Свет
Сепаратистите во Украина планираат референдум за приклучување кон Русија
Проруската самопрогласена „Народна Република Луганск“ во источна Украина наскоро би можела да одржи референдум за приклучување кон Русија, изјави лидерот на сепаратистите во Луганск, Леонид Пашечник во изјава за локалните весници.
„ Мислам дека во блиска иднина ќе се одржи референдум на територијата на републиката. Народот ќе го искористи своето најголемо уставно право и ќе го каже своето мислење за приклучување кон Руската Федерација“.
„Народна Република Луганск“ е самопрогласена парадржава во источна Украина, управувана од проруски сепаратисти. Рускиот претседател Владимир Путин ги призна самопрогласените републики Луганск и Доњецк како независни држави во пресрет на инвазијата на Украина.
Луганск е најголемиот и главен град на истоимениот регион. Во самопрогласената република живеат околу 1,5 милиони луѓе.
На 24 февруари Русија испрати десетици илјади војници во Украина во „специјална операција“ за демилитаризација на јужниот сосед и искоренување на луѓето што ги нарече опасни националисти. Украинските сили пружија силен отпор, а Западот воведе сеопфатни санкции кон Русија во обид да ја принуди да ги повлече своите сили.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Кремљ: Ризикот од ширење на војната на Блискиот Исток е исклучително висок
Кремљ го осуди убиството на лидерот на Хезболах, Саид Хасан Насрала, во израелски воздушен напад минатата недела, оценувајќи дека постои исклучително висок ризик од поширок конфликт на Блискиот Исток.
„Руската страна ги осудува таквите акции, веруваме дека тие доведоа до значително дестабилизација на ситуацијата во регионот“, изјави за новинарите портпаролот на Кремљ, Дмитриј Песков.
„Главната работа е што ваквото неселективно бомбардирање на станбени згради во Либан доведува до голем број човечки жртви, што неизбежно ќе доведе до хуманитарна катастрофа како онаа на која сме сведоци во Газа“, додаде тој и ја изрази најдлабоката загриженост на Москва.
Рускиот премиер, Михаил Мишустин, и иранскиот претседател, Масуд Пезешкијан, ќе се сретнат во недела во Техеран, соопшти вчера Кремљ, а пренесе агенцијата „Франс прес“. Иран е најголемиот сојузник и поддржувач на Хезболах.
Силните напади на Израел врз позициите на таа милитантна група ја зголемија меѓународната загриженост за ризикот од поширока ескалација на Блискиот Исток, во која би бил вклучен и Техеран.
Рускиот министер за надворешни работи, Сергеј Лавров, го прогласи убиството на Насрала за политичко убиство за време на викендот, а неговото министерство го повика Израел веднаш да ги запре нападите во Либан.
Свет
Италија и Швајцарија ја менуваат границата поради климатските промени
Швајцарија и Италија прекроија дел од својата граница на Алпите поради топењето на глечерите предизвикано од климатските промени. Дел од границата ќе се наоѓа под Матерхорн, една од највисоките планини во Европа, во близина на бројни популарни скијачки центри.
Големи делови од швајцарско-италијанската граница се дефинирани со глечерски сртови или области на вечен мраз, но топењето на глечерите предизвика овие природни граници да се поместат, што ги натера двете земји да бараат корекција на границите. Швајцарија официјално го одобри договорот за промена во петокот, но Италија допрва треба да го стори тоа. Ова следува по нацрт-договорот на мешовитата швајцарско-италијанска комисија од мај минатата година.
Статистиката објавена минатиот септември покажа дека глечерите во Швајцарија изгубиле 4 отсто од нивниот волумен во 2023 година, што е втора најголема загуба по рекордното топење во 2022 година од 6 проценти.
Швајцарија издава извештај за мониторинг на глечерите секоја година, кој ги припишува рекордните загуби на последователните многу топли лета и многу малку снег во 2022 година. Истражувачите велат дека топењето ќе се забрза само ако продолжат овие временски услови.
Швајцарија во петокот објави дека редефинираните граници се изготвени во согласност со економските интереси на двете страни. Се смета дека промената на границите ќе им помогне на двете земји да одредат кој е одговорен за одржување на одредени природни области.
Швајцарско-италијанските граници ќе бидат променети во близина на Матерхорн и популарните скијачки центри, вклучувајќи го и Зермат. Точните промени на границите ќе бидат објавени во договорот откако двете земји ќе го потпишат.
Од Швајцарија велат дека Италија е во процес на одобрување за потпишување на договорот. Минатата година Гламос предупреди дека некои швајцарски глечери се намалуваат толку брзо што веројатно нема да можат да се спасат, дури и ако глобалните температури се одржуваат во рамките на целта од 1,5 степени Целзиусови од Парискиот климатски договор.
Експертите велат дека без намалување на стакленички гасови поврзани со глобалните промени, поголемите глечери како Алеч – кој не е на границата – би можеле да исчезнат за една генерација. Во последните години, на швајцарските глечери се направени бројни откритија поради нивното топење и брзото собирање.
Во јули минатата година, беше потврдено дека човечките останки пронајдени во близина на Матерхорн припаѓаат на германски алпинист кој исчезна во 1986 година.
Во 2022 година, остатоците од авионот што се урна во 1968 година излегоа од глечерот Алеч, а телото на исчезнатиот британски алпинист Џонатан Конвил беше откриено во 2014 година од пилот на хеликоптер кој забележал нешто необично додека доставувал материјали во планинарскиот дом на Матерхорн.
Регион
Воз прегази малолетник во Загреб
Во понеделникот наутро воз налета на малолетник во околината на Загреб. Според полицијата, околу 8.50 часот тие добиле пријава за настанот, но поради тоа што се работи за малолетник, не соопштуваат повеќе информации.
Како што пренесуваат медиумите, малолетникот починал.
Најверојатно, се работи за несреќен случај, соопшти Јавното обвинителство на Загреб. Според тамошните медиуми, најверојатно се работи за малолетник што тргнал на тренинг.
Поради инцидентот, патничкиот сообраќај според хрватските железници бил во прекин и сообраќајот се одвивал преку помошни транспортни релации.