Свет
Словаците на работа и на село само со негативен тест на Ковид-19

На Словаците нема да им биде дозволено да одат на работа или да патуваат на село ако немаат скорешен негативен тест на Ковид-19, пренесува РТ. Правилото стапува во сила следната недела, со тоа што Братислава се надева дека дотогаш ќе го зголеми тестирањето.
Планот е поделен на две фази. Првата, која почнува в понеделник и ќе трае една недела, предвидува Словаците да излезат на местата за тестирање на Ковид-19 – редовни и мобилни – за да направат антигенски или ПЦР-тест.
Од следната среда, 27 јануари, Словаците што не успеале да добијат резултати од тестовите со кои ќе докажат дека не се заразени, ќе бидат затворени во своите домови. Рутинските активности, како што се патување до работното место, одење во пошта или на село (за лицата на возраст од 15 до 65 години) нема да бидат дозволени. Посетите на лекар и купувањето продукти се меѓу неколкуте исклучоци од правилото.
Освен тоа, оние што живеат во една од 37-те области со поголема стапка на заразеност, ќе треба да поминат низ втор круг тестирање. Тие ќе бидат изземени од де факто полицискиот час, кој ќе трае од 3 февруари до 7 февруари, само ако двапати се тестираат негативно. Оние што живеат во преостанатите 36 области нема да мора да ја повторат постапката.
Словачка, нација со околу 5,4 милиони жители, живее под огромна блокада од почетокот на јануари. Како дел од масовните ограничувања забранети се какви било посети, јавни црковни служби, а рестораните може да работат само за достава.
Актуелниот карантин треба да истече на 7 февруари. Сепак, владата не исклучи порано олабавување на мерката ако бројот на хоспитализации падне под 2.500. Според „Ројтерс“, во моментот бројот на хоспотализирани е повеќе од 3.000.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија сака да се повлече од конвенцијата за забрана на тортура

Рускиот премиер Михаил Мишустин вчера потпиша резолуција со која бара Москва да се повлече од Европската конвенција за спречување на тортура, пишува Kyiv Independent.
Иако Русија формално останува потписник на конвенцијата, воените злосторства и тортурата на Русија врз украински цивили и војници се документирани постојано, додава Kyiv Independent.
Резолуцијата го повикува рускиот претседател Владимир Путин да ја повлече Русија од деценискиот договор.
„До претседателот на Руската Федерација се поднесува предлог за раскинување на Европската конвенција за спречување на тортура и нечовечко или понижувачко постапување или казнување“, се наведува во текстот на резолуцијата.
Дејствијата на Русија на окупираните украински територии дополнително го потврдуваат нејзиното непочитување на меѓународните механизми за заштита, според украинските медиуми.
Свет
Австралија: Иран нарача најмалку два антисемитски напади во нашата земја

Австралија денес објави дека ќе го протера амбасадорот на Иран во Канбера, а премиерот Ентони Албанезе го обвини Техеран за извршување на два антисемитски напади во клучните градови Сиднеј и Мелбурн.
Од почетокот на војната меѓу Израел и Газа во октомври 2023 година, австралиските домови, училишта, синагоги и возила беа цел на антисемитски вандализам и палење, пишува „Ројтерс“.
„Австралиската безбедносна агенција собра веродостојни разузнавачки информации дека иранската влада наредила најмалку два напади“, изјави Албанезе на прес-конференција.
„Иран се обиде да го прикрие своето учество, но ASIO верува дека стои зад нападите врз „Луис Континентал Кујн“ во Сиднеј на 20 октомври минатата година и синагогата Адас Израел во Мелбурн на 6 декември“.
Австралиската безбедносно-разузнавачка организација додаде дека е веројатно дека Иран наредил дополнителни напади.
„Ова беа вонредни и опасни акти на агресија оркестрирани од странска држава на австралиска почва“, рече Албанезе. „Ова беа обиди за поткопување на социјалната кохезија и сеење раздор во нашата заедница“.
„Австралија ја суспендираше својата амбасада во Техеран и сите дипломати се безбедни во трета земја“, рече Албанезе, додавајќи дека неговата влада ќе ја прогласи Иранската револуционерна гарда за терористичка организација.
Свет
Трамп најавува преименување на Пентагон: „Веројатно, за околу една недела“

Претседателот на САД, Доналд Трамп, денес посочи дека неговата администрација веројатно ќе го промени името на Министерството за одбрана во Министерство за војна во наредните денови.
Трамп рече дека официјалните лица веројатно ќе го вратат Пентагон на неговото постаро, поагресивно име за околу една недела. И тој и министерот за одбрана Пит Хегсет, постојано се жалат на промената на името што се случи по Втората светска војна, објавува Politico.
Министерството за војна постоеше од 1789 до 1947 година, кога администрацијата на Труман го подели одделот на Армија и Воздухопловни сили и го спои со тогаш независната Морнарица. Поранешниот претседател Хари Труман ја именуваше новата агенција на ниво на кабинет Министерство за одбрана.
Труман имаше намера промената на името да му даде на шефот на Пентагон поцентрализирана власт над одделните гранки на војската, особено Морнарицата, која уживаше значителна независност до крајот на Втората светска војна.
Трамп постојано алудираше на можноста за враќање на старото име во последните недели, нарекувајќи го Хегсет свој „министер за војна“ на самитот на НАТО во јуни и сугерирајќи дека промената е резултат на политичка коректност.
„Ако ја погледнете старата зграда до Белата куќа, можете да видите каде порано беше Министерството за војна. Потоа станавме политички коректни и го нарековме Министерство за одбрана“, рече тој.
Трамп посочи дека ребрендирањето е неизбежно. Но, на Пентагон веројатно ќе му треба одобрение од Конгресот за каква било промена на името, бидејќи министерството е основано со закон стар неколку децении.
„Не сакам само одбрана. Сакаме напад“, рече Трамп во Овалната соба.