Европа
Секој ден во Италија пристигнуваат илјадници мигранти: „Не можеме да се грижиме за сите нив“

Италијанската премиерка Џорџа Мелони вчера објави дека свикала министерска комисија за национална безбедност за да и помогне на нејзината влада поуспешно да се справи со проблемот со зголемениот број мигранти. Италија има проблеми во грижата за мигрантите кои доаѓаат од Северна Африка и од Балканот, а италијанскиот Црвен крст побара посилна меѓународна реакција за „хаосот“ предизвикан од доаѓањето на мигрантите.
Мелони по седницата на кабинетот соопшти дека го активирала Меѓуминистерскиот совет за безбедност на Републиката (ЦИСР), кој ќе остане трајно оперативен за да се реши проблемот со зголемениот број мигранти. „Нашата цел е да го решиме проблемот на прагматичен начин, со брзи и координирани одлуки“, рече Мелони, која својата политичка кариера ја заснова на борбата против илегалната имиграција.
Според податоците на италијанското МВР, изминатата година по морски пат во Италија пристигнале околу 113.500 имигранти. Статистиката покажува дека во изминатите три дена имало најмногу, 2.300 во петок, повеќе од три илјади во сабота и речиси илјада во недела.
Италијанската влада ги ограничи активностите на хуманитарните спасувачки бродови, заплени три од нивните бродови минатата недела. Но, бидејќи земјата се соочува со намалување на населението и недостиг на работна сила, таа ја зголеми влезната квота за работници мигранти кои не се членки на ЕУ на 452.000 за периодот 2023-2025 година, од околу 83.000 во 2022 година.
Вчера, 56 невладини организации издадоа заедничка изјава во која ја обвинија владата во Рим за попречување на работата на хуманитарните организации на море и предупредија дека многу, ако не и сите, од нив би можеле да ги прекинат своите активности како резултат на тоа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.