Долорес О’Риордан, пејачката на познатата ирска група „Кренберис“, зимоска беше пронајдена мртва во кадата од својата хотелска соба, а судскиот вештак надлежен за случајот изјави дека давењето било последица на прекумерна доза на алкохол.

Според судските вештаци, О’Риордан испила значително голема количина алкохол пред да ја пронајдат во собата во хотелот „Хилтон“ на 15 јануари оваа година.

„Ирската и светска ѕвезда Долорес О’Риордан ненадејно почина денес во Лондон. Таа беше на 46-годишна возраст“, се вели во изјавата на нејзиниот публицист која беше објавена на денот на смртта.

Пејачката била во Лондон за краток престој додека снимала нов музички материјал.

О’Риордан била пронајдена под вода во кадата во хотелската соба, смртта била потврдена околу 21:00.

„Телото на починатата не покажува траги од насилство, смртта настанала ненадејно. Не се работи за убиство, туку за немил настан“, изјави судскиот вештак, д-р Ширли Редклиф.

Групата „Кренберис“ ја почна својата кариера во 1989 година и има продадено преку 40 милиони албуми, а стана светски позната со албумот издаден во 1993 година насловен Everybody Else Is Doing It, So Why Can’t We?, како и хитовите Zombie и Linger.

Долорес О’Риордан беше родена во Лајмрик, Ирска во 1971 година, а се приклучи во групата во 1990.