Јанез Јанша е победник на парламентарните избори во Словенија кога неговата Словенечка демократска партија (СДС) освои 25,02 отсто од гласовите, покажуваат резултатите од пребројаните 99 отсто.

На второ место е Листата на Марјан Шарец (ЛМШ) со 12,6 отсто, а следуваат Социјалдемократите (СД) со 9,94 отсто, Партијата на модерниот центар (СМЦ) со 9,74 отсто, Левицата со 9,23 отсто и демохристијанската Нова Словенија (НСИ) со 7,15 отсто освоени гласови.

Јанша, кому мандатот за состав на новата влада ќе му го даде претседателот на државата Борут Пахор, изјавил дека ќе направи сè за да формира цврста и стабилна влада, но рекол и дека е свесен оти тоа е тешка задача. Како најголеми предизвици, поради кои не исклучува преговори со левичарските партии, Јанша ја навел потребата од промени во здравствениот систем и одговор на потенцијалната мигрантска криза, со порака дека е спремен да направи сè што е најдобро за Словенија, било од позиција на власт или на опозиција.

Иако го сметаат за губитник на изборите затоа што бројот на своите гласачи го свел на третина од изборите пред четири години, Миро Церар рекол дека неговата партија останува релевантен политички актер без кој не е можно да се замисли стабилна влада, но алудирал на тоа дека нема намера да коалира со Јанша.

На парламентарните избори што се одржаа вчера гласаа само 51,72 отсто од вкупниот број гласачи, што е речиси еднакво на одѕивот пред четири години.