Свет
Спасувачка драма во Шпанија – двегодишно дете е заробено во тесен бунар, длабок 100 метри
Спасувачка драма се случува во Шпанија, каде што екипите се обидуваат да извлечат двегодишно дете кое паднало во тесен и многу длабок бунар.Несреќата се случила синоќа во јужната шпанска провинција Малага.
Детето со своето семејство било во близина на селото Тоталан, кога паднало во бунарот, изјави за Си-ен-ен Бернардо Молто, портпарол на спасувачките екипи.

Спасувачите не можат да влезат во бунарот, кој е широк едвај 25 сантиметри, а се верува дека е длабок повеќе од 100 метри. Спасувачите спуштија микро-робот со камери во бунарот, но не успеале да го лоцираат момчето.
„Не го најдовме ниту го слушнавме детето, но не се откажуваме, ќе продолжиме да го бараме, колку и да треба време за тоа”, рече Молто.

Тимот за спасување ќе користи алтернативни стратегии за пронаоѓање на детето, вклучително и копање подлабоко во дупката и создавање паралелен тунел кој ќе може да се поврзе со бунарот.
„Наш приоритет број еден е да го пронајдеме и спасиме детето”, рече Молто.
Повеќе од 100 пожарникари спасувачи и вработени во службата за вонредни ситуации во јужна Шпанија се вклучени во потрагата по двегодишното дете.
Бунарот кој е премногу тесен за да може во него да влезе возрасен човек, бил ископан пред еден месец, додека се водело истражување за водата, а по тоа не бил покриен ниту заштитен. Локалната претставничка на шпанската влада, Марија Гамес, изјавила дека пожарникарите со помош на робот-камера, рано утрово пронашле кесичка со бомбони, која детето ја држело во рацете кога исчезнало. Кесичката е најдена на длабочина од 75 метри, а спасувачите не можеле да ја спуштат опремата пониско.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Кина ги испраќа својот најмлад астронаут и четири глувци на вселенска мисија оваа недела
Кина ќе го испрати најмладиот астронаут во својата историја на вселенската станица како дел од својот следен лет со екипаж, соопштија властите во четврток, додавајќи дека таму ќе бидат и четири лабораториски глувци.
Вселенската станица Тјангонг, управувана од тимови со три астронаути кои ротираат на секои шест месеци, е круната на вселенската програма на Кина вредна милијарда долари, додека се обидува да ги стигне САД и Русија.
Мисијата Шенжоу-21 е закажана да полета во петок во 23:44 часот по локално време од Центарот за лансирање сателити Џиукван во северозападна Кина, изјави Џанг Џингбо, портпарол на Кинеската агенција за вселенски летала со екипаж (CMSA).
Инженерот на летот, Ву Феи, кој штотуку наполни 32 години, ќе стане најмладиот кинески астронаут кој летал во вселената, соопштија властите.
„Се чувствувам исклучително среќен“, им рече тој на новинарите во четврток. „Можноста да ги комбинирам моите лични соништа со славното патување на вселенската програма на Кина е најголемата среќа што ми ја донесе оваа ера.“
Надреден ќе му биде вселенскиот пилот Џанг Лу, 48, кој леташе на мисијата Шенжоу-15 пред повеќе од две години. Специјалистот за товар, Џанг Хонгџанг, 39, е третиот член на екипажот.
Патувањето ќе вклучува и четири лабораториски глувци – два мажјаци и две женки – за првите кинески експерименти со глодари во орбитата, изјави портпаролот на CMSA Џанг.
Командантот Џанг Лу рече дека е уверен дека неговиот тим „ќе ја заврши работата за татковината и нејзиниот народ со целосен успех“.
Вселенската програма на Пекинг, трета која во орбитата испраќа човечки екипаж, претходно слета роботски ровери на Марс и на Месечината.
За време на владеењето на претседателот Кси Џинпинг, Кина ги засили плановите за остварување на својот „вселенски сон“.
Пекинг вели дека планира да испрати мисија со екипаж на Месечината до 2030 година и планира да изгради база на површината на Месечината.
CMSA во четврток објави дека „цврсто се држи“ до таа цел. Во тек се голем број „клучни претстојни тестови“, вклучувајќи го и тестирањето на лунарниот модул Ланјуе и вселенското летало со екипаж Менгжу.
фото: принтскрин
Регион
Вучиќ во Узбекистан: Тука нè гледаат како Европејци, иако не сме во ЕУ
Претседателот на Србија, Александар Вучиќ, за време на посетата на Ташкент, изјави дека Узбекистан е „земја на иднината“ и нагласи дека Србија мора да се позиционира за соработка со земјите кои бележат брз економски раст, пренесува РТС.
„Најсилниот впечаток врз мене, а верувам и врз сите вас, останува огромниот напредок на Узбекистан – неверојатен напредок. Минатата година стапката на раст беше 6,5 проценти, а оваа година веројатно ќе биде уште поголема. Во првите три квартали веќе се достигнати 7,6 проценти“, рече Вучиќ, додавајќи дека ова е земја на млади, со оглед на тоа што 60 проценти од населението е под 30 години.
Тој најави дека се очекува посета на узбекистанскиот претседател Шавкат Мирзијоев во Белград на почетокот на 2026 година, кога треба да започне и стратешко партнерство.
„Ова ќе биде почеток на нашето стратешко партнерство. Ќе ги подготвиме најважните документи што ќе бидат основа за подобрување на соработката“, рече Вучиќ.
„Знам дека луѓето во Србија не се секогаш доволно заинтересирани за вакви теми, но ова е нашата иднина. Ова се земји кои растат неверојатно брзо и ние мора да ја позиционираме Србија тука“, нагласи тој.
Српската делегација беше особено импресионирана од паркот за информатичка технологија, за кој Вучиќ рече дека ги покажува огромните инвестиции на Узбекистан во знаење и развој. Она што, вели тој, особено го фасцинирало е напорната работа и дисциплината на неговите граѓани.
„За разлика од Европејците – а тие нè сметаат во Европа иако не сме дел од Европската Унија – тие не бараат да работат што е можно помалку и да бидат платени што е можно повеќе. Овие луѓе сакаат да работат што е можно повеќе, тие го имаат тоа „тигрово око“ и јасно гледаат дека со својата работа можат да нè надминат сите нас“, истакна српскиот претседател.
Тој додаде дека Србија, иако нема да биде лесно да го промени својот менталитет, може да учи од ваквите партнери и да ја искористи таа енергија во корист на своите граѓани. Како пример за добра пракса, тој го наведе узбекистанскиот модел на централизирани јавни набавки, кој донесе големи заштеди и кој Србија планира да го проучи.
фото: принтскрин
Свет
Орбан ќе се сретне со Трамп
Унгарскиот премиер, Виктор Орбан, ќе се сретне со американскиот претседател, Доналд Трамп, на 7 ноември во Вашингтон, изјави денес неговиот шеф на кабинет Гергели Гуљас.
Тој им рече на новинарите дека на состанокот ќе се разговара за агендата што би можела да доведе до мировен договор во Украина, објави „Ројтерс“.
Орбан претходно изјави дека на планираната средба со Трамп ќе разговара за санкциите на САД врз руските нафтени компании, објави агенцијата.
Унгарија сè уште во голема мера е зависна од увозот на нафта и гас од Русија, и за разлика од повеќето членки на Европската Унија кои, по руската инвазија на Украина во 2022 година, ја намалија својата зависност од руската енергија, Будимпешта дури и го зголеми увозот, објави претходно „Блумберг“.
Таквата зависност сега претставува ризик за енергетската безбедност на земјата, бидејќи санкциите на САД против најголемите нафтени компании во Русија имаат за цел да го принудат претседателот Владимир Путин да преговара за Украина.
Унгарската влада тврди дека нејзината локација без излез на море значи дека нема алтернатива за руската нафта.
Орбан претходно изјави дека Трамп направил грешка со воведувањето санкции врз руската нафта.
САД минатата недела воведоа санкции врз две од најголемите руски нафтени компании, Роснефт и Лукоил.

