Свет
Се колнам дека ќе ви служам со интегритет и понизност, рече идниот британски премиер Риши Сунак

Велика Британија се соочува со сериозни економски предизвици и има потреба од стабилност и единство, изјави денеска Риши Сунак, во својот прв јавен говор откако беше назначен за лидер на владејачката Конзервативна партија и иден премиер.
„Нема сомнеж дека се соочуваме со голем економски предизвик“, рече Сунак, пренесе „Ројтерс“.
Тој посочи дека на Британија сега и треба стабилност и единство и дека негов приоритет ќе биде да ги зближи Конзервативната партија и земјата.
„Се колнам дека ќе ви служам со интегритет и понизност“, изјави Сунак, пренесе Би-Би-Си.
Тој додаде дека континуирано ќе работи во корист на британскиот народ.
Сунак рече дека му е чест што ја има поддршката од своите колеги пратеници и што е избран за лидер.
„Најголемата привилегија во мојот живот е што можам да и’ служам на партијата што ја сакам и да и’ вратам на земјата на која и’ должам толку многу“, нагласи тој.
Сунак и оддаде признание на Лиз Трас за нејзиното достоинствено лидерство во тешки околности во странство и дома.
Руши Сунак ќе биде 57. премиер на Велика Британија. Тој на функцијата ќе ја наследи Лиз Трас која си поднесе оставка по 45 дена на власт. Сунак ќе биде првиот британски премиер со азиско потекло. Син е на имигранти кои имаат индиски корени.
42-годишниот Сунак ќе влезе во историјата и како најмладиот премиер што го имала Велика Британија од 1812 година. Негова сопруга е Акшата Мурти, која е ќерка на индискиот милијардер Нарајана Мурти. Се проценува дека парот „тежи“ 730 милиони фунти. Со тоа, тој е и еден од најбогатите премиери што некогаш ги имала Велика Британија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Тајфунот направи хаос во делови од Југоисточна Азија: има загинати, повредени и исчезнати

Најмалку осум лица загинаа како резултат на обилните дождови што предизвикаа поплави и лизгање на земјиштето во делови од Југоисточна Азија.
Во Виетнам, седум лица ги загубија животите, едно лице е исчезнато, а 34 се повредени, објавија државните медиуми.
Во некои делови од земјата, преку ноќ наврнаа речиси 20 сантиметри дожд, а предупредувањата за поплави останаа на сила за некои крајбрежни области, објавува Асошиејтед Прес.
Во Тајланд, едно лице загина, а друго е исчезнато поради лизгање на земјиштето предизвикано од тајфунот Каџики.
Одделот за спречување и ублажување на катастрофи на Тајланд соопшти дека многу куќи се оштетени од бурата, а неколку лица се повредени поради ненадејни поплави и лизгање на земјиштето во северните делови на земјата.
Метеоролошките служби на Лаос го предупредија населението да се подготви за доаѓањето на тајфунот, а со него и грмотевици, обилни врнежи од дожд и силни ветрови низ целата земја.
Фото: принтскрин
Свет
Макрон до Нетанјаху: Обвинувањата за антисемитизам се навреда за Франција

Францускиот претседател Емануел Макрон испрати писмо до израелскиот премиер Бенјамин Нетанјаху во кое остро реагираше на неговите обвинувања дека Париз го поттикнува антисемитизмот. Писмото го објави францускиот весник „Ле Монд“.
Макрон го прекори Нетанјаху за објавување на содржината на преписката до медиумите пред францускиот лидер дури и да го прими писмото. Во својот одговор, францускиот претседател го обвини израелскиот премиер за манипулирање со терминот „антисемитизам“ и потсети на бројните мерки што Франција ги воведе за заштита на Евреите и борба против сите форми на омраза.
– Париз остана и останува длабоко посветен на безбедноста на Израел. Затоа обвинувањата за наводна неактивност во услови на оваа катастрофа се неприфатливи и претставуваат навреда за цела Франција – истакна Макрон.
Нетанјаху претходно ја осуди одлуката на Франција да ја признае Палестина, предупредувајќи дека таков потег „поттикнува тероризам и носи ризик од создавање уште една иранска марионетска држава, слична на она што се случи во Газа“.
Фото: принтскрин
Свет
Модринка на раката на Трамп повторно ги разгорува гласините за неговото здравје

Американскиот претседател Доналд Трамп во понеделник повторно покажа темна модринка на задната страна од десната рака за време на потпишувањето на извршна наредба во Овалната соба.
Седејќи на бирото, Трамп се обиде да ја скрие модринката на десната рака ставајќи ја левата рака врз неа додека разговараше со новинарите.
Минатиот викенд, Трамп беше виден како носи шминка на раката, наводно за да ја прикрие модринката што се повторува. Но, за време на прес-конференцијата во понеделникот, новинарите постојано забележуваа голема модринка на задната страна од неговата рака.
Модринката беше видлива и кога Трамп го прими својот јужнокорејски колега Ли Џе-мјунг во Овалната соба. Црно-сината дамка е најновата во серијата видливи модринки на раката на 79-годишниот претседател, кој се појавува со истата повреда повремено неколку месеци, понекогаш криејќи ја со шминка, пренесуваат светските медиуми.
Белата куќа и докторот на Трамп велат дека претседателот е во „одлична здравствена состојба“ и дека модринката е резултат на често ракување и земање аспирин.
„Ова е во согласност со блага иритација на меките ткива од често ракување, како и од земање аспирин, што е дел од стандардниот режим за превенција на кардиоваскуларни заболувања“, рече докторот на Трамп, Шон Барбабела.
„Тоа е познат и безопасен несакан ефект од терапијата со аспирин“.
Сепак, тој одговор не задоволи дел од јавноста на социјалните медиуми кои шпекулираа дека Трамп можеби прима медицински третмани преку инфузија или дека прави чести крвни тестови. Трамп неодамна откри дека му е дијагностицирана „хронична венска инсуфициенција“, што значи дека има оток во долните екстремитети бидејќи вените во нозете не ја пумпаат крвта ефикасно назад кон срцето, според написите.
Кога беше прашана за слојот шминка врз неговата модринка минатиот викенд, портпаролката на Белата куќа, Каролина Ливит, рече дека Трамп се ракува повеќе од кој било претседател.
„Претседателот Трамп е човек од народот, тој се среќава со повеќе Американци секој ден и се ракува со нив повеќе од кој било претседател досега. Неговата посветеност е несомнена и тој ја покажува секој ден.“
Претставникот Рони Џексон, поранешен претседателски лекар од 2013 до 2018 година, рече дека Трамп е „најздравиот претседател што оваа нација некогаш го имала“.
Фото: принтскрин