Свет
Шји Џјинпинг со новиот изглед ѝ пркоси на традицијата
Сребрените траги во косата на претседателот Шји Џјинпинг, забележани на годишната национална законодавна седница, која почна на 5 март, привлекоа внимание и предизвикаа шпекулации меѓу кинеските набљудувачи за тоа што би можело да значи оваа радикална промена.
Во официјалните портрети и во јавноста водечките кинески лидери, кои обично се на возраст од 60 години или повеќе, долго време носеа исклучително црна коса.
Очигледната употреба на боја за коса е обичај што датира од времето на Мао Ѕедунг, основачот на комунистичката Кина. Сепак, овој тренд стана поизразен од 90-тите.
Врховните лидери сакаат да бидат видени како поголеми од животот… и сакаат да се види дека имаат беспрекорен изглед, вели Вили Лам, професор на Кинескиот универзитет во Хонгконг и долгогодишен аналитичар на кинеската политика.
„Шји Џјинпинг сака да ја прекине оваа традиција за да изгледа повеќе како обичен граѓанин на Кина, човек од народот“, рече Лам.
Овој популистички имиџ беше внимателно негуван од кинескиот лидер кога дојде на власт кон крајот на 2012 година. Неговите иницијативи за намалување на сиромаштијата и масовната кампања против корупцијата, која досега вклучуваше повеќе од еден милион комунистички функционери, го направија многу популарен.
Сепак, уставниот амандман што минатата година му овозможи на Шји да владее доживотно, како и сè пошироките пропагандни напади, кои го истакнуваат неговото водство, се покажаа контроверзни.
„Стратегијата да не се бојадисува косата може да биде обид да се намалат критиките дека тој гради култ на личноста во стилот на Мао Ѕедунг. Ова е некој вид стратегија на камуфлажа што го прави помалку аристократ, во кинеска смисла“, рече професорот Лам.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Белгија издвојува девет милиони евра за украинската енергетска инфраструктура
Белгија ќе додели дополнителна помош од девет милиони евра за да придонесе за поправка на оштетената енергетска инфраструктура во Украина, најави белгиската министерка за развојна соработка, Каролин Генез.
„Преку ОН, Белгија ќе придонесе за поправка на енергетската инфраструктура околу градот Харков, кој сега секојдневно трпи бомбардирање од руската армија. Со воена поддршка, овие средства ќе помогнат да се изгради отпорноста на Украина“, рече министерот, пренесува RTBF.
Според неа, Белгија ќе одвои средства за поддршка на проекти во рамките на Програмата за развој на Обединетите нации, која е специјализирана за економски развој.
Свет
Генералното собрание на ОН го повика Советот за безбедност да ја прими Палестина за членка
Генералното собрание на Обединетите нации ги зајакна правата на Палестина во рамките на организацијата и повика таа да биде прифатена како членка, пренесува Би-Би-Си.
Палестина има статус на земја-набљудувач не-членка од 2012 година, што дозволува некои права помалку од полноправна членка.
За членството може да одлучува само Советот за безбедност на ОН.
САД неодамна ставија вето на кандидатурата за полноправно членство, но гласањето денска може да се смета како гест на поддршка за Палестинците.
Палестинскиот претседател Махмуд Абас ја поздрави резолуцијата, велејќи дека таа ги поддржува палестинските напори за уште едно гласање за ова прашање од страна на Советот за безбедност.
Свет
Шпанија, Ирска и Словенија ќе ја признаат Палестина на 21 мај
Шпанија, Ирска и Словенија планираат симболично да ја признаат Палестинската држава на 21 мај, изјави шефот за надворешна политика на ЕУ, Жозеп Борел.
Тој го потврди датумот во интервју за шпанското јавно радио, откако ирскиот јавен радиодифузен сервис РТЕ објави дека тоа е моментот кога сите три земји планирале да дејствуваат.
Словенечката влада вчера соопшти дека донела декрет за признавање на палестинска држава, што ќе биде внесен во нејзиниот парламент до средината на јуни.
Потоа, најверојатно ќе има повеќе нации што ќе го следат примерот бидејќи и Белгија одлучи да го стори тоа, додаде Борел.