Гугл и Мета на Марк Закерберг се обвинети дека намерно ги прават своите платформи зависни за децата и со тоа го оштетуваат нивното ментално здравје.

Извршниот директор на Мета, Марк Закерберг, се појави вчера на суд во Лос Анџелес, каде што сведочеше на судење кое ја стави неговата компанија во центарот на вниманието поради штетните ефекти на социјалните медиуми врз децата.

Жена од Калифорнија, која ги користела Инстаграм на Мета и Јутјуб на Гугл, изјави дека апликациите ѝ ја поттикнувале депресијата и самоубиствените мисли.

Тужителот почнал да го користи Јутјуб на шестгодишна возраст, Инстаграм на 11-годишна возраст, а потоа „Тик-ток“ и Снепчет. Овие последни две платформи веќе постигнале договор за компензација со жената.

Тужбата ги обвинува компаниите дека се обидуваат да ги „привлечат“ децата во своите услуги, иако биле свесни за негативните последици по менталното здравје што би можеле да ги предизвикаат.

Во центарот на спорот е прашањето дали социјалните мрежи предизвикуваат зависност кај децата.

Мета и Гугл ги негираа обвинувањата, а Мета се повика на студија на Националните академии на науките која не открила никаков ефект на социјалните медиуми врз менталното здравје на децата.

Доколку Мета го изгуби случајот, ќе мора да му плати отштета на тужителот, а таквата пресуда би имала влијание врз кредибилитетот на компаниите за социјални мрежи во време кога сè повеќе влади низ целиот свет ги забрануваат овие апликации за деца под 16 години, пренесуваат медиумите.

Зборувајќи пред судот, Закерберг рече дека жали што неговата компанија бавно ги препознавала корисниците под 13 години на Инстаграм. Додаде дека во меѓувреме се направени подобрувања.

– Би сакал да го постигнавме тоа порано – рече тој.

Минатата недела, на судењето сведочеше и шефот на Инстаграм, Адам Мосери, категорично отфрлајќи го концептот на зависност од социјалните мрежи.

Забраната за социјални медиуми за деца под 16 години веќе стапи на сила во Австралија.

Во Франција, законот што предвидува забрана на социјалните мрежи за корисници под 15 години е во парламентарна процедура. Во меѓувреме, се очекува Советот на министри на Шпанија да одобри слична забрана за корисници под 16 години и да ја испрати во парламентот.

Германскиот канцелар Фридрих Мерц вчера објави дека би бил отворен за разгледување на таква забрана.

Норвешка, Грција, Обединетото Кралство, Данска, Италија и Холандија се меѓу многуте европски земји кои дебатираат за некаков вид забрана.

Американскиот претседателски авион, познат како „Ер Форс Уан“, ќе добие нов дизајн со златна, темно црвена и темно сина боја. Тоа е изглед што го претпочита претседателот Доналд Трамп, отстапувајќи од шемата на бои воведена во 1960-тите за време на администрацијата на Џон Ф. Кенеди, објавува Би-би-си.

Воздухопловните сили на САД потврдија дека „Ер Форс Уан“ и другите авиони што ги користат високи американски функционери, вклучувајќи ја и првата дама Меланија Трамп, ќе добијат нова комбинација на бои за време на закажаните поправки и одржување. Тие исто така објавија и илустрација на новиот дизајн.

Златната боја, истакнат дел од новата комбинација, е една од омилените бои на претседателот Трамп, која тој често ја користи во Белата куќа и во неговите хотели.

Плановите за голем редизајн што Трамп првично ги предложи за време на неговиот прв мандат беа отфрлени од неговиот наследник, Џо Бајден. Новата палета на бои веќе е видена на макети на авионот во Белата куќа и се совпаѓа со изгледот на приватниот авион што Трамп го користеше за неговата кампања во 2024 година, понекогаш нарекуван „Трамп Форс Уан“.

Иако не е познато колку ќе чини боењето, американските воздухопловни сили изјавија за Би-Би-Си дека „не се очекува новите барања за бојадисување да резултираат со дополнителни одложувања или трошоци за програмата“.

Новата шема на бои ќе биде применета на авионот Боинг VC-25B што моментално го транспортира претседателот, четири авиони Ц-32 кои често се користат како „Ер Форс Ту“ ​​за потпретседателот и нов авион дониран од Катар.

Четири департмани во Франција – Жиронда, Ло-ет-Гарон, Шарант-Мортим и Мен-ет-Лоара се уште се под црвено предупредување за поплави поради бурата „Педро“ што ја погоди земјата, додека 15 други области се под портокалово ниво на тревога.

Во градот Анже, се очекува нивото на водата на реката Мен да го надмине нивото од јануари 2000 година и би можело да достигне 6,12 метри, со понатамошен раст до петок, објави порталот „BFM TV“.

Во Либурно, општинскиот план за вонредни состојби беше активиран за прв пат откако реката се искачи за повеќе од 1,30 метри за помалку од еден час.

Врвот на бранот сè уште не е достигнат, а прогнозите покажуваат дека нивото би можело да го надмине рекордот од 1999 година.

Во Бордо, се очекува нивото на водата на Гарона да биде речиси седум метри, што е највисоко ниво од 1999 година.

Планот за вонредни ситуации беше активиран, беа отворени сали за евакуираните, а на терен беа распоредени повеќе од сто пожарникари.

Во Понт-Авен во департманот Финистер, властите, со помош на цивилната заштита, инсталираа брана против поплави за заштита на објектите, со што се спречи, како што истакнува „BFM TV“, можна еколошка катастрофа.

Во исто време, четири алпски департмани – Горна Савоја, Савоја, Јизера и Горње Алпи се под портокалово предупредување поради висок ризик од лавини, со најава за „многу големи лавини“ што би можеле да се спуштат во долините и да ја погодат инфраструктурата.

Портокалово предупредување за силни ветрови е издадено и за департманите Пиринеи-Ориентали и Од, додека целиот атлантски брег е под тревога за бранови и крајбрежни поплави поради екстремно високи плими.

Метеоролошките служби повикуваат на зголемена претпазливост поради комбинацијата од обилни врнежи од дожд, ветер и заситена почва по претходните бури.