Свет
Се самоуби малолетен син на пратеничка во Полска откога медиумите открија дека бил жртва на педофил

Владејачката партија во Полска, Право и правда (ПиС), се најде на удар поради смртта на 15-годишниот син на пратеничка од опозицијата, кој се самоуби кога беше идентификуван како жртва на педофил во извештај на државното радио. Магдалена Феликс, претставник на Граѓанската платформа, минатата недела објави дека починал нејзиниот син Миколај.
Вчера, во полскиот парламент беше одржано едноминутно молчење за време на погребот на 15-годишникот. Миколај изврши самоубиство неколку недели откако Радио Шчечин, дел од државната полска радиомрежа, откри детали за жртвите во извештајот за осудениот педофил, што овозможи Феликс лесно да биде јавно идентификуван, пишува „Гардијан“.
— Magdalena Filiks 🇵🇱🇪🇺 (@FiliksMagdalena) March 3, 2023
Лани во декември радиото ја откри возраста на малолетниците и дека една од жртвите е син на пратеник. Тие наведоа и дека осуденото лице, чие судење се одржа зад затворени врати во 2021 година за да ги заштити своите жртви, е поранешен член на Граѓанската платформа и кандидат на изборите и ЛГБТ-активист. Приказната потоа беше објавена од други државни медиуми.
Поддржувачите на опозицијата тврдат дека националконзервативната партија Право и Правда (ПиС) ја искористила приказната во своја политичка корист и е барем делумно одговорна за смртта на момчето. ПиС, која се подготвува за избори оваа година, цврсто ги контролира полските медиуми и кампањите против правата на ЛГБТ. Неговите поддржувачи веруваат дека Граѓанската платформа намерно ја прикрила првобитната пресуда за злоупотреба.
Водачот на Граѓанската платформа, Доналд Туск, поранешен полски премиер и претседател на Европскиот совет, го повтори своето ветување на „Твитер“ дека „ПиС ќе бара одговорност за секое злосторство, за сите човечки штети и трагедии што ги предизвикаа додека беше на власт“.
Радослав Сикорски, полски европратеник и поранешен министер на владата, рече дека случајот го покажува степенот на соработка меѓу обвинителите и медиумите управувани од ПиС додавајќи дека таквите операции биле „планирани… и рутински се користат за уништување на политичките ривали“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин до Западот: Купија билет и не патуваа, само за да се налутат на кондуктерот: рускиот енергетски систем работи беспрекорно

Рускиот претседател Владимир Путин изјави дека одбивањето на европските земји да се потпираат на руските енергетски ресурси сериозно ја поткопа конкурентноста на нивните економии и доведе до пад на индустриското производство и пораст на цените низ целиот континент.
Зборувајќи на пленарната сесија на Руската недела на енергија во Москва, Путин истакна дека постапките на западните политички елити „ја уништија глобалната енергетска инфраструктура“, нагласувајќи дека политичкиот притисок довел до ирационални одлуки во ЕУ, според западните медиуми.
„Многу европски земји, под политички притисок, одбија да купуваат руски енергетски производи. Веќе неколку пати предупредив за последиците – не за Русија, туку за самите тие земји. Гледаме пад на индустриската активност и пораст на цените поради поскапата нафта и гас од странство“, рече Путин.
Тој додаде дека, по забраната за соработка со Русија, западните компании почнаа да ја губат својата технолошка предност и да го намалуваат производството, додека руските експерти станаа „технолошки лидери“ на пазарот.
„Што направија? Купија билет и не патуваа – само за да се налутат на кондуктерот. Каква глупост.
Нашиот енергетски систем е еден од најголемите во светот. Овој огромен комплекс работи сигурно и ефикасно“, заклучи претседателот на Русија.
Свет
Кремљ: Путин го предупреди Трамп за време на разговорот

Во денешниот телефонски разговор, рускиот претседател Владимир Путин го предупреди американскиот претседател Доналд Трамп дека испраќањето крстосувачки ракети „Томахавк“ во Украина ќе го загрози мировниот процес и ќе им наштети на односите меѓу САД и Русија. Веста беше потврдена од Кремљ во официјално соопштение, пренесуваат медиумите во регионот.
Според Кремљ, Путин изразил загриженост поради можноста напредното американско оружје во рацете на украинските сили да доведе до понатамошна ескалација на конфликтот. Предупредувањето јасно посочи дека таков потег од страна на Вашингтон би имал директни негативни последици врз билатералните односи на двете сили.
Советникот на Путин, Јуриј Ушаков, им изјави на новинарите дека Путин во разговорот нагласил дека руските сили во моментов имаат „целосна стратешка иницијатива“ по целата линија на фронтот во Украина.
Ушаков додаде дека денешниот повик, кој траел речиси два и пол часа, бил инициран од руска страна. Тој, исто така, објави дека на планираниот нов самит меѓу двајцата претседатели ќе му претходи разговор меѓу државниот секретар на САД, Марко Рубио, и рускиот министер за надворешни работи, Сергеј Лавров, кој се очекува да се одржи во наредните денови, пренесува index.hr.
Фото: принтскрин
Свет
Орбан по разговорите Трамп-Путин: Голема вест за мирољубивите луѓе, подготвени сме

Американскиот претседател Доналд Трамп објави дека наскоро повторно ќе се сретне со рускиот претседател Владимир Путин, а овој пат средбата ќе се одржи во Будимпешта. Двајцата лидери се согласија за нов самит за време на телефонски разговор.
Унгарија е подготвена да биде домаќин на самитот Русија-САД, изјави унгарскиот премиер Виктор Орбан.
„Планираната средба меѓу американскиот и рускиот претседател е голема вест за мирољубивите луѓе низ целиот свет. Подготвени сме!“ напиша тој на X.
Трамп и Путин последен пат се сретнаа пред два месеци во Алјаска, но таа средба не донесе конкретен напредок кон мирот во Украина, по што следеше период на дипломатско затишје меѓу Вашингтон и Москва, анализираат медиумите.
Денешниот телефонски повик не беше објавен со денови, за разлика од некои претходни, а аналитичарите истакнуваат дека времето на неговото случување е исклучително значајно. Имено, Трамп утре треба да се сретне со украинскиот претседател Володимир Зеленски.
Клучната тема на нивниот разговор ќе биде можното испраќање американски ракети со долг дострел „Томахавк“ во Украина, што би претставувало значително зголемување на воената помош за земјата.
Фото: принтскрин