицина во Аликанте, каде што денеска ќе биде извршена обдукција. Се очекува резултатите да ги разјаснат околностите на смртта и да потврдат дали станува збор за несреќен случај.

Оваа трагедија е втора смрт забележана во пристаништето Аликанте изминатиот викенд, што предизвика загриженост кај локалните власти и граѓаните. Имено, во неделата во пристаништето било пронајдено тело на жена што претходниот ден била пријавена за исчезната.

Руските ракетни системи „Орешник“ ќе бидат распоредени на територијата на Белорусија во согласност со договорот меѓу лидерите на двете земји, најави високиот руски дипломат Алексеј Полшчук.

„Во согласност со нашите сојузнички обврски… Русија е подготвена да му ја даде на Минск потребната поддршка и да преземе мерки за заштита на нашиот заеднички одбранбен простор“, рече Полшчук, шеф на Вториот оддел за Заедницата на независни држави во руското Министерство за надворешни работи во интервју за новинската агенција ТАСС.

Тој посочи дека, во согласност со договорот меѓу лидерите на двете земји, „руските балистички ракети со среден дострел „Орешник“ ќе бидат распоредени и во Белорусија.

Полшчук исто така, рече дека на територијата на Белорусија веќе е распоредена заедничка регионална група воени трупи и дека се распоредени современи руски одбранбени системи и нестратешко нуклеарно оружје.

Белорускиот претседател Александар Лукашенко кон крајот на јануари објави дека рускиот хиперсоничен систем Орешник ќе и биде испорачан на земјата набрзо и дека може да биде распореден поблиску до регионот Смоленск, јави ТАСС.

Европската комисија е подготвена да примени флексибилност во примената на Пактот за стабилност и раст, кој пропишува фискална дисциплина, доколку земјите-членки финансираат одбранбени проекти од нивните буџети, изјави претседателот на Европската комисија.

„Националните буџети се ограничени со правилата на Пактот за стабилност и раст, но во вонредни времиња е можно да има вонредни мерки и мислам дека живееме во вонредни времиња“, рече Фон дер Лејен на прес-конференција по неформалниот самит на Лидерите на ЕУ, што се одржа, а беше целосно посветен на одбраната и безбедноста.

Пактот за стабилност и раст предвидува дека буџетскиот дефицит на земјите-членки не смее да надминува 3 отсто од БДП, а јавниот долг не смее да надмине 60 отсто од БДП. Најавата на претседателот на Комисијата би значела дека земјите-членки би можеле да имаат уште поголеми дефицити доколку овие средства се наменети за одбранбени проекти.

„Ние во Комисијата ќе размислиме да користиме поголема флексибилност во Пактот за стабилност и раст за да им дадеме повеќе фискален простор на земјите-членки да ги зголемат трошоците за одбрана“, рече фон дер Лајен.

Претседателот на Европскиот совет Антонио Коста рече дека дискусијата на неформалниот состанок се фокусирала на идентификување на приоритетните области во одбраната каде заедничкото дејствување на ниво на ЕУ дава подобри резултати отколку кога земјите-членки дејствуваат поединечно.

„Во денешната дискусија, јасниот фокус беше на воздушната и ракетната одбрана“, рече Коста.

„Денес никој не ја доведе во прашање потребата од заедничка поддршка на проектите за противвоздушна одбрана. Тоа е заеднички интерес на целата Европска унија“, изјави полскиот премиер Доналд Туск, чија земја во моментов претседава со Советот на ЕУ.

На средбата се разговараше и за трансатлантските односи кои се карактеризираат со голема неизвесност поради најавата на американскиот претседател Доналд Трамп дека ќе воведе царини за производите од ЕУ.

Фон дер Лајен рече дека Европската унија е подготвена решително да одговори доколку тоа се случи.