Свет
СЗО: Многу сме загрижени за ситуацијата со коронавирус во Европа

Светската здравствена организација е многу загрижена за ширењето на Ковид-19 во Европа додека континентот се бори со нов бран на заразени, изјави шефот на Канцеларијата на СЗО за Европа, Ханс Клуге.
Клуге предупреди дека до март може да се регистрираат околу 500.000 смртни случаи доколку не се преземат итни мерки.
Тој рече дека обврската за носење маски може веднаш да помогне да се забави пандемијата.
Шефот на регионалната канцеларија на СЗО смета дека студеното време, недоволниот удел на вакцинирани лица и доминацијата на се позаразните делта соеви на вирусот се одговорни за епидемиолошката состојба. Тој повика на зголемување на бројот на вакцинирани, спроведување на основните мерки за јавно здравје и нови третмани за борба против ширењето на болеста.
„Ковид-19 повторно стана главна причина за смрт во нашиот регион“, рече Клуге, додавајќи дека знаеме што треба да се направи за да се бориме со болеста.
Клуге смета дека обврската за вакцинирање треба да биде последно средство на кое се прибегнува, но дека би било вистинско време за правна и социјална дебата по ова прашање.
„Пред тоа има и други средства, како што се потврдите за Ковид“, рече тој, оценувајќи дека сертификатите за ковид не претставуваат ограничување на слободите, туку се средство за зачувување на нашата индивидуална слобода.
Австрија стана првата европска земја во петокот што објави дека вакцинацијата против Ковид-19 ќе стане законски задолжителна. Тоа правило треба да стапи на сила во февруари. Во исто време, Австрија, како одговор на рекордното зголемување на инфекцијата и ниската покриеност со вакцинација, воведе карантин за сите жители, откако првично беше на сила само за вакцинираните лица.
И многу други европски земји воведуваат нови мерки, додека бројот на случаи расте. Земјите како Чешка и Словачка воведоа нови ограничувања за жителите кои не биле вакцинирани против Ковид-19.
Насилни протести избија во текот на ноќта во Ротердам, Холандија, против владините планови за дополнителни ограничувања и забрана за новогодишен огномет, на што полицијата одговори со пукање врз демонстрантите.
Германскиот министер за здравство Јенс Шпан рече дека Германија е во „вонредна состојба“ и одби да ја исклучи можноста за воведување ново заклучување во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Русија уништи 21 украински дрон во текот на ноќта, два летаа кон Москва

Руските одбранбени единици уништија 21 украински дрон во текот на ноќта, објави руската државна новинска агенција, повикувајќи се на податоци од руското Министерство за одбрана.
Двата дрона што ги уништија руските противвоздушни единици летаа кон Москва, изјави градоначалникот на рускиот главен град, Сергеј Собјанин.
„Службите за итни случаи работат на местото каде што паднаа остатоците (од дроновите)“, напиша Собјанин во објава на Телеграм, пренесува Ројтерс.
фото: принтскрин
Свет
Канада е отворена за испраќање мировни сили во Украина

Канадскиот премиер Марк Карни му рече вчера на украинскиот претседател Володимир Зеленски дека ги поддржува барањата на Украина за силни безбедносни гаранции како дел од кој било мировен договор, нагласувајќи дека Канада не ја исклучува можноста за испраќање трупи како дел од таква рамка, објави Ројтерс.
Карни, кој ја посети Украина за прв пат откако ја презеде функцијата во март, му се придружи на Зеленски на церемонијата во центарот на Киев по повод Денот на независноста на Украина. На церемонијата присуствуваше и специјалниот пратеник на Трамп за Украина, Кит Келог.
„Сите работиме за да се осигураме дека крајот на оваа војна значи гаранција за мир за Украина, така што војната и заканата од војна нема да останат како наследство за нашите деца“, им рече Зеленски на собраните гости.
Зеленски рече дека сака идни безбедносни гаранции како дел од евентуален мировен договор што ќе бидат што е можно послични на Член 5 на НАТО, кој го смета нападот врз една членка како напад врз сите. Карни ги поддржа повиците на Украина за меѓународно вклучување.
„Според канадското мислење, нереално е единствената безбедносна гаранција да биде силата на украинските вооружени сили… што мора да се дополни и зајакне“, рече Карни на заедничката прес-конференција.
Двајцата лидери, исто така, потпишаа договор за заедничко производство на беспилотни летала, а Карни објави дека Украина следниот месец ќе добие повеќе од 1 милијарда канадски долари (618 милиони евра) воена помош од претходно најавен пакет.
фото: принтскрин
Европа
Мерц: Никој повеќе не треба да има илузии, Германија е во структурна криза

Германскиот канцелар Фридрих Мерц призна дека справувањето со економските предизвици се покажува како многу поголем предизвик отколку што првично очекувал.
„Го кажувам ова со самокритика – задачата е поголема отколку што некој можеше да замисли пред една година. Не сме само во период на економска слабост, туку сме во структурна криза на нашата економија“, рече Мерц во саботата за време на говорот во северниот германски град Оснабрик.
Податоците објавени во петокот покажаа дека германската економија се намалила повеќе отколку што првично се проценувало во вториот квартал. Економската активност во Германија се намалила за 0,3 проценти во вториот квартал во споредба со претходните три месеци, пад што е за 0,2 процентни поени посилен од оној што го покажа прелиминарната проценка.
„Никој не треба повеќе да има илузии за тоа колку се длабоки и далекусежни предизвиците со кои се соочуваме“, им рече Мерц на членовите на неговата партија Христијанско-демократска унија (CDU) во Долна Саксонија, покраината каде што е седиштето на производителот на автомобили „Фолксваген АГ“.
Тој го посочи падот од 36% на профитот по оданочување на „Фолксваген“ во вториот квартал како само „една од многуте пораки“.
„Големи делови од нашата економија повеќе не се конкурентни, а тоа е прашање на ценовна конкурентност“, предупреди Мерц, без да ги именува компаниите.
„Квалитетот е сè уште добар и раководителите на компаниите ги препознаваат овие предизвици. Но, основните услови во Германија едноставно не беа доволно добри во последната деценија“, додаде тој.
Откако ја презеде функцијата оваа година, Мерц вети сеопфатни реформи насочени кон намалување на бирократијата, модернизирање на инфраструктурата и зголемување на домашната побарувачка. Неговата влада планира да инвестира стотици милијарди евра во патишта, мостови и вооружени сили за да ја зголеми продуктивноста.
Во саботата, тој ги истакна новите даночни олеснувања за деловните инвестиции и го повтори своето противење на зголемувањето на даноците за средните компании. Тој, исто така, призна дека американската царина од 15% за германскиот извоз би била товар за економијата, но предупреди дека отворената трговска војна со Вашингтон би можела да биде многу полоша.
фото: принтскрин