Европа
Со какви санкции му се заканува ЕУ на Путин?

Главните европски сојузници на Украина ја повикаа Русија на безусловно 30-дневно примирје и се заканија со нови санкции, според заедничкото соопштение објавено на 12 мај. Министрите за надворешни работи на Франција, Германија, Италија, Полска, Шпанија и н аВелика Британија, заедно со високата претставничка на ЕУ, Каја Калас, се состанаа во Лондон на состанокот „Вемаир+“, на кој се дискутираат прашања за евро-атлантската безбедност и за руската агресија врз Украина.
„Заедно со Украина повикуваме на итен, целосен и безусловно 30-дневен прекин на огнот за да се отвори простор за разговори за праведен, сеопфатен и траен мир“, изјавија официјалните лица по состанокот.
Украинскиот министер за надворешни работи Андриј Сибиха им се обрати на учесниците преку видеоврска и потврди дека руските сили не го почитувале прекинот на огнот што требаше да стапи во сила на 12 мај. Украина и нејзините клучни сојузници ја предупредија Москва на 10 мај дека доколку одбие прекин на огнот, ќе воведат уште построги санкции.
Удар за руските приходи и енергија
Во својата изјава министрите ги наведоа конкретните мерки што планираат да ги преземат.
„Се договоривме за посилни чекори за понатамошно ограничување на способноста на Русија да води војна – ќе ги намалиме приходите на Кремљ, ќе го спречиме работењето на нивната флота во сенка, дополнително ќе го заостриме ограничувањето на цените за нафтата и ќе продолжиме да го намалуваме увозот на руска енергија“, се вели во соопштението.
Тие додадоа дека руските државни средства остануваат блокирани сè додека Москва не ја запре својата агресија и не ја надомести штетата што ја предизвикала. Покрај економските мерки, сојузниците повторија дека ќе продолжат да ја зајакнуваат украинската армија, да обезбедуваат безбедносни гаранции и да градат силен НАТО-сојуз.
Путин нуди преговори, но под стари услови
Како одговор на овој притисок, рускиот претседател Владимир Путин ја покани Украина на директни преговори во Истанбул, кои треба да почнат на 15 мај. Како што објасни неговиот советник Јуриј Ушаков, преговорите ќе се базираат на разговорите од Истанбул во 2022 и на актуелната ситуација на бојното поле.
Претседателот Володимир Зеленски изјави дека е подготвен да оди во Турција и да се сретне со Путин, но сепак инсистира на целосно и безусловно примирје.
Неименуван украински функционер за „Аксиос“ изјави дека Зеленски, дефинитивно, ќе биде во Турција на 15 мај, без оглед на тоа дали Москва се согласува на прекин на огнот. На прашањето на „Киев индепендент“ дали претседателот ќе патува, дури и ако Русија го отфрли предлогот, извор близок до неговиот кабинет рече: „Подготвени сме за сите опции. Но, чекаме одделно одговор за примирјето“.
Путин сè уште официјално не го потврдил своето пристигнување во Истанбул.
Нов бран санкции најавен за 14 мај
Германија јасно стави до знаење дека ќе воведе дополнителни санкции против Русија доколку прекинот на огнот не се почитува до крајот на 12 мај. Извори од ЕУ исто така најавија нова рунда европски санкции за 14 мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.