Свет
СЗО: Повеќекратните бустери не се добра стратегија, потребни ни се нови вакцини

Експертите од Светската здравствена организација (СЗО) предупредија дека континуираното давање бустер-дози не е добра стратегија во борбата против новите варијанти на Ковид-19 и ги повикаа научниците да работат на развој на вакцини што подобро штитат од новите соеви.
„Стратегијата за вакцинација базирана на дополнителни дози од оригиналниот состав на вакцината веројатно нема да биде соодветна или одржлива“, се вели во соопштението на експертската група на СЗО.
СЗО наведува дека прелиминарните податоци покажуваат оти постојните вакцини во случајот со варијантата омикрон се помалку ефикасни во спречувањето симптоматска болест. Се додава дека сегашните вакцини продолжуваат да обезбедуваат значителна заштита од потешките форми на болеста.
Експертите сметаат дека потребни се и треба да се развијат вакцини против Ковид-19 што ќе имаат висок ефект врз спречувањето на ширењето на заразата, притоа спречувајќи ги тешките форми на болеста и смртта.
Тоа ќе овозможи да се ограничи влијанието на Ковид-19 врз здравјето, но и да се намали потребата од ригорозни епидемиолошки и социјални мерки од широк опсег.
„Во пресрет на ваквите вакцини и во согласност со развојот на вирусот САРС-КоВ-2 можеби ќе треба да се приспособи составот на сегашните вакцини против Ковид-19 за да се осигури дека тие продолжуваат да го обезбедуваат нивото на заштита, вклучително и омикрон“, уверуваат тие.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.