Европа
Секој трет жител на Виена е странец

Секој трет жител на Виена, односно 30,8 проценти од населението на австриската престолнина, нема австриски пасош, покажуваат податоците на „Мониторот за интеграција“ на градот.
Овој документ содржи бројки, податоци и факти за миграцијата, интеграцијата и разновидноста на жителите на австриската престолнина.
Бројот на странски државјани е зголемен од последниот извештај во 2017 година, од 27 на сегашнитe скоро 31 процент.
Инаку во 2002 година, уделот на странски граѓани во населението на Виена изнесувал само 16,4 проценти, што значи дека е двојно зголемен во последните 18 години.
Исто така, скоро половина од виенското население има мигрантско потекло.
Поточно, тоа значи дека двајцата родители на 45,9 проценти од Виенците, не се родени во Австрија.
„Виена со тоа станува современ имиграциски град во рамките на ЕУ“, се вели во воведниот текст.
Покрај тоа, 36,7 проценти од Виенците се родени во странство.
Повеќето имигранти доаѓаат од земји на ЕУ, бидејќи секоја година од 2006, сè поголем број луѓе од членките на ЕУ и ЕФТА го населуваат главниот град на Австрија, повеќе од оние од т.н. трети земји.
Единствен исклучок била 2015 година, во екот на бегалскиот бран.
Шефот на проектот, Филип Хамер, посочува дека стапката на давање државјанство на имигрантите во Виена е само 0,8 проценти.
„Ова значи дека од 1.000 лица кои живеат со странски пасош во Виена, само осуммина имаат добиено австриско државјанство. Тоа е најниска стапка во ЕУ“, вели тој.
Имиграцијата и ниската стапка на давање државјанство имаат свои последици, а тоа е дека во моментов 30,1 процент од Виенците постари од 16 години немаат право на глас, а во групата на оние на возраст меѓу 27 и 44 години, уделот на такви лица е поголем од 40 проценти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.